Til eru ótal síður á alnetinu þar sem fullyrt er að fáránlegar umferðarreglur séu hér og þar í heiminum. Einkum og sér í lagi í hinum og þessum fylkjum Bandaríkjanna.

Reglur á borð við að  bannað sé að festa hund uppi á þaki bíls og að bannað sé að aka um með skógarbjörn í aftursæti bifreiðar.

Þetta er skemmtilegt og bráðfyndið, en er þetta satt? Blaðamaður vann heimavinnuna sína og fór í gegnum ótal reglugerðir, lögreglusamþykktir, lög og þess háttar. Niðurstöðurnar verða kynntar í þessari umfjöllun

Bannað að blóta

Það er auðvitað ruddalegt að blóta eins og sótraftur án almennilegs tilefnis. Í Rockville í Maryland má hver sorakjaftur gæta sín, burtséð frá því hvort almennilegt tilefni sé til þess að blóta hressilega eður ei. Það er nefnilega einfaldlega BANNAÐ!

Skiptir þá engu hvort viðkomandi strigakjaftur er á gangi, í bíl með topplúguna opna eða að dæla bensíni á stálfákinn: Ljótur munnsöfnuður er refsiverður og megi menn „halda kjafti“ til að forðast sekt ef þeir hafa á annað borð tilhneigingu til að krydda mál sitt með blótsyrðum.

Þarftu lífsnauðsynlega að blóta? Gættu þess þá að vera í „réttu“ fylki! Mynd:Unsplash

Kalifornía til fyrirmyndar

Það má segja ýmislegt um kjánalegar umferðarreglur (sé tekið mið af spekingum á veraldarvefnum) í Kaliforníu en gaman er að greina frá því að í reglunum er eitt og annað sem er algjörlega til fyrirmyndar:

Það er með öllu óheimilt að reykja ef barn er í bílnum. Sé einhver staðinn að verki bíður hans allt að 100 dollara sekt.

Það er margt rökrétt í umferðarreglunum í Kaliforníu og auðvitað líka eitthvað furðulegt.

Bannað er að vera með heyrnartól eða eyrnatappa í báðum eyrum meðan á akstri stendur. Heyr heyr! Hversu oft sér maður ekki bílstjóra með heyrnartól? Allt of oft. Allt frá nettum heyrnartólum til svakalegra hlemma eins og maður myndi nota í skipasmíðastöð.

Óheimilt er að mála sig, raka, lesa, skrifa og nota fartölvu meðan á akstri stendur. Jú, þetta þarf víst að taka fram en nánar má lesa um þetta með því að smella á hlekkinn hér að ofan.

Æj, nei! Ekki mála þig meðan þú ekur góða mín...

Úr sloppnum kona góð

Á villta tryllta vefnum, alnetinu, las ég á óáreiðanlegri síðu að í Kaliforníu væri konum óheimilt að klæðast slopp við akstur. Það hljómar nú eins og hver annar brandari, einkum og sér í lagi þegar hugsað er til allra þeirra sem fara út um hvippinn og hvappinn íklæddir náttfötum… Náttbuxur virðast á einhvern óútskýranlegan hátt hafnar yfir alla gagnrýni hér á landi og vogar maður sér ekki að minnast orði á að einhver sé eins og bjáni úti í búð í náttbuxum.

Það myndi flokkast sem skítkast samansaumaðrar smásálar. En aftur að sloppunum!

Það var ekki neitt að finna um stóra sloppabannið í lögunum. Hvorki tangur né tetur! Mögulega hefur einhvern tíma verið í gildi lögreglusamþykkt eða eitthvað í þá veru sem laut að sloppum en ekki er að sjá að þetta eigi sér stoð í lögum.

Ótrúlegt en satt þá hafði greinarhöfundur nokkuð gaman af því að lesa núgildandi umferðarreglur Kaliforníu. Áhugasamir eru hvattir til að smella á meðfylgjandi hlekk og þannig má verja ótal klukkustundum í að lesa um sektir, boð, bönn, endurnýjun ökuskírteinis, akstur yfir landamæri, tryggingar, undanþágur, lagabreytingar, áfrýjun og refsingu.

Þeir sem ekki hafa áhuga á því ættu endilega að halda áfram lestrinum því næst skreppum við til suðurríkjanna!

Ekkert brask á sunnudögum

Undirrituð var sannfærð um að það væri flökkusaga að í einhverjum fylkjum væri bannað að selja bíla á sunnudögum. Svo sannfærð að ég ætlaði að skauta framhjá þessari dellu. En forvitni blaðamaðurinn varð auðvitað að ganga úr skugga hvort eitthvað væri hæft í þessu og, viti menn! Þetta er satt!

Er nokkuð sunnudagur? Ef svo er: Gleymdu þessu!

Í fylkinu Maine, sem er á austurströnd Bandaríkjanna, er sala bifreiða á sunnudögum bönnuð. Hvorki má leggja drög að kaupum, sölu eða skiptum notaðra né nýrra bíla á sunnudögum. Refsing bíður þeirrar óheillakráku sem virðir þessi lög að vettugi, eins og sjá má í lögunum.

Hið sama gildir í Colorado en sagan segir (ath. sagan, áreiðanlegar heimildir var erfitt að finna) að enginn bílasali í því fylki hafi selt eða keypt bíl á sunnudegi síðan árið 1952.

Munu fylkin vera tólf talsins sem banna bílabrask á sunnudögum: Oklahoma, Minnesota, Maine, Colorado, Wisconsin, Illinois, Missouri, Indiana, Louisiana, Pennsylvania, Mississippi og New Jersey.

Ástæðan er trúarlegs eðlis og þó svo að hvergi sé minnst á bíla í Biblíunni má rekja bannið til hennar. Höfum í huga að fylkin sem um ræðir eru hluti af biblíubeltinu svonefnda og íbúar almennt trúaðir og trúarhiti mikill.

Hvíldardagurinn er því á einhvern hátt fjandsamlegur þegar bílabrask er annars vegar en auðvitað hefur maður slíkar trúarvenjur ekki í flimtingum. Höfum þetta bara í huga ef til stendur að bílabraska á þessum slóðum.

Ungir ökumenn og farþegabann

Í fyrsta lagi kann okkur að finnast stórfurðulegt að einhvers staðar fái ungmenni, yngri en 17 ára, ökuréttindi. Það er kannski ekki fyndið en ólíkt því sem við eigum að venjast hér á landi. Almennt er bílprófsaldurinn í Bandaríkjunum 16 ár og þannig hefur það verið frá því um 1940.

Í Washington geta 16 ára „börn“ (gæsalappir af því að skv. skilgreiningunni sem við notumst við eru börn einstaklingar undir 18 ára aldri) fengið ökuréttindi. Þau mega ekki aka á milli klukkan 01 og 05 nema með þeim sé foreldri, ábyrgðarmaður eða einhver eldri en 25 ára og með ökuréttindi.

Fyrstu sex mánuðina er þeim óheimilt að aka með farþega 18 ára eða yngri. Gerist þau sek um það mega þau eiga von á 100 dollara sekt og sviptingu ökuréttinda í 6 mánuði.

Víðsvegar um Bandaríkin mega börn byrja að læra á bíl, haldið ykkur fast og spennið beltin, FJÓRTÁN ára gömul! Já, það er alveg grjótmögnuð staðreynd.

Þeir eru kannski ekki svona ungir, yngstu bílstjórarnir í Bandaríkjunum. Mynd: Unsplash

Idaho með sín sérkenni

Í Idahofylki geta börn öðlast ökuréttindi, takmörkuð ökuréttindi, 15 ára gömul. Almennt skírteini fá þau við 18 ára aldur. Fimmtán ára gömul mega þau aka einsömul til og frá skóla eða vinnu en þau þurfa að hafa lokið ökukennslu (þarf virkilega að taka það fram? Já, það þarf víst!).

Fimmtán ára ökumenn mega ekki aka að næturlagi nema með þeim sé einhver 21 árs eða eldri og þarf sá að vera með ökuréttindi.

Þeir sem eru yngri en 17 ára þurfa að hafa lokið 6 verklegum ökutímum til að fá skírteinið. Meira virðist lagt upp úr bóklega hluta námsins því 30 stundum þarf að ljúka af bóklegri kennslu.

Í Idaho má fara ferða sinna eftir flestum vegum á hestbaki. Vegfarendur á hestum njóta sömu réttinda og þeir er aka bílum. Jú, og þurfa að lúta sömu reglum, þ.e. umferðarreglum.

Idaho er eitt fjögurra fylkja  sem heimila vinstri beygju á rauðu ljósi sé ekið inn á einstefnugötu. Jafnvel þótt komið sé af götu þar sem akstursstefna er í báðar átti (tvístefnugata er vissulega orð en það hljómar furðulega). Hin fylkin eru Maryland, Oregon og Washington. Í Idaho er hjólreiðafólki heimilt að aka yfir á rauðu eins og lesa má um ef smellt er á hlekkinn hér að ofan.

Rétt er að geta þess að í fleiri fylkjum geta 15 ára börn öðlast ökuréttindi og í sumum þeirra eru takmarkanirnar færri en í Idaho. Önnur fylki sem má nefna eru: Norður-Dakóta, Suður-Dakóta (ökuréttindi fást við fjórtán og hálfs árs aldur), Suður-Karólína, New York, Nýja-Mexíkó og Montana. Annars er, sem fyrr segir, miðað við 16 ára aldurinn almennt séð.

Vonbrigði

Það var auðvitað ekki leiðinlegt að garfa í þessum meintu stórfurðulegu reglum. Maður lærir alltaf eitthvað, en ekki neita ég að vonbrigðin voru töluverð þegar í ljós kom að hvergi (í minni yfirferð - vel ígrundaðar ábendingar vel þegnar) er áreiðanlegar heimildir að finna fyrir því að:

Bannað sé að aka með górillu í aftursætinu

Ekki megi festa hunda á þak bifreiðar

Greiða þurfi í stöðumæli bindi maður geit, fíl eða krókódíl við hann

Óheimilt sé að þrífa bílinn með gömlum nærbuxum

Bannað sé að hrækja úr strætó og fólksbíl en ekki jeppa

88 ára og eldri megi ekki aka mótorhjóli í Idaho Falls

Svo má auðvitað ekki gleyma því að sumt er einfaldlega bannað þó það sé ekki tilgreint sérstaklega í lögum. Eins og til dæmis að bannað er að binda krókódíl við brunahana. Það segir sig sjálft: Það má ekki binda neitt við brunahana. Ekki bíl, díl eða fíl. Þó það standi ekki nákvæmlega svona þá liggur það í eðli hlutanna. En eins og einhver sagði:

Fólk þarf að nota almenna skynsemi; gallinn er bara sá að hún er ekki endilega svo almenn.

Sett inn
7/4/2021
í flokknum:
Bílaheimurinn

Fleiri fréttir úr flokknum:

Bílaheimurinn

skoð allt

Skráðu þig á póstlistann okkar
Fáðu nýjustu greinarnar í pósthólfið þitt

Thank you! Your submission has been received!
Oops! Something went wrong while submitting the form.