Það eru örugglega ekki í mörgum borgum sem gestir og gangandi geta barið augum klassíska gullmola á fjórum hjólum og það í nánast hverri viku yfir sumartímann ef vel viðrar.
Krúser gengið stendur fyrir hópakstri á fimmtudagskvöldum á sumrin ef vel viðrar.
Ef sýnt er á öruggum veðurspám að sú gula ætlar ekki að sýna sig á fimmtudegi er rúnturinn bara færður aðeins til og farið þá á þriðjudegi eða miðvikudegi.
Karnival stemning
Það er einfaldlega „karnival“ stemning á planinu hjá Hörpu þessi kvöld og túristarnir halda ekki vatni yfir þessum fjársjóði sem dúkkar allt í einu upp fyrir framan þá – alveg ókeypis.
Þeir rífa upp myndavélar og taka myndir í gríð og erg.
Kæmi ekki á óvart að á þessum uppákomum séu myndamet slegin í miðborginni.
Það sem er svo sérstakt við þessa bíltúra að þarna úir og grúir af allskyns ökutækjum, bæði nýjum og gömlum.
Fjölbreytnin er mikil og allt eru þetta vinir úr Krúser klúbbnum sem halda hópinn, hittast og gera það sem þeim finnst gaman – að aka gullmolunum sínum í góðu veðri.
Gamli góði rúnturinn
Ekið er frá Höfðabakka 9 þar sem höfuðstöðvar Krúser eru til húsa. Oft hittast menn uppúr kl. 18-19 og þá er ef til vill Hamborgarabíllinn á svæðinu og fólk fær sér snæðing fyrir bíltúrinn.
Þá er ekið um Miklubraut og niður á Barónstíg þar sem hópnum er smalað saman í eins langa röð og Barónstígurinn leyfir.
Þá er ekið niður Laugaveginn eins langt og hann nær, niður á Hverfisgötu, upp Ingólfsstræti og síðan gamla góða rúntinn.
Vá, hvað það er gaman að upplifa stemninguna þegar strollan ekur um miðbæinn.
Túristarnir eru hreinlega að missa augun út úr tóftunum og fálma eftir myndavélum sínum – því þeir áttu hreinlega ekki von á því að sjá svona dýrð í göngutúrnum sínum í Reykjavík.
Við eigum gott safn fornbíla, marga mjög sjaldgæfa og ekki síður vel með farna og vel uppgerða.
Það hlýtur að vera met hjá okkur miðað við höfðatölu eins og svo margt annað með okkur íslendinga.
Rúntinum lýkur svo með hittingi á planinu hjá Hörpu þar sem menn stoppa og spjalla saman í um klukkustund og keyra svo til síns heima.
Bílaklúbburinn Krúser
Krúser heldur úti vef og þar má sjá eftirfarandi. www.kruser.is
Samkomur eru haldnar öll fimmtudagskvöld í húsakynnum Krúser að Höfðabakka 9 og hefjast kl. 20.00. Ef vel viðrar mæta félagar á glæsivögnum sínum og taka rúnt um bæinn á eftir.
Klúbburinn heldur árlega veglega Bílasýningu sem hefur ávalt verið vel sótt og er sífeld aukning á meðlimum og bílum.
Árlegur skoðunardagur bifreiða, fyrir meðlimi hefur verið haldinn að vori til í húsakynnum Aðalskoðunar í Hafnarfirði þar sem meðlimum býst að fara með bíla sína í gegn um skoðun á MJÖG góðu verði og hefur það ávallt verið vel sótt.
Krúser vinnur náið með og á gott samstarf við N1 og Vátryggingarfélag Íslands, þar sem meðlimum er boðið upp á ódýrara eldsneyti og tryggingar á góðum kjörum.
Markmið klúbbsins eru:
Að viðhalda klassískum bílum og stuðla að varðveislu þeirra.
Að standa vörð um hagsmuni bíleigenda og efla kynni þeirra á milli.
Að stuðla að góðakstri innan félagsins og góðri umgengni um bíla og sögu þeirra.
Að efla samstöðu og kynni milli annarra sambærilegra klúbba.
Meðfylgjandi myndir eru frá Krúser túr, 6. júlí síðastliðinn en þá fengu blaðamenn Bílabloggs.is að fljóta með.
Myndband
Þetta myndband er fyrri hluti rúntarins frá 6. júlí. Seinni hlutann birtum við síðar en þá sjáum við bílana og eigendur þeirra á Hörpuplani.
Myndir og myndband: Pétur R. Pétursson
