Í tilefni þess að tíu ár eru síðan BL kynnti fyrsta rafbílinn í sýningarsal fyrirtækisins við Sævarhöfða þegar Nissan Leaf kom fyrst á markað blæs fyrirtækið til sérstakrar sýningar við Sævarhöfða og hjá Hyundai við Kauptún í Garðabæ nk. laugardag, 2. september milli kl. 12 og 16, þar sem fjöldi bíla verður til sýnis og reynsluaksturs.
68% einstaklinga velja nú 100% rafbíl
Þegar rafbílavegferð BL hófst með frumsýningu Nissan Leaf 31. ágúst 2013 var hlutfall rafbíla í nýskráningum fólksbíla í heild hér á landi einungis 0,6%. Þetta hlutfall er í dag 39,4% á heildarmarkaðnum og enn hærra á einstaklingsmarkaði eða 67,9%.
Samhliða þessari þróun hófst uppbygging innviða sem segja má að hafi einnig byrjað 2013, þegar BL, Nissan í Evrópu og OR tóku höndum saman um uppsetningu 10 hleðslustöðva á höfuðborgarsvæðinu.
Síðan hefur fjöldi hleðslustöðva margfaldast og er nú þétt riðið net stöðva frá ýmsum aðilum um allt land óðum að taka á sig fyllri mynd. Má sem dæmi nefna að nú rekur Ísorka, systurfyrirtæki BL, hleðslunet sem telur um 900 stöðvar, þar af hraðhleðslustöðvar á 26 stöðum um landið, sem geta alls hlaðið 120 bíla samtímis.
Yfir 5.000 rafbílar frá BL
Mikið vatn hefur runnið til sjávar frá 2013 enda býður BL nú tuttugu og eina mismunandi gerð rafbíla frá Nissan, Renault, Subaru, Hyundai, BMW, MINI, Hongqi, MG og Jaguar og hafa rúmlega fimm þúsund hreinir rafbílar verið nýskráðir hér á landi frá ofantöldum framleiðendum.
Sýna úrvalið á laugardag
Á rafbílasýningunni á laugardag kynna söluráðgjafar BL við Sævarhöfða og Hyundai á Íslandi úrval nýjustu rafbíla fyrirtækisins.
Hjá Hyundai verða m.a. hinir margverðlaunuðu IONIQ 5 og IONIQ 6 í sviðsljósinu og reynsluakstursbílar til taks.
Við Sævarhöfða í Reykjavík verður úrval bíla til sýnis og reynsluaksturs, þar á meðal Ariya, nýjasti rafbíll Nissan, auk nýjustu rafbílanna frá BMW, Renault, MG, Hongqi og Subaru svo nokkur merki séu nefnd.
Rafbílavæðingu fylgir mikil fjárfesting
Frá árinu 2013 hefur BL fjárfest umtalsverðu fjármagni í hugbúnaði og sérhæfðum tækjakosti sem fylgja þjónustu, viðhaldi og viðgerðum á rafbílum, samfara því sem starfsfólk á verkstæðum hefur fengið sérhæfða þjálfun og kennslu hjá bílaframleiðendunum erlendis til að takast á við viðhald og viðgerðir.
Árangurinn er sá að öll þjónustuverkstæði BL hafa vottun og réttindindi til að sinna rafhlöðuviðgerðum fyrir alla framleiðendur fyrirtækisins, sem er alls ekki staðan á öllum mörkuðum.
Orkuskiptin halda áfram
„Þróun rafbílavæðingar hér á landi hefur verið í miklum vexti síðustu ár og bendir flest til þess að með sama áframhaldi verði rafbílar svo til allsráðandi á einstaklings- og fyrirtækjamarkaði eftir 2-3 ár.
Hins vegar gæti raunin orðið önnur ef ívilnanir verða felldar niður á einu bretti eins og stefnir í um næstu áramót. Það mun hægja á þróuninni og líklegast hliðra henni til um 4-5 ár eða þar til framleiðslukostnaður rafbíla verður orðinn svipaður framleiðslukostnaði bensín- og dísilbíla.
Ég fæ ekki séð hvernig það rímar við markmið Íslands í orkuskiptum að hægja svo á þróuninni sem niðurfellingin gæti valdið,“ segir Brynjar Elefsen framkvæmdastjóri sölusviðs BL.
