Anna: „Ökuníðingurinn“ í konungsfjölskyldunni
Anna Bretaprinsessa er 72 ára gömul. Hún er ákaflega fær í öllu sem tengist hestum og hestamennsku. En eftir því sem hestöflunum fjölgar verður prinsessan hættulegri. Enda hefur hún verið svipt ökuréttindum oftar en einu sinni síðustu áratugina.
Þó að móðir hennar, Elísabet heitin, hafi verið flinkur bílstjóri og meira að segja bifvélavirki eins og lesa má um hér, þá er síður en svo sjálfgefið að dóttirin sé líka góður bílstjóri. Reyndar virðist dóttir Önnu prinsessu líka varhugaverður bílstjóri sem hefur mátt sæta banni (missti t.d. réttindin í sex mánuði árið 2020) en það er önnur saga.
Þær mæðgur, Elísabet og Anna, deildu áhuga á bílum, hestamennsku og kappreiðum en margir myndu kjósa að Anna héldi sig bara við hestana og léti ökutækin alfarið eiga sig.
Skemmtilegast að skipa bílstjóranum að skipta
Í Morgunblaðinu þann 8. janúar árið 1991 birtist frétt um Önnu prinsessu og var hún þar kölluð ökuníðingur.
„Fregnir herma að Anna Bretaprinsessa sé ökuníðingur og hún hafi nú verið svipt ökuréttindum í mánuð eftir að hafa verið tekin fyrir of hraðan akstur. Áður hafði hún verið dæmd til að greiða sekt, en er hún ítrekaði brot sitt var skírteinið tekið af henni.
Anna er með bíladellu og eitt af því sem henni þykir hvað skemmtilegast að gera er að skipa bílstjóra sínum að setjast í farþegasætið fram í og setjast sjálf undir stýri og þenja síðan tíkina hressilega.
Það ætti að vera hægt að aka bíl hennar sæmilega greitt. Um er að ræða Bentley af nýjustu og fullkomnustu gerð með túrbóknúna vél. Anna situr ekki undir stýri úti í umferðinni, en er nær dregur heimili hennar í Gatcombe Park, skipar hún bílstjóranum að stöðva og fer sjálf undir stýri.
Er sagt að hún aki þröngar og fáfarnar göturnar til Gatcombe á slíkum ógnarhraða, að nágrannar gerðu lögreglunni viðvart. Fór hún þá á stúfana og fylgdist með og niðurstaðan var sú að Anna var sannarlega sek um vítaverðan akstur.“
Síðan hefur atvikum fjölgað og sömuleiðis sektunum. Það má segja að Anna sé öflugur punktasafnari því hún hefur nokkuð oft fengið nógu marga punkta til að missa réttindin til skemmri eða lengri tíma.
Segir t.d. hér að hún hafi fengið fyrstu feitu sektina fyrir hraðakstur árið 1972, svo 1977, þá tvisvar árið 1990 því næst árið 2001 og já, ætli listinn sé ekki lengri hjá henni blessaðri? Það gæti verið.
Þessu náskylt:
Bifvélavirkinn Elísabet Englandsdrottning
Elísabet drottning og bílarnir
?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
