Hinn nýi Renault 4 kemur 17. október
Renault endurheimtir hinn goðsagnakennda fjölskyldubíl sinn en nú með rafmagni
Á bílasýningunni í París 2022 verður mögulegt tað skoða væntanlegan Renault 4 í fyrsta sinn. Eftir tveggja ára hlé er sýningin að snúa aftur í þessum mánuði og má segja að marki upphaf á „endurfæðingu“ á þessu franska bílanafni.
Renault hefur sent frá sér nægilega mikið af kynningarefni til að ljóst sé að nýi 4 muni líkjast forveranum í útliti.
Bíllinn sem frumsýndur verður í París 17. október verður þó ekki endanleg útgáfa, heldur hugmyndabíll sem gefur skýrar vísbendingar um hugsanlega framleiðslugerð.
Á svipaðan hátt og R5 Turbo 3E – annar Renault sýningarbíll sem mun birtast í París, gæti Renault 4 sem sýndur er í París haft einhverja mótorsport eiginleika. Renault segist „gleðjast með yngri kynslóðum sem fagna 25 ára afmæli 4L Trophy keppninnar“. 4L Trophy keppnin er venjulega með Renault 4 bílum með ljóskösturum á þaki, undirvagnsplötum og stórum dekkjum.
Af skyggðu kynningarmyndinni getum við séð útlínur sýningarbílsins að framan. Hagnýtur kassi á þakinu sést vel, sem og stafrænu hliðarspeglarnir, upphækkuð fjöðrun og breiðari hjólaskálar.
Einnig má sjá rétthyrnt grillið með kringlótt aðalljós – vísun til upprunalega Renault 4 sem við gerum ráð fyrir að framleiðslubíllinn fái að láni.
Renault 4 sem við getum búist við að sjá á þjóðvegum verður mun hefðbundnari bíll. Eins og gamli 4, verður hann fjölhæfur hlaðbakur, en með rafmagni – byggður á CMF-BEV grunni, þeim sama og fyrri bílar Renault sem aðeins nota rafhlöður. Rafbíll í „retró-stíl“ mun bætast við endurvakinn Renault 5 í rafmagnslínu franska framleiðandans.
Upprunalegur Renault 4 var með framleiðslutíma sem spannaði 31 ár og á þeim tíma seldust meira en átta milljónir. Hann var hannaður til að bregðast við Citroen 2CV til að bjóða upp á einfaldan, hagnýtan og ódýran flutningsmáta fyrir vaxandi fjölda bílaeigenda á sjöunda áratugnum.
Á síðasta ári kynnti Renault nýjan hugmyndabíl sem kallast „AIR4“ með aðstoð frá farsímafyrirtækinu TheArsenale. Hann var smíðaður til að fagna því að 60 ár eru liðin frá því Renault 4 kom á markað. Yfirbygging AIR4 er íanda upprunalega Renault 4, en með LED framljósum og ávalara útliti. Gera má ráð fyrir að rafknúni framleiðslubíllinn snúi aftur til gamla bílsins líka, en kannski ekki alveg eins mikið og AIR4 eða jafnvel væntanlegur rallý-sýningarbíll.
Myndir af fyrirhugaðri hönnun Renault 4 hafa einnig sést á veraldarvefnum, sem og ný útgáfa af Renault lógóinu með númerinu 4, sem rennir stoðum undir sögusagnir um að framleiðslumódel sé á leiðinni.
Miðað við þessar myndir mun Renault 4 halda fjölmörgum hönnunaratriðum upprunalega bílsins; hann deilir kassalögun klassíska bílsins, kringlóttum framljósum og uppréttum framendanum.
Nýr Renault 4 er liður í sókn framleiðandans í átt að rafvæðingu; Renault hefur þegar sett á markað glænýja, hrein-rafmagnaða Megane og segir að fyrirtækið muni kynna alls 10 nýja rafbíla fyrir árið 2025 – þar á meðal nýjan Scenic árið 2024. Sjö þeirra verða Renault og hinir þrír líklega Alpine-gerðir, þar sem sportbílamerkið færist yfir í fulla rafvæðingu frá 2024.
Renault telur að það verði með grænustu sölusamsetningu í Evrópu um miðjan þennan áratug, þegar yfir 65 prósent af vörulínunni verða rafknúin að hluta eða fullu. Og það segir að allt að 90 prósent af gerðum þess verði alrafmögnuð árið 2030.
Framkvæmdastjóri vörumerkisins, Luca De Meo, staðfesti nýlega við Auto Express að fleiri gerðir í framtíðarlínunni myndu sækja innblástur til gerða fortíðar eftir góðar viðtökur á Renault 5 frumgerðinni. „Það hafa svo margar vörur slegið í gegn í sögunni, svo það væri leitt að tengjast ekki aftur þeirri löngu sögu og hefð.“
„Við erum ekki hér til að horfa aðeins í baksýnisspegilinn, við erum hér til að finna upp hlutina á ný og ég held að Renault 5 sé gott dæmi,“ sagði De Meo. „Margir spyrja af hverju ég vilji hönnun sem vísar til fyrri tíma en þetta er ekki þannig hönnun, þetta er bara enduruppgötvun hugmyndar. Á safninu okkar höfum við fullt af hlutum sem við getum fundið upp á ný.“
Nýr Renault 4: grunnur og aflrás
Þegar upprunalegi R5 var sett á markað fékk hann vélbúnaðinn að láni frá R4. Að þessu sinni er þó búist við að hlutverkunum sé snúið við. Búist er við að væntanlegur Renault 4 muni nota sama CMF-BEV grunn og hlaðbakurinn til að hjálpa til við að halda kostnaði niðri.
Renault hefur gefið í skyn að hámarksdrægni sé 400 km fyrir bíla sem nota CMF-BEV grunninn, sem hefur verið hannaður sérstaklega fyrir ódýra, litla rafbíla og kemur með stöðluðum 134 hestafla rafmótor.
Hefð er fyrir að R4 hafi verið verðlagður aðeins undir R5, en þar sem kostnaður við tæknina er sá sami þá má búast við að Renault stefni að svipuðu verði fyrir „retró-tvíbura“ sína. Renault gefur í skyn að verðið sé undir 3,3 milljónum króna fyrir R5, .
Ef hugmyndinni verður vel tekið gæti De Meo gefið grænt ljós á að bíllinn fari í sölu skömmu eftir frumsýningu á nýja 5, sem þýðir að fyrsta afhending gæti orðið seint á árinu 2023 eða snemma árs 2024.
