Konungur jepplinganna
Nissan Qashqai hefur átt einróma vinsældum að fagna á Íslandi. Áreiðanlegur, hagkvæmur og nýst íslenskum bíleigendum ákaflega vel. Nú lítur þriðja kynslóð þessa ágæta bíls dagsins ljós – og er með öllu því nýjasta sem bíltæknin býður uppá í dag.
Við hjá Bílabloggi vorum svo heppinn að fá að prófa þennan konung jepplinganna nánast um leið og hann lenti hjá umboðinu. Við tókum góðan rúnt á bílnum og satt best að segja stendur þessi nýi Nissan Qashqai undir nafni og vel það.
Stærri og flottari
Lengri, breiðari, hærri og lengra á milli hjóla. Hann er boðinn í fjölmörgum útgáfum með einni vélarstærð. Eins og áður er Qashqai boðinn fram- og fjórhjóladrifinn en nú aðeins í bensínútgáfu.
Qashqainn kemur með bensínvél sem gefur 158 hestöfl.
Tog er um 270 Nm. Það þýðir að bíllinn er þokkalega aflmikill en upptakið frekar lítið. Samt sem áður gefur þessi vél bílnum nægt afl og eftir að ferðahraða er náð malar bíllinn eins og köttur.
Mild hybrid
Nýr Qashqai er búinn litlum rafmótor (e. mild hybrid) sem hjálpar til við aksturinn á erfiðum tímum. Þessi mótor kemur inn þegar tekið er af stað til að hjálpa vélinni í upptakinu og auka hagkvæmnina. Eyðslan kemur líka á óvart.
Þessi nýi Qashqai er með uppgefna eyðslu frá 5,5 ltr. á hundraðið upp í 6,2 lítra á hverja hundrað kílómetra með sjálfskiptingu.
Frá upphafi hefur Nissan Qashqai notið vinsælda. Hann hefur dyggan kaupendahóp. Frá upphafi hafa 5 milljónir Nissan Qashqai verið framleiddir, þar af 3 milljónum í Evrópu og yfir 4000 eintökum á Íslandi.
Nissan Qashqai er boðinn í fjórum mismunandi útgáfum en taka skal fram að grunnútgáfan er sérlega vel búin.
Acenta kemur aðeins framhjóladrifinn, N-Connecta kemur fram- og fjórhjóladrifinn og Tekna og Tekna plús einnig.
Vel búin grunnútgáfa
Acenta bíllinn kemur með akreinastýringu, akreinavara, eCall öryggiskerfi, neyðarbremsuaðstoð, sjálvirkri neyðarhemlun, rafdrifinni handbremsu og er búinn brekkuaðstoð þannig að bíllinn rennur ekki þegar ekið er af stað.
Bakkmyndavél, lykillaust aðgengi, lykillaus ræsing, vegaskiltanemar, hraðatakmarki og skynvæddur hraðastillir. Það þýðir að þessi grunnútgáfa er með betur búnu bílum í þessum stærðarflokki á markaðnum í dag.
Hins vegar myndast verð dýrari gerðanna við val á lúxus sem gaman er að hafa en er alls ekki nauðsynlegur.
Bíllinn er þægilegur í akstri, sætin frábær, halda vel við bak og læri og áklæðin klædd slitsterkum efnum. Hægt er að fá Tekna plús með Nappa leðursætum og nuddi í framsætum.
Betri aksturseiginleikar
Qashqai er með nokkuð stinna fjöðrun, stýrið er létt og leikandi og bíllinn liggur vel á vegi. Við vorum að aka hringtorgin á Vesturlandsveginum sem eru rómuð fyrir „hálku” í bleytu. Þar stóð bíllinn sig mjög vel, leitaði ekkert út úr beygju þó um talsverðan ökuhraða væri að ræða. Pínu sport fílingur í akstrinum.
Nissan Qashqai hentar án efa stórum kaupendahópi.
Nú hefur BL opnað nýja og flotta aukahlutadeild þar sem hægt er að sníða bílinn svolítið eftir þörfum og áhugamálum kaupendanna. Það er hægt að fá flottar skíða- og hjólafestingar auk farangursboxa í úrvali.
Hagkvæmur og hentugur
Qashqai er fjölskyldubíll. Hann er plássgóður þó svo að miðjustokkur sé kannski aðeins stærri en í forveranum.
Það er gott pláss afturí og höfuðpláss þar er mjög gott. Inn- og útstig er frábært og hurðir opnast sérlega vel og þá sérstaklega afturhurðirnar sem opnast upp á gátt eða næstum 90°.
Auðvitað söknum við dísel útgáfunnar en við fylgjum stefnu og straumum í umhverfismálum og notum orkugjafa sem menga minna. Helstu samkeppnisaðilar eru bílar eins og Peugeot 3008, Skoda Karooq, BMW X1 og Volvo XC40 svo eitthvað sé nefnt.
Helstu tölur:
Verð frá : 4.690 þús. (Reynsluakstursbíll kr. 6.790 þús.)
Hestöfl: 158 hö.
Vél: 1.332 rms., fjórir strokkar.
Tog: 270 Nm.
Eyðsla bl.ak.: 6.2 ltr/100km.
Eigin þyngd: 1.400 kg.
Dráttargeta: 687/1500 kg.
L/B/H 4425/2084/1625 mm.
Klipping myndbands: Dagur Jóhannsson.
Aðstoð við upptöku myndbands: Ólöf Þórðardóttir.
