Reynsluakstur:
Seres 3
,
árgerð
2022
Umboð:
RAG
Akstursþægindi, vel hljóðeinangraður
Armur með hraðastilli bakvið stýri, verð

Sportlegur nýliði í flokki rafbíla

Þeim fjölgar jafnt og þétt nýju rafbílunum á markaðinum. Nú hefur einn enn bæst í hópinn en það er splunkunýr Seres 3 frá RAG umboðinu í Hafnarfirði.

Bíllinn var kynntur til leiks nú í sumar og fyrsta sendingin hefur nú verið afgreidd og beðið eftir næstu.
Bíllinn er laglegur og það eru skemmtilegar línur í honum.

Laglegur bíll

Hinn nýi Seres 3 kemur frá Kína eins og svo margir nýir rafbílar. Bíllinn á hins vegar rætur sínar að rekja til Kaliforníu í Bandaríkjunum en hugmyndin að bílnum varð til í litlu sprotafyrirtæki í Kísildal (Silicon Valley).

Það eru heldur engir aukvisar sem koma að hugmynda- og stjórnunarvinnu varðandi bílinn en Martin Eberhart, einn af stofnendum Tesla, er tæknilegur stjórnandi hjá bílafyrirtækinu sem framleiðir Seres 3. Hans sérsvið er þróun rafhlaða.

Blái liturinn táknar að sjálfsögðu rafmagn.
Seres 3 kemur á fallegum 18 tommu felgum.
Afturendinn er ekki ólíkur nýjustu rafbílum á markaðnum.

Drægni í  meðallagi

Seres 3 fellur undir flokk fólksbíla í krossover flokki – gætum ef til vill kallað hann krossling. Framdrifinn bíll með einum rafmótor sem gefur um 163 hestöfl og togar 300 Nm. Það þýðir að bíllinn talsvert skemmtilegur í akstri og aflið er nægt.

Rafhlaðan tekur um 52 kWst. og það tekur um 45 mínútur eða svo að hlaða bílinn í hraðhleðslustöð sem gefur allt að 50 kW á klukkustund.
Gott aðgengi er bæði um fram- og afturdyr.
Í heimahleðslustöð getur Seres 3 tekið við allt að 6.6 kW á klukkustund.

Það er örlítið minna en gengur og gerist á nýjustu rafbílunum en kemur kannski ekki að sök því margir rafbílaeigendur hafa möguleika á að hlaða bílana heima á nóttunni. Uppgefin drægni samkvæmt WLTP staðlinum er um 420 kílómetrar.

Farangursrýmið er gefið upp 520 lítrar - ég leyfi mér að efast um að sú mæling sé alveg rétt.

Hefðbundið útlit

Í reynsluakstrinum ókum við bílnum um Suðurnesin. Í þeim túr var rafmagnsnotkunin um 22 kWst. á hverja 100 kílómetra.

Varla er hægt að tala um blandaðan akstur í því tilefni en miðað við þá rafnotkun ætti bíllinn að komast um 300 kílómetra á hleðslunnni í um 12 stiga hita eins og daginn sem við ókum.

Ætla má að vetri til geti bíllinn farið um 25% til 30% skemmri vegalengd eða um 200 kílómetra – allt eftir hitastigi. Svipað á við um aðra rafbíla á markaðnum.

Glæsilegur búnaðar - á bílnum er m.a. sólþak.

Línan í bílnum er snotur og ekki var liturinn síðri, eldrauður með sanseringu en hægt er að fá bílinn í mörgum fallegum litum.

Hönnunin er nútímaleg og ekki loku fyrir það skotið að útlitið minni eilítið á framendann á Mazda og bakendann á Opel. Bíllinn hefur þó alveg sín eigin karaktereinkenni.

Framsætin eru rafdrifin bæði hjá ökumanni og farþega.

Nýjasta tækni og vísindi

Mælaborð er stílhreint en það samanstendur af tveimur rúmlega 10 tommu skjám. Efnisval er svipað og í samkeppnisbílum á markaðnum, pleður sem samanstendur af endurvinnanlegum gerviefnum.

Sætin eru þokkaleg, sérstaklega bök framsætanna en setur mættu vera lengri og halda betur við læri.

Einnig væri gott ef hægt væri að færa sætin aftar. Við strákarnir erum báðir hávaxnir og hefðum ef til vill þurft örlítið meira fótapláss.  

Stýrið er með möguleika á hækkun og lækkun en ekki aðdrætti – eitthvað sem myndi henta vel þar sem sætisfærslan er takmörkuð.

Hér vantar ekkert upp á klassann.
Armurinn fyrir hraðastilli sést ekki í akstri. Það er pínu óþægilegt - en auðvitað lærir eigandinn fljótt hvernig hann virkar.

Ekkert Android Auto eða Apple Carplay

Það skiptir litlu að ekkert Android Auto eða Apple Carplay er í þessum bíl því nálgast má allt í snjallsímanum með því að spegla hann á skjá bílsins eða nota blátannarbúnað.

Bíllinn er búinn GPS leiðsögukerfi sem virkaði ágætlega þó svo að það sé kannski ekki í líkingu evrópsku bílamerkin.

Flott ljósahönnun.
Í mælaborðinu eru takkar til að stjórna ýmsu - þar á meðal miðstöðinni.
Ágætt pláss aftur í fyrir 2 fullorðna.

Seres 3 er þægilegur í akstri og eftirtektarvert er hversu lítið veg-, og vindhljóð kemur inn í bílinn. Fjöðrun er passleg og stýri nokkuð nákvæmt og ekki of létt.

Auðvelt er með alla aðdrætti við stjórnun bílsins en í honum eru raunverulegir takkar sem hægt er að stýra hitastigi með, útvarpi og fleiru án þess að þurfa að nota snertiskjáinn.

Um 18 sm. undir lægsta punkt.

Sumt er öðruvísi

Þó er galli að hraðastillistöngin (cruise control) sjáist ekki á bakvið stýrið í akstri. Hægt er að velja um þrjár akstursstillingar, sport, eco og normal og notar bíllinn mismikla orku við hverja stillingu.

Hægt er að stilla orkuendurheimt í gegnum skjá en ekki til dæmis með stýrisflipum eða takka í mælaborði.

Hvar í samkeppninni?

Ef við berum Seres 3 aðeins saman við samkeppnisbílana má nefna til dæmis samlanda hans Aiways 5 en sá bíll er aðeins stærri, með stærra farangursrými ásamt því að vera búinn skynvæddum hraðastilli og akreinastýringu.

Verðið á Seres 3 er um 5.900.000 kr. en Aiways 5 er á um 5.700.000 kr.

Dráttargeta Aiways eru um 1.500 kg. en hún er um 750 kg. á Seres 3 og um 1.200 kg. ef bremsur eru á tengivagni.

Blár saumur í mælaborði enda rafmagnsbíll.

Fjölhæfur og hentar mörgum

Seres 3 bíllinn ætti að henta fjölbreyttum hópi kaupenda. Hann er fallegur, hljóðlátur og þægilegur í akstri. Það eru 18 sentimetrar undir lægsta punkt og áætlað er að bíllinn komi í fjórhjóladrifsútgáfu á næsta ári.

Hentar örugglega vel í styttri ferðalög, í golfið eða sem fjölskyldubíll í borg og bæ. RAG umboðið hefur um 20 ára reynslu í innflutningi og þjónustu við bílageirann.

Verðið kemur dálítið á óvart þar sem Seres 3 bíllinn er nýr á markaðnum en það er á pari við þekktari bílamerki á markaðnum sem hafa náð góðri fótfestu með þjónustu og gæðum.

Helstu tölur:

Verð 5.900.000 kr.

Rafhlaða: 66 kWh.

Dráttargeta: 750 kg. án bremsubúnaðar/1200 kg. með bremsubúnaði

Hæð undir lægsta punkt: 18 sm.

Drægni: 420km.

0-100 km á klst.: 8,9 sek.

CO2: 0 g/km.

Þyngd: 1.750kg.

L/B/H: 4385/1850/1650 mm.

Gefið út þann:
19/7/22
í flokknum:
Fólksbílar

Fleiri greinar úr flokknum: 

Fólksbílar

skoða allt

Skráðu þig á póstlistann okkar
Fáðu fréttir í innhólfið þitt

Thank you! Your submission has been received!
Oops! Something went wrong while submitting the form.