Sjálf er ég mikill „plötuspilari“. Það er að segja manneskja sem hefur gaman af að setja góða plötu á fóninn. Þó hef ég enn ekki gerst svo fræg að eiga bílaplötuspilara. Þeir urðu kannski ekkert svakalega vinsælir hér á landi en vissulega voru þeir til.
Þegar ég var lítil sagði faðir minn heitinn mér frá bílaplötuspilaranum sem hann var með í bílnum sínum í gamla daga. Fyrst hélt ég að hann væri að sprella í mér því í mínum eyrum hljómaði þetta álíka ruglað og að segjast vera með píanó í bílnum.
En svo útskýrði hann þetta og jú, þá skildi ég aðeins betur rispurnar á sumum „litlu“ plötunum, eins og ég kallaði 45 snúninga plöturnar. Pabbi átti flestar Bítla- og Stonesplöturnar sem fengust 45 snúninga en þær hefur hann passað sérlega vel upp á því margar eru þær alveg órispaðar með öllu. Swinging Blue Jeans, Kinks, Hollies og fleira og fleira hefur eflaust ratað á fóninn í bílnum.
Virkuðu þokkalega
Mig minnir að pabbi hafi sagt að bílaplötuspilarinn hans hafi virkað ágætlega. Lítið hafi verið um hökt og nálarhopp, en hljómgæðin í græjunum verið fremur slök. Minnir mig.
Einhverja kagga var víst hægt að kaupa með innbyggðum spilurum og í Bandaríkjunum kom „Highway Hi-Fi“ spilarinn fyrstur og fékkst hann sem aukabúnaður t.d. Í 1956 árgerðum af ákveðnum gerðum Chrysler, Desoto, Dodge, og Plymouth.
Annars var algengara að fólk keypti bílaplötuspilara sem var með innbyggðan hátalara eða sem tengdur var við græjur bílsins.
Athyglin oft á plötuspilaranum
Það er kannski ekkert undarlegt að athygli ökumanna hafi beinst að bílaplötuspilaranum því á 45 snúninga plötu voru nú yfirleitt aðeins tvö lög á hvorri hlið og því nóg að gera við að snúa plötum og skipta.
Árið 1960 kom sniðugt tæki á markað: RCA Victrola sem raða mátti 14 plötum í og sá tækið um skemmtunina og bílstjórinn fylgdist með veginum.
Fáir af þessum bílaplötuspilurum virðast vera til sölu á eBay en eflaust eru sérhæfðari safnarasíður sem eiga svona spilara til.
Tengt efni:
5 hlutir úr bílum fortíðar
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
