Reynsluakstur:
Mazda 3
,
árgerð
2019
Hönnun, pláss að innan
Erfitt að sjá skott í speglum

Þrír til að koma á óvart

Margir þjónar þjóðkirkjunnar segja að þrír sé heilög tala. Og ég er sammála þeim. Þrífótur er til dæmis gífurlega mikilvægur þegar að þú tekur myndir af jafn fallegum bíl og Mazda 3 er. Þrír fætur á kolli eru líka mikilvægir og þrír kaffibollar á kaffihúsi á meðan að þú skrifar þessa grein er líka fullkomið.

Þegar ég var yngri var Mazda uppáhalds bílategundin hans föður míns. Hann hefur líka bara einu sinni keypt sér nýjan bíl og það var Mazda. Þegar að foreldrar mínir giftu sig þá var Mazda 929 brúðarbíllinn. Sá bíll var best þekktur fyrir að vera svo stór að hægt var að standa við hliðina á vél bílsins undir vélahlífinni á meðan að skipt var um olíu eða einhverju viðhaldi sinnt. Hönnuðir Mazda virðast engu hafa gleymt þegar kemur að hönnun rúmra bíla því Mazda 3 virðist vera stærri en bílar í sama stærðarflokki og hann.

Mazda 3 lítur vel út hvar sem litið er á hann. Persónulega finnst mér bæði 4 og 5 dyra bílarnir fallegir, hvorn á sinn máta.
Það kom mér sérstaklega á óvart við fyrstu kynni mín við Mazda 3 hversu stórt skottið er í honum. Það var svo stórt reyndar að ég ákvað að skríða inní það og viti menn, öll 110 kílóin af mér komust fyrir og enn var nóg pláss.

Þægilegur staður til að vera á

Efnisval og útlit þess kom mér á óvart þegar ég settist fyrst inn í Mazda 3. Það er nokkuð klassískt og allt á sínum stað en hönnunin í kringum það er áhugaverð og vel úthugsuð. Fáar en fallegar línur og allt þar sem það á að vera.

Mælaborð Mazda 3 er látlaust og hefur fallegt yfirbragð.
Stjórntæki fyrir afþreyingarkerfið er alveg sérstaklega gott og auðvelt í notkun. Stór snúningshnappur og flýtitakkar fyrir öll helstu atriði auðvelda notkun kerfisins stórlega.

Og í því kerfi er allt það helsta. Blátannarbúnaður, Apple Carplay og Android Auto. Fyrir neðan skjáinn er síðan að finna nóg af öðrum búnaði bílsins eins og hita í sætum, stýri og allt þar fram eftir götunum. Fyrir framan ökumanninn er síðan upplýsingaskjár og er honum varpað í framrúðuna líka.

Umgengni um Mazda 3 er mjög auðvelt þökk sé hversu vel hurðarnar opnast bæði frammí og afturí. Takið eftir hönnuninni á höldunum á hurðaspjöldunum.

Plássið er síðan með ágætum, bæði fram í og líka í aftursætunum. Þar er einfalt mál að koma sér vel fyrir og væri ekkert mál að setja barnabílstól á sinn stað. Þar hjálpa staðlaðar ISOFIX festingar og gott hurðarop. Ég plantaði 10 mánaða syni mínum á hans stað í bílnum og uppskar frá honum engin öskur, engan grátur, aðeins augnaráð sem sagði: „Hvað er að gerast?“

Best af öllu er þó miðstöð bílsins sem hægt og rólega breytir hita og loftflæði með svo lítilli fyrirhöfn og hávaða að hún minnti helst á Pó í Stubbunum.
Lofttúður eru mjög vel staðsettar og miðstöðin hljóðlát.

Bara SPORT eða venjulegur

Í akstri er Mazda 3 ljúfur og lipur. Fyndnast er samt að hvergi er að finna einhverskonar sparaksturshnapp eða hjúp til að setja bílinn í. Ég fíla það. Bensínbíllinn sem ég hafði til prufu eyddi alveg eins og upp var gefið frá framleiðanda. Ég er líka þannig týpa að ég kann að meta þegar bíll mætir til dyranna eins og hann er smíðaður og settur saman.

Sportlegt stýri og sport takki ásamt risastórri og góðri gírstöng.
Sjálfskipting Mazda 3 var með eindæmum eftirtektarverð. Hún er lipur á milli gíra og þú tekur varla eftir skiptingum á henni. Það heillar mig líka að tengingin við hana er í gegnum stórt og kröftugt handfang sem þú grípur í og skellir í D til að aka.

Ekkert mál var að átta sig á stærðinni á bílnum þökk sé speglunum en nokkuð flókið var að átta sig á lengdinni. Þar til hjálpar kemur þó einstaklega góð bakkmyndavél og nálgunarvarar. Lipurleikinn í stýrinu hjálpar líka og er bíllinn sérstaklega þægilegur í alls kyns tilfæringum á bílastæðum og í þröngum götum.

Frammendi Mazda 3 fer ekkert framhjá neinum og nýtur Mazda merkið sín vel.

Lokaorð

Mazda 3 er vel útlítandi bíll sem hefur geggjaðan stíl og djarfa hönnun. Allar útgáfur af honum skarta sama fallega framendanum og valið á afturendanum er þitt. Þeir eru þó allir jafn flottir og framendinn. Mazda 3 er vel útbúinn bíll sem býður upp á helling af plássi fyrir einstaklinga og fjölskyldur. Ég mæli með Mazda 3 fyrir alla þá sem leita sér að áreiðanlegum og góðum þjóni fyrir þig og þínar þarfir. Taktu hann fjögurra eða fimm dyra eftir því sem þú þarft og í SKY eða COSMO útgáfu, en hafðu litinn rauðan eða gráan.

Prufaðu svo að leggjast í skottið, það kemur þér á óvart hversu mikið pláss er þar.
Ef þér lýst á’ann, keyptann.

Helstu tölur

Verð frá: 3.590.000 (Sept. 2019)

Vélar í boði: Bensín

Eyðsla frá: 5.2l/100km

Helstu tölur L/B/H/Hjólahaf: 4.660/1.795/1.440/2725mm

Gefið út þann:
11/10/19
í flokknum:
Fólksbílar

Fleiri greinar úr flokknum: 

Fólksbílar

skoða allt
Sker sig úr
Einstakur lúxus

Skráðu þig á póstlistann okkar
Fáðu fréttir í innhólfið þitt

Thank you! Your submission has been received!
Oops! Something went wrong while submitting the form.