Fjöldi ökumanna virðist hafa ótrúlega frjótt ímyndunarafl. Í það minnsta þegar þeir eru staðnir að verki við umferðarlagabrot. Þá virðast engar hömlur á hugarfluginu hvað afsakanir og útskýringar áhrærir.
Auðvitað getur verið að sá hópur sem brýtur af sér búi yfir auðugra hugsmíðaafli en þeir sem ekki brjóta af sér en það er önnur saga!
Hér verður fjallað um þær útskýringar, afsakanir, skilgreiningar og túlkun ökumanna á því hvort þeir hafi verið í símanum þegar lögregla stöðvaði þá. Það er alvarlegt brot að blaðra í síma eða fikta í síma við akstur (nema með þar til gerðum búnaði eins og allir vita) en hér er dálítil samantekt á útgáfunum sem umferðarlögreglan í hinum ýmsu löndum hefur mátt hlusta á.
Rennum yfir þær algengustu:
Ég var að nota GPS-ið
Ég var að kíkja á klukkuna
Ég hélt bara á símanum en var ekki að nota hann.
Síminn datt á gólfið, ég náði honum og held þess vegna á honum.
Yfirmaðurinn/læknirinn/lögfræðingurinn var í símanum
Allt er þetta nú hrútleiðinlegt en vindum okkur þá í „áhugaverðari“ skýringar ökumanna á farsímanotkun við akstur.
„Nei, ég var alls ekki að skrifa skilaboð. Ég var nú bara að tékka á tölvupóstinum.“
„Síma? Nei, ég er ekki einu sinni með hann á mér,“ sagði konan og í þeim töluðu orðum byrjaði síminn að hringja í farþegasætinu.
„Æj, gerðu það ekki sekta mig fyrir þetta. Þið eruð nýbúnir að sekta mig fyrir þetta. Í síðustu viku.“
„Fyrirgefðu. Ég var að selja hlutabréf.“
„Í símanum? Nei, ertu frá þér! Ég var bara að lesa.“
„Þetta er ekki sími. Þetta er ferðaútvarp.“
„Þetta var ekki sími sem ég hélt á heldur greiða. Ég var að greiða mér.“
„En ég var með símann á flugstillingu.“
„Ég er nýbyrjaður með stelpu og lagið okkar var í útvarpinu. Ég varð bara að hringja í hana.“
Agalega lummó en svo er hér önnur tónlistartengd skýring sem er skömminni skárri en sú fyrri: Maður nokkur heyrði svo geggjað lag í útvarpinu að hann varð bara að opna Shazam (app sem greinir tónlist) til að vita hvaða lag væri í spilun.
„Sjálfur þoli ég ekki ökumenn sem eru í símanum en ég var bara að taka eina mynd.“
„Jæja, ég veit vel að þú stoppaðir mig bara af því að ég er á Porsche.“
„Afsakaðu kæri löggimann að ég stoppaði ekki áðan. Ég sá þig ekki því ég var í símanum.“
„Heyrðu, ég er betri bílstjóri en flestir.“
„Hvaða æsingur er þetta! Ég var bara að millifæra. Var ekkert að tala í símann maður.“
„Sérðu! Hann er stilltur á handfrjásan búnað.“
„Karlinn minn, ég gjörþekki lögin. Ég var bara rétt að kíkja á símann.“
„Ég er með svona app í símanum sem minnir mig á að taka lyfin á réttum tíma. Þess vegna var ég með símann í höndunum því það var kominn tími á lyfin.“
„Þetta er allt í góðu. Lögreglumaður sagði mér að það væri í lagi að tala í síma og aka ef ég væri með símann í kjöltunni.“
„Bölvaður vekjarinn! Ég varð að slökkva á honum því hann truflaði mig við aksturinn.“
Það er óneitanlega ánægjulegt að greina frá því að þetta eru gamlar afsakanir. Þá á ég við að vandamálið er ekki eins stórt og það var fyrir tíu til fimmtán árum síðan. Auðvitað er of snemmt að hrósa happi núna og segja að vandinn sé úr sögunni. Hins vegar hefur margt breyst (aukin fræðsla, betri vitund, bætt tækni o.s.frv.) og færri slys má rekja beint til ökumanna sem eru að vesenast í símanum meðan á akstri stendur.
Árið 2019 mátti rekja yfir 3.100 dauðsföll í Bandaríkjunum til ökumanna sem ekki voru með hugann við aksturinn. Til dæmis fólks sem var að senda sms eða að „like-a“ eitthvað í símanum meðan það ók.
Það styttist vonandi í að okkur þyki álíka fáránleg tilhugsun að nota símann meðan ekið er og að reykt hafi verið um borð í flugvélum fyrir nokkrum árum! Gapandi galið hvort tveggja.
Var þetta þokkalegt? Hér er fleira í svipuðum dúr:
Misvondar afsakanir og hraðasektir
Ökukennsla: Þegar allt klikkar!
Stórfurðulegar umferðarreglur?
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein