Jaguar gæti notað grunn frá BMW fyrir nýja jeppa
Það er talið líklegt að Jagúar muni nota grunn frá BMW til að renna stoðum undir tvo nýja litla jeppa, að sögn breska bílablaðsins Autocar.
Gerðirnar – jeppi með hefðbundnu útliti og „crossover“ sportjeppi með coupé-yfirbragði – eru á fyrstu stigum þróunar, að því er fram kom hjá blaðinu.
Sem hluti af vaxandi samvinnu Jaguar Land Rover við BMW gætu bílarnir verið byggðir á nýjum FAAR framhjóladrifnum grunni BMW sem þegar er til staðar í nýjasta BMW-1.
Þeir myndu væntanlega bera Pace nafnið sem Jaguar notar fyrir jeppa / „crossover“ bíla sína í dag.
Einnig gæti FAAR grunnur BMW verið notaður fyrir nýjan Land Rover og fyrir næstu kynslóð Range Rover Evoque og Land Rover Discovery Sport, að sögn Autocar.
Í júní sagðist BMW ætla að þróa næstu kynslóðir rafmótora, gírkassa og rafeindatækni fyrir drifrás með Jaguar Land Rover ásamt sameiginlegu liði BMW og JLR sérfræðinga sem staðsettir eru í München og hafa það verkefni að þróa enn frekar fimmtu kynslóð BMW eDrive tækninnar sem mun koma fram á sjónarsviðið á þessu ári í iX3 jeppanum sem eingöngu notar rafhlöður.
(byggt á Automotive News Europe)
?
Umræður um þessa grein