Í ágústmánuði árið 1984 var opnað tívolí á Melavellinum í Reykjavík. Fjallað var um þann merkisviðburð í blöðunum og þar á meðal í Alþýðublaðinu sem sömuleiðis birti þær myndir er hér fylgja.
Fjölmenni var við opnun tívolísins og sagði eftirfarandi í umfjöllun Alþýðublaðsins:
„Í Tívolíinu eru kókartbílar, klessubílar og tvær gerðir af hringekjum. Ókeypis er inn á svæðið en í tækin kostar frá 30 kr. til 100 kr. Auk þess geta gestir hent boltum í flöskur og göt.“
Klessubílar á kaupleigu
„Flest tækjanna hafa verið keypt til landsins en klessubílarnir eru fengnir hingað á kaupleigusamningi. Hyggjast þeir sem standa fyrir Tívolíinu halda starfseminni áfram og vonast til að borgaryfirvöld úthluti þeim varanlegt svæði undir starfsemina. í haust er ætlunin að hafa opið eitthvað fram í október,“ sagði í Aþýðublaðinu um tívolíið.
Hraktir austur fyrir fjall
Fyrirtækið Kaupland sf. stóð fyrir uppsetningu tívolísins og annaðist rekstur þess. Gestir á Hótel Sögu, sem er í nágrenni Melavallarins, kvörtuðu yfir skarkalanum og sögðust ekki geta sofið fyrir látum frá tívolíinu.
Sigurður Kárason, einn eiganda fyrirtækisins greindi frá því, vorið 1985, að tívoíið yrði flutt alla leið austur fyrir fjall. Bæjaryfirvöld í Hveragerði buðu Kauplandi lóð undir tívolíið og þangað var það flutt eftir árangurslausa leit að lóð í höfuðborginni:
,,Við erum að flýja Reykjavík. Við vorum í allt fyrrasumar á höttunum eftir lóð undir starfsemina. Loks úthlutaði borgin okkur lóð við Framnesen við urðum að hætta framkvæmdum eftir þrjá daga vegna yfirvofandi lögbanns íbúa í nágrenninu,“ sagði Sigurður í viðtali við Dagblaðið Vísi í mars 1985 .
Óblíðar móttökur
?
Fyrst, eins og áður kom fram, var tívolíið á Melavellinum sem gekk ekki nema í stuttan tíma.
„Okkur var svo úthlutað lóð úti í Elliðavogi en eftir að jarðvegsrannsóknir höfðu verið gerðar kom í ljós að of kostnaðarsamt yrði að hefja þar framkvæmdir,“ sagði Sigurður sem var ekki sáttur við borgaryfirvöld eftir allt stappið.
„Ég verð að segja að borgaryfirvöld hafa veri mjög óblíðleg við okkur í þessu máli. Þau hafa verið stíf á öllum framkvæmdum innan þess svæðis sem þau hafa úthlutað okkur og vilja að svona tívolí sé reist á 60 dögum. Það er ekki hægt. Borgin styður við bakið á alls konar íþróttafélögum og það er skömm að því að hún skuli ekki styðja við svona starfsemi,” sagði Sigurður Kárason sem fór með klessubílana, og allt sem tívolíinu tengdist, í Hveragerði.
[Efsta myndin er af klessubílunum í Reykjavík. Ljósmynd/Dagblaðið Vísir]
Það var fleira áhugavert á Melavellinum. Manst þú kannski eftr þessu hérna:
„Hell Drivers“ á Melavellinum 1981
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein