Uppfærsla á Mercedes GLE

Uppfærsla á Mercedes GLE

Andlitslyfting á GLE uppfærir sportjeppann og Coupe sportjeppann fyrir árið 2023

Breytingar þvert á línuna heldur Mercedes GLE bílunum betur uppfærðum í harðri samkeppni meðal dýarir gerða sportjeppa

Mercedes GLE er að fá endurnýjun.

Í framhaldi af nýja GLC og á undan uppfærða GLS sem væntanleg er síðar á þessu ári hefur GLE fengið röð af uppfærslum til að hjálpa honum í baráttunni gegn öðrum hágæða stærri sportjeppum.

Nýju GLE gerðirnar eru væntanlegar til söluaðila frá og með júlí 2023.

Frá því núverandi GLE kom á markað árið 2019 hefur nýr Range Rover Sport komið á markaðinn sem og uppfærðar útgáfur af Alfa Romeo Stelvio og Maserati Levante.

Audi Q7 og BMW X5 munu einnig fljótlega fá andlitslyftingar á miðjum líftíma, sem þýðir að þessi endurskoðaði GLE er frekar tímabær í komu sinni, segir vefur Auto Express.

Hvað hefur breyst? Hér er um að ræða lagfæringar á öllum sviðum með áberandi uppfærslum, þar á meðal nýju úrvali af dísilgerðum með 48 volta mildu tvinnkerfi Mercedes og nýjum tengitvinnbílum.

MBUX upplýsinga- og afþreyingarkerfið státar nú af endurbótum og Mercedes hefur gert ráðstafanir til að bæta hæfni í torfærum og dráttargetu með nýrri tækni.

Breytingar í hönnun

Andlitslyfting væri ekki andlitslyfting án þess að fikta í stuðara, grilli og framljósum, svo Mercedes hefur bætt við krómi á grillið, endurmótað framstuðarann og breytt ljósabúnaði á staðalgerð LED aðalljósa.

Afturljósin fá einnig nýtt útlit og á GLE Coupe gerðum hefur AMG Line ytra byrði verið gert að staðalbúnaði með dýpri stuðara, demantsgrillimynstri og breiðari hjólaskálum.

Að innan birtist nýjasta stýrishönnun Mercedes, með snertistýringum sem veita aðgang að miðlægum skjáaðgerðum án þess að þurfa að teygja sig yfir á skjáinn sjálfan.

Það er meira króm á loftopunum og nokkrar nýjar litasamsetningar eru nú fáanlegar.

Uppfært MBUX upplýsinga- og afþreyingarkerfi

Auk þessa fær nýr Mercedes GLE nýjustu útgáfuna af MBUX upplýsinga- og afþreyingarkerfinu sem færir fleiri stjórntæki yfir á tvo 12,3 tommu skjái.

Hægt er að velja um „klassískt“, „sportlegt“ og „sérsniðið“ yfirbragð á skjá ásamt viðbótarstillingum sem setja mismunandi upplýsingar í forgang á skjánum.

Þráðlaus Apple CarPlay og Android Auto eru nú staðalbúnaður og GLE er fær um að taka á móti þráðlausum hugbúnaðaruppfærslum.

„Torfæruhamurinn“ í MBUX kerfinu sýnir aukaupplýsingar, þar á meðal halla, veltihalla og stýrishorn til að aðstoða ökumenn.

Þegar því er blandað saman við bílastæðapakkann er líka 360 gráðu myndavél sem skapar áhrif eins og „gagnsæja vélarhlíf“ á skjáinn, sem gefur betri sýn á það sem er beint fyrir framan bílinn.

Þessar uppfærslur eru hannaðar til að auka getu GLE í erfiðum akstursaðstæðum og veita honum svar við svipaðri tækni á keppinautum Land Rover og Range Rover.

Í útgáfum sem eru eingöngu með brunahreyfli er hægt að tilgreina torfærupakkann sem bætir við loftfjöðrun, undirvagnssvörn og 30 mm auka hæð undir bílinn.

Mercedes hefur meira að segja kynnt GLE með dráttargetu upp á 3,5 tonn (eftirvagn með hemlum) í gerðum með loftfjöðrun og „E-Active Body Control“-kerfi.

Þetta er stutt af uppfærðum hugbúnaði fyrir stýrikerfaaðstoð sem jafnvel skipuleggur „kerruleiðir“ í leiðsögukerfinu til að hjálpa ökumönnum að forðast erfiðar leiðir.

Uppfært framboð véla

Með þessari andlitslyftingu er allt framboð véla í GLE og GLE Coupe nú rafvætt.

Með allar gerðir með 4MATIC fjórhjóladrifi geta kaupendur valið á milli 375 hestafla, GLE 450 bensínvelar eða nýju 300d og 450d dísel, milda blendinga með 265 hestöfl og 361 hestöfl í sömu röð.

Þá má nefna tengitvinnbílana sem báðir bjóða upp á meiri drægni þegar eingöngu er notað rafmagn og aukið afl.

GLE 400 e er með 276 hestafla samsett kerfisafköst og glæsilega rafmagnsdrægni samkvæmt WLTP, sem er allt að 105 km.

350 de dísil-tengitvinngerðin hefur samtals 241 hestöfl í boði, meira tog (750Nm í stað 600Nm í 400 e) og sömu rafdrægni.

Mercedes-AMG GLE gerðir

Að öllu ofangreindu á aðeins eftir kynna hinn öfluga Mercedes-AMG GLE, bíl sem samanstendur af GLE 53 með 3,0 lítra forþjöppu, 3,0 lítra sex strokka línuvél og GLE 63 S með tveggja túrbó 4,0 lítra V8.

53-bíllinn dælir út 429 hestöflum og tog er aukið í 560Nm með möguleika á 200Nm aukningu.

Hann mun ná 0-100 km/klst á 5 sekúndum.

Hinn öflugi 63 S er með 603 hestöfl með sömu auka aflhækkunarmöguleika og 53-bíllinn og 850Nm togi sem hægt er að auka um 250Nm.

Þessi gerð er 3,9 sekúndur að skila 0-100 km/klst.

AMG afbrigðin fá sínar eigin hönnunarbreytingar, þar á meðal AMG merki í stað þríhyrningsstjörnunnar, með uppfærslu á búnaði líka.

AMG „Performance“-fjöðrunarkerfið hefur fengið smá fínstillingu til að bæta akstursupplifunina.

(grein á vef Auto Express – myndir frá Mercedes)