Mazda 929 söluhæsti bíllinn 1975

Ég man eftir henni. Tveir slíkir fjölskyldubílar voru í eigu foreldra minna og allavega einn í eigu föðurbróður míns.  Þetta voru geggjaðir bílar.  Fyrsta minningin af Mazda hjá mér var þegar ég fékk að fara með föður mínum að sækja splunkunýjan Mazda 616, hvítan að lit í Mazda umboðið Bílaborg sem var að Hverfisgötu 76.  Þetta var árið 1972.

Mazda 929 Coupe árgerð 1973-1975. Mynd: Carinfo.
Segja má um föður minn að hann hafi haft mikinn bílaáhuga.  Löngu áður en ég kom til sögunnar í fjölskyldunni hafði hann haft að markmiði að eiga „góðan“ bíl sem ekki þyrfti að gera við.  Því var skipt um bíl með stuttu og jöfnu millibili.
Mælaborðið í Mazda 929 Coupe árgerð 1977 var ótrúlega flott, rúnnað með hnotulíki, gírstöngin stutt og þótti sérlega vel staðsett og bíllinn sagður með einstaklega þægilegri gírskiptingu.
Mælaborð úr Mazda 929 árgerð 1974. Mynd: Pakwheels.com.

Næsta minning er frá 1973 en þá eignaðist fjölskyldan enn og aftur splunkunýjan Mazda 929 brúnan að lit. Bílaborg var með standsetningu í bakhúsi við Ármúla 7.  Þar var haldin bílasýning þar sem fest voru kaup á þessum eðalbíl. Það var einfaldlega gengið frá kaupunum á staðnum, bíllinn pantaður á sýningunni og sölumaðurinn skrifaði bara niður nafnið á pabba, litinn og dyrafjölda á lítinn miða. Innrétting og allur frágangur í þessum bílum var til fyrirmyndar og sætin úr þrælflottu flauelsefni. Í standsetningunni týndust lyklar bílsins og því tafðist afhending bílsinum um nokkrar vikur.  Fjölskyldan bjó í göngufæri við Ármúla og ég man eftir að hafa heimsótt þá í standsetningunni á nánast hverjum virkum degi til að skoða bílinn og finna í honum lyktina.  

Takið eftir línunni á hliðargluggunum.  Þar var enginn gluggapóstur sem þótti sérstaklega flott hönnun. Mynd: Carinfo.

Í Lesbók Morgunblaðsins frá árinu 1974 segir Gísli Sigurðsson í grein um reynsluakstur á 3 dyra Mazda 929 hardtop:

„En engar rósir eru án þyrna og kemur þá að því sem ég tel, að miður hafi heppnazt. Ekki vil ég segja, að ytra útlitið sé ljótt, en mér finnst að svona skemmtilegur bíll hefði átt betra útlit skilið.  Það er svo sem hvorki fugl né fiskur, en talsvert mið virðast teiknararnir hafa tekið af þeim smábílum, sem amerísku verksmiðjurnar framleiða í útibúum sínum í Evrópu“.
Mada 929 Coupe var seld undir nafninu Mazda RX-4 í Japan og þótti stór bíll á þeirra vísu. Þeir bílar voru framleiddir með Wankel vél.

Japanskir bílar voru á þessum árum að ryðja sér til rúms á mörkuðum og hafði Mazda slegið í gegn Bandaríkjunum með wankel mótorum í bílum sínum þar en áhuginn þvarr í olíukreppunni á áttunda áratugnum.

Mazda 929 var þægilegur bíll.  Gott að sitja í honum og menn töluðu um hversu þægilegt var að aka bílnum. Í lýsingu á 1974 módelinu á Mazda 929 stendur að undir lægsta punkt séu 17,5 cm., 110 hestafla vél og þyngdin um 1035 kg. með afturhjóladrifi.

Hér sjáum við Mazda 929 árgerð 1976-1977 en þá hafði hún fengið smá andlitslyftingu eins og sjá má á grillinu.
Fallegur blár Mazda 929 frá 1973-1975.

Andlitslyfting 1976

Árið 1976 fékk bíllinn andlitslyftingu og var meðal annars grillinu breytt og fjöðrun endurbætt. Þá var bíllinn með sjálfstæðri fjöðrun að framan og demparar voru færðir út en fjaðradempun að aftan.  Um þetta leiti voru bílar að koma með radial dekkjum sem þótti mikil bylting.  Í radial dekkjum er barðinn heill en ekki með hliðum og toppstykki.  Ekki þótti mönnum eins gott að aka á slíkum hjólbörðum á malarvegum.

Árið 1976 hafði bílaumboðið Bílaborg flutt sig um set upp í Borgartún29. Þar fékk fjölskyldan afhentan spánýja fjögurra dyra Mözdu 929 græna að lit.  Sætin með sömu flauelsáferðinni og græn að lit ásamt allri innréttingu bílsins. Seint gleymist mér það að ég var í vist á Flateyri sumarið 1976 og foreldrar mínir komu til mín í heimsókn. Á Ísafirði var farið í kaffi til ættingja og þá vildi ekki betur til en að lyklarnir læstust inní í Mözdunni og hún í gangi. Fljótt var brugðist við og hringt var suður til Reykjavíkur þar sem aukalyklar voru snarlega settir í umslag og brunað með þá út á Reykjavíkurflugvöll.

Þar vildi svo til að Fokker vél Flugfélagsins var að fara vestur á Ísafjörð og voru auka lyklarnir komnir í hendur föður míns um klukkutíma eftir að aðal lyklarnir læstust inni í bifreiðinni.

Í áðurnefndri grein segir Gísli Sigurðsson meðal annars:

„Plast getur vissulega átt rétt á sér á einstaka hlutum, en hitt er svo ef til vill vafasamara, þegar farið er að nota plast til að líkja eftir harðviði í brezkum yfirstéttarbílum.  Stýrið í Mazda 929 er úr slíkum dáindisviði og mælarnir í mælaborðinu eru innfelldir í hnotu – úr plasti.“
Mazda 929 Legato var í framleiðslu frá 1977 til 1981 og þótti kubbslegur í útliti. Mynd: Wikipedia.

Gildismat breytist í takti við nýjustu strauma bæði í tækni og tísku.  Mikið vatn hefur runnið til sjávar síðan þessi texti var skrifaður en notkun á plasti í bílaiðnaði hefur margfaldast síðan á áttunda áratugnum ef svo má að orði komast.

Segir svo ekkert af næstu 929 fyrr en árið 1978 en þá keypti föðurbróðir minn Mazda 929L eða Legato.  Sá bíll var talsvert breyttur frá fyrri módelum, stærri og mun meiri bíll.  Mazda 929L var framleiddur frá 1977 til 1981 en kom þá aftur í nýrri og gjörbreyttri útgáfu.  Mazda 929 Legato var kubblaga bíll en afskaplega virðulegur og sérlega flottur að innan með plussáklæði á sætum.  Hann var talsvert stærri en forverinn.

Ökukennari á sportbíl

Árið 1982 fór undirritaður í ökunám.  Í gamla daga var venja að fjölskyldan hefði nokkurskonar „hirð-ökukennara“ og okkar fjölskylda hafði einn slíkan. Guðmundur G. Pétursson ökukennari var þessi maður í okkar fjölskyldu.  Hann kenndi á Mazda 929 hardtop, einum flottasta bílnum á götunni á þessum árum.

1982 kemur Mazda 929 Coupe hardtop eða Mazda 929 Cosmo. Þessi bíll er í sama lit og ökukennarinn Guðmundur G. Pétursson kenndi á.
Einstaklega flottar línur á Mazda 929 Cosmo. Takið eftir framúrstefnulegum felgunum.
Mazda 929 Cosmo var þessi bíll kallaður í Evrópu og naut mikilla vinsælda. Bíllinn var eins og úr framtíðinni hvað hönnun varðar.  
Mælaborðið fannst manni eins og gæti verið í geimskutlu.
Innréttingin í Mazda 929 Cosmo var hin glæsilegasta og sætin flott og þægileg. Þessi mynd er af 1986 árgerð.
Mazda 929 Sedan sennilega módel 1982.
Mælaborðið í Mazda 929 Sedan bíll 1986 módel.
Auglýsing frá Bílaborg, Smiðshöfða 23 frá árinu 1982.

Mælaborðið var eins og maður ímyndaði sér að væri í geimskutlu og sætin sérlega nýtískuleg og áklæðið úr mjúku plussi. Kennslubifreiðin sem ég lærði á var hins vegar ekki með vökvastýri og man ég sérstaklega eftir því  hve þungur bíllinn var í stýri.  

Eins og lesa má á greinum bílagagnrýnenda á áttunda áratugnum voru bílar eins og Mazda að sanna sig á markaðnum og menn báru þá saman við sambærilega bíla frá Evrópu og Bandaríkjunum. Japanir hafa sýnt og sannað að gæði bílaframleiðslu þeirra hefur staðist tímans tönn og náð yfirhönd á mörgum sviðum á undanförnum áratugum.

Sett inn
20/1/2020
í flokknum:
Fornbílar

Fleiri fréttir úr flokknum:

Fornbílar

skoð allt

Skráðu þig á póstlistann okkar
Fáðu nýjustu greinarnar í pósthólfið þitt

Thank you! Your submission has been received!
Oops! Something went wrong while submitting the form.