Ford stefnir á að verða kolefnislaus fyrir árið 2050
Ford-fyrirtækið gaf þá yfirlýsingu í dag að það yrði kolefnishlutlaust fyrir árið 2050, markmið sem kemur bílaframleiðandanum í takt við markmið Parísarloftlagssáttmálans. Til að standa við þessar skuldbindingar sínar þarf fyrirtækið að minnka framleiðslu á bílnum sem blása gróðurhúsalofttegundum og finna leiðir til að fjarlægja þá mengun sem þeir hafa nú þegar framleitt.
Bílaframleiðandinn segist ætla að einbeita sér að þremur mikilvægum þáttum sem valda 95% af koltvísýringsmengunlosuninni, þ.e. losun frá ökutækjum sem fyrirtækið framleiðir og losun frá verksmiðjum og birgjum.
Fyrirtækið hefur heitið því að knýja alla framleiðslu sína með endurnýjanlegri orku fyrir árið 2035.
75% af losun koltvíoxmengunar koma frá viðskiptavinum Ford-fyrirtækisins með akstri bíla. Bílarnir sem það selur mynda 135 milljón tonn af koltvísýringi samkvæmt skýrslu um sjálfbærni sem fyrirtækið sendi frá sér.
Það er næstum eins mikið og 35 kolaver framleiða á einu ári. Til samanburðar framleiddu allar Ford-verksmiðjurnar minni koltvísýring en eitt kolaver árið 2019.
Ford hefur náð ágætum árangri í átt að þessum markmiðum, þar sem kolefnislosun frá verksmiðjum fyrirtækisins lækkaði um rúmlega 14 prósent árið 2019. Það er jafn mikið og að taka 138.000 fólksbíla af götunum í heilt ár. Hins vegar jókst samanlögð eldsneytiseyðsla bíla og trukka frá Ford, sem bendir til þess að stærsti mengunarvaldurinn á ennþá langt í land að minnka kolefnissporið.
Bandarísk yfirvöld hafa dregið lappirnar í þessum efnum í forsetatíð Donalds Trump, sem m.a. hefur reynt að draga úr stöðlum varðandi eldsneytisnýtingu. Þessum stjórnarháttum hefur ekki verið fagnað af Ford sem vill sýna lit í umhverfismálum.
Á síðasta ári samþykkti Ford, ásamt Volkswagen, Honda og BMW að bæta eldsneytisnýtingu bíla sinna fram til ársins 2026. Á sama tíma hefur umtalsverður fjöldi lögfræðinga lögsótt Bandaríkjastjórn vegna sleifarlags í loftslagsmálum.
Árið 2018 skuldbatt Ford-fyrirtækið sig til að eyða meira en 11 milljörðum dala í fjárfestingar á rafknúnum ökutækjun til ársins 2022. Þessar skuldbindingar koma á hæla samskonar ákvarðana hjá Volvo og Volkswagen sem setja sér einnig markmið um að verða kolefnishlutlaus fyrirtæki fyrir árið 2050.
„Við teljum að framleiðsla á frábærum ökutækjum og viðhald öflugra viðskiptahátta eigi ekki að vera á kostnað plánetunnar okkar“ segir varaforstjóri Ford og yfirmaður sjálfbærni-, umhverfis- og öryggismála fyrirtækisins, í skýrslu um sjálfbærni.
Heimild: The Verge
