Verður Honda Civic Type R aftur töff?
Minnug þess hve óskaplega flottur bíll og töff Honda Civic Type R þótti einu sinni, getur maður varla ógrátandi skoðað þróunina á útliti blessaðs bílsins. Nú hefur 2023 árgerð þessa magnaða ökutækis verið kynnt og kannski þetta sé í rétta átt?
.jpeg)
Civic þarf ekki að kynna sérstaklega en nokkur orð má hafa um Type R. Hófst framleiðsla í september árið 1997 þegar ég var 16 ára. Þetta þótti manni hrikalega spennandi fyrirbæri! Aðrar gerðir Honda (NSX og Integra) höfðu komið sem Type R og þarna var komið að Civic. Vélin B16B gerði stórkostlegustu hluti og allt var gott.
Mikil einföldun er að segja að bíllinn hafi verið sportútgáfa af Civic en það er samt alveg rétt. Meira um það hér.
Útlislega byrjaði þetta vel – Type R var byggður á sjöttu kynslóð Civic sem var bara í góðu lagi að mínu mati þótt fimmta kynslóðin hafi verið fegurst allra, en það er önnur saga.
_02.jpeg)
Svo gerðist eitthvað ægilega fúlt þegar sjöunda kynslóðin leit dagsins ljós árið 2000 og Type R kom árið eftir í þessum ólánlega skrokki.
Þarna var mér alveg hætt að lítast á þetta og þannig liðu árin og kynslóðirnar komu og fóru. Ekki fríkkaði bíllinn, fannst mér, þannig að í huganum afskrifaði ég Civic og Type R um leið.
Það er auðvitað frekar kjánalegt; að afskrifa skemmtilegan bíl af því að honum var pakkað inn í asnalegar umbúðir. Dálítið eins og að dæma bók eftir kápunni. Jájá, svona er þetta stundum.
_1X7A0088.jpeg)
Núnú, þar sem maður hefur bara lokað augunum vissi ég eignlega ekki af þeim breytingum sem orðið hafa á blessuðum bílnum.
_1X7A0093.jpeg)
Nú er sjötta kynslóð Type R (ellefta kynslóð Civic) á leiðinni og er hún öflugri en nokkru sinni. Og svei mér ef útlitið er ekki aðeins að lagast. Ég gef bílnum séns og horfi kannski frekar á hinn „innri bíl“ ef þetta venst ekki.
Í meðfylgjandi myndbandi eru helstu upplýsingar um þann væntanlega:
Náskylt efni:
Bílarnir sem ég hefði viljað eiga 1998
GTI-bílarnir sem héldu fyrir mér vöku
Vinsælasti bíllinn árið sem þú fæddist
Ég og Renault 5 Gt Turbo
?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
