Hvernig ætli Steven Spielberg tækist að skapa eitthvað í líkingu við einn stórkostegasta bílaeltingarleik kvikmyndsögunnar? Það kemur að öllum líkindum í ljós hvort hann hafi auga fyrir bílaatriðum ef fer sem horfir. Hann er nefnilega orðaður við framhald myndarinnar Bullitt. Já, Spielberg mun leikstýra myndinni.
Bullitt með Steve McQueen kom út árið 1968. Myndin er talin innihalda einn stórkostlegasta bílaeltingarleik kvikmyndasögunnar (af þeim sem ekki hafa séð Löggulíf sko).
Svo ég vitni nú í grein sem birtist hér á Bílabloggi um mestu bílaslátranir kvikmyndasögunnar (reyndar skrifaði ég þá grein sjálf, en hvað um það) en þar er lýsing á upplifun ungrar manneskju þegar hún horfði á Bullitt í fyrsta skipti:
„Man ég hversu spenntur pabbi heitinn var þegar við komum heim af vídeóleigunni, sigri hrósandi, með sjálfa Bullitt. „Malla, nú færðu sko að sjá alvöru bílamynd! Allt annað er bara prump í samanburði,“ sagði hann og var eins og krakki á jólum; svo spenntur að sjá á mér svipinn þegar meistarverkið byrjaði að rúlla.
Munnurinn á mér opnaðist. Og ég gapti frá upphafi myndar til enda.
„Var þetta ekki æðislegt?“ spurði hann mig, steinrunninn krakkann, sem sagði loks: „En allir þessir fallegu bílar pabbi. Þeir eru ónýtir…,“ sagði ég döpur og steindrap stemmninguna.
Já, það var nokkuð til í því enda var gert út af við rúmlega 80 bíla í Bullitt en í staðinn fengum við, áhorfendur, einn magnaðasta bílaeltingarleik kvikmyndasögunnar. Atriði sem, tjah, horfa má á aftur og aftur og aftur. Lifi YouTube! Gengur mun hraðar fyrir sig en að spóla slitinni vídeóspólu aftur og aftur til baka.“
Jæja Spielberg, þetta eru hvorki geimverur né hákarlar
Þá er komið að Spielberg að sýna hvað í honum býr. Hann er auðvitað þekktur fyrir magnaðar myndir en… þetta er sko Bullitt. Mál málanna!
Fyrir E.T., Jurassic Park, Jaws, Saving Private Ryan, Indiana Jones og alls konar merkilegt má þakka Spielberg. Í sumum þessara mynda eru varla bílar; hvað þá kappakstur! En nú er komið að honum. Eða þeim báðum: Spielberg og kappakstrinum.
Það var víst vefur sem nefnist Deadline Hollywood sem fyrstur greindi frá því að Spielberg myndi að leikstýra myndinni en ég sá þetta á vef Autoblog og þá frétt má lesa hér.
Þar kemur meðal annars fram að ekki sé um endurgerð myndarinnar að ræða heldur sjálfstætt framhald um persónuna Frank Bullitt sem Steve McQueen lék í upprunalegu myndinni.
Í frétt Autoblog er einn virkilega góður punktur og hann er sá að bílaatriði myndarinnar er grundvallaratriðið í öllu heila klabbinu. Því í upprunalegu myndinni sé söguþráðurinn óheyrilega langdreginn og ef ekki væri fyrir bílaatriðin góðu í San Francisco – upp og niður þær ótrúlegu brekkur með tilheyrandi hoppi og skoppi – þá væri myndin kannski ekki sérlega eftirminnileg.
Bílakarl er hann samt
Reyndar væri algjör óhæfa að taka ekki fram að Spielberg er víst nokkur bílakarl. Segir í greininni á Autoblog að Spielberg nefni vanishing Point (1971) sem eina af sínum uppáhalds en þar er frekar stappað af bílum.
Auk þess hefur hann haft fyrir því að finna mjög áhugaverða bíla til að nota í myndum sínum og eru þar nefndar myndirnar Bridge or Spies (þar er Volvo P1800) og Duel en sú síðarnefnda er ein af fyrstu myndum karls og þar er Plymouth Valiant í aðalhlutverki í 90 mínútna löngum bílaeltingarleik.
Það kemur svo í ljós hvort söguhetjan muni aka um á Ford Mustang.
Þessu alveg náskylt:
Mestu bílaslátranir kvikmyndasögunnar
Besta bílaatriði íslenskrar kvikmyndasögu?
Þar er sú hlykkjótta – Ekið um San Francisco
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
