Furðulegar aukabúgreinar bílaframleiðenda
Einkaþotur, pylsur og margt þar á milli
Maður verður eiginlega pínu móðgaður þegar kemur í ljós að bílaframleiðandinn sem er á stalli í huga manns framleiðir eitthvað allt annað en bíla – svona hálfpartinn í laumi. Þannig leið mér þegar ég áttaði mig á að BMW er að „paufast“ við að búa til BOBSLEÐA þegar ég sé ekki til.
Auðvitað er þetta nú bara í nösunum á mér, en tilfinningin er samt næstum því til. Það örlar aðeins á einhverjum pirringi. Eins og ef maður býður fólki í mat og stendur yfir pottunum í marga klukkutíma, löðrandi upptrekktur af vandvirkni og fullkomnunaráráttu. Svo koma gestirnir og við matarborðið kemur upp úr dúrnum að þeir stoppuðu á Bæjarins beztu á leiðinni.
Langsótt? Já. En býsna gott dæmi – þó ég segi sjálf frá!
Þetta er auðvitað ekkert annað en bölvuð frekja í manni og stjórnsemi. BMW býr vissulega til ólympíska bobsleða ef það hentar framleiðandanum. Svo virðist það nú ekkert vera nokkurt einasta leyndarmál.
Ekki má gleyma hjólastólum úr koltrefjum sem hannaðir eru fyrir afreksíþróttafólk sem keppir á Paralympic Games (jú, Ólympíuleikar fatlaðra kallast það víst en hitt er fallegra að mínu mati).
Upp í loft og það hratt
Víkur þá sögunni alla leið til Honda og þar, í hliðarbúskapnum, er til dæmis að finna einkaþotur (nema auðvitað að bílaframleiðslan sé orðin aukabúgrein).
Honda þotuævintýrið hófst árið 2006 og eins og glöggir hafa eflaust tekið eftir þá eru flugvélar og hvers kyns loftför ofarlega á baugi hjá undirritaðri þannig að meira verður fjallað um þetta síðar.
Það er nokkuð ljóst að hraðskreiðasta Hondan er fundin en einkaþoturnar eru tiltölulega nýjar í aukabúgreinaúrvalinu. Sláttuvélar, laufblásarar og eitthvað fleira í garðyrkjudeildinni kemur frá sama framleiðanda og ekkert gaman að fjalla um það.
Öðru máli gegnir um ASIMO, vélmennið sem ekkert hefur látið á sér kræla síðan 2018 en var fjórum árum fyrr kynnt sem það snjallasta af öllum vélmennum.
Á meðal kosta ASIMOS má nefna getuna til að þekkja og greina hluti á hreyfingu (til dæmis bíla), það að geta lesið í líkamsstöðu og líkamstjáningu manna, þekkt hljóð og andlit, átt samskipti við fólk og meira að segja horft í augu þess sem hann talar við!
Það er kannski ekki alveg rétt að ekkert hafi bólað á ASIMO síðan 2018 því í mars á þessu ári kom ASIMO opinberlega fram og tilkynnti eigið „andlát“ ef svo má að orði komast.
Honda mun einbeita sér að bottum sem hafa hagnýtt gildi en að sjálfsögðu kemur öll þekkingin sem varð til í kringum ASIMO-árin að gagni og má í raun segja að ASIMO hafi verið góður grunnur sem lengi má byggja á.
Þar eru búnar til pylsur og VW Golf
Í upphafi minntist undirrituð á pylsur og það er kjörið að halda aðeins áfram í pylsunum.
Síðan 1974 hefur VW framleitt Golf. Síðan 1973 hefur VW framleitt pylsur. Hvort tveggja hefur verið framleitt í verksmiðjunni í Wolfsburg. Og jú, ætli það hafi ekki selst ívið fleiri pylsur en VW Golf.
Raunar hætti Volkswagen framleiðslu á vinsælustu vöru sinni (að bílum meðtöldum) í fyrra (2021) og það var Currywurst – pylsan sem var meira að segja með eigið partanúmer: 199 398 500 A.
Hvort til standi að hætta öllu pylsustússi veit ég nú ekki en margir voru ósáttir þegar VW Currywurst sagði bless í ágúst 2021 eftir 48 ár í framleiðslu!
Árið 2018 voru framleiddar tæplega 7 milljónir Currywurst og á hverju ári frá 2013 til 2018 framleiddi VW fleiri pylsur en ökutæki.
En það eru fleiri bílaframleiðendur en VW sem hafa sniglast í kringum eldhúsið. Peugeot framleiðir piparkvarnir og hefur gert frá því átjánhundruðogeitthvað.
BMW framleiddi potta og pönnur – ekki bara olíupönnur – og alls kyns áhöld til eldamennsku eftir seinna stríð.
Úr eldhúsinu í rússíbanann
Það er svo margt sem mætti nefna hér en þetta er nú bara sýnishorn (verst að geta ekki smakkað Currywurst…) af furðulegheitunum. Fyrst við komumst út úr eldhúsinu er ekki úr vegi að nefna í blálokin að Ferrari hefur eitthvað haft með rússíbana að gera og Maserati framleiðir bíl fyrir hestaflamanninn og hnakk fyrir hestamanninn.
Fleira áhugavert um bílaframleiðendur:
Ford og færiband kjötvinnslunnar
Örlög gömlu Packard verksmiðjunnar
Vefstóllinn sem lagði grunninn að smíði milljóna bíla
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
