Sportbílasafn höfuðpaurs í stórum fíkniefnahring var gert upptækt árið 2020 eftir að bófinn var handtekinn. Hafði ódámurinn notað ágóða fíkniefnasölunnar til kaupa á 37 sportbílum. 29 þeirra voru boðnir upp fyrir skemmstu; þar af 13 sérútgáfur af Toyota Supra.
Bílaáhugamenn geta víst líka verið durtar og það er nú bara eins og það er. Það sem er sérstakt við mál þessa tiltekna þorpara er að hann féll frá skömmu eftir að upp komst um allt heila klabbið (fíkniefnasölu og fleira misjafnt).
Nú, tæpum tveimur árum síðar, hefur stærstur hluti bílasafnsins loks verið seldur á uppboði eftir miklar lagaflækjur og almenn leiðindi.
Illa fengið fé en fallegir bílar
Það er hlýtur að vera erfitt að leiða hjá sér þá staðreynd að bílarnir voru jú keyptir fyrir illa fengið fé, ólöglegan gróða eða hvaða nöfnum sem við nefnum það. En sem betur fer var ekki haldin bílabrenna heldur fengu safnarar tækifæri til að bjóða í þessi fágætu ökutæki.
Cory Taylor hét glæpamaðurinn. Hann var 41 árs þegar hann var gómaður og átti hann svo gott sem einn sportbíl fyrir hvert ár sem hann hafði verið til. Bílana geymdi hann í gamalli slökkvistöð sem Taylor hafði breytt í svakalegt glæsihýsi. Að utan var það ekkert spes en annað blasti við þegar inn var komið.
Þegar lögregla fann slotið eftir af hafa leitað í heila viku, kom í ljós að þar var allt fullt af dollurum, bílum og dópi. Jú og einn einmana köttur hafðist þar við.
Hvernig Cory Taylor dó og hvað hann gerði eða gerði ekki verður ekki rakið en um það má lesa t.d. hér.
The Fast and the Furious kynslóðin
Toyota Supra virðist hafa verið í uppáhaldi en Taylor átti þrettán stykki af fjórðu kynslóð þeirrar gerðar. Kynslóðin sem margir tengja við The Fast and the Furious kvikmyndirnar. Uppboðshaldarinn Stanley Paine bauð bílana upp þann 4. júní og samtals fengust 240 milljónir króna fyrir „Suprurnar“ 13.
Hæsta boðið var í 1998 árgerðina (ek. 37.000 km) en seldist hún á 35 milljónir króna. Bílasafnari frá Kaliforníu gerði þennan ljómandi góða díl og á núna þennan líka fína sportara.
Næsthæsta boðið var í 1993 árgerðina (ek. 13.000 km) eða rúmar 30 milljónir króna.
Þessar ágætu Toyotur eru lítið eknar og það þykir alltaf gott þegar Toyotur í fornbílaflokki eru boðnar upp í Bandaríkjunum. Þar er hreinlega slegist um svona bíla eins og fjallað var um hér á Bílabloggi fyrir stuttu (hlekkur neðst).
Þó svo að Toyota Supra hafi verið aðalatriðið í þessari stuttu umfjöllun þá má nefna nokkra bíla til viðbótar úr safni Taylors sem boðnir voru upp á sama tíma:
Tveir Nissan 350z, tvær Honda S2000, tveir MMC Lancer Evolution, Acura Integra, BMW M4, og sjö BMW M3.
Og ekki má gleyma John gamla Deere traktornum sem af einhverjum ástæðum var á meðal sportbílanna.
Hér má sjá lista yfir bílana 29.
Af Toyotum í Vesturheimi og víðar:
Slegist um gamlar Toyotur vestanhafs
Gleymdu Toyoturnar: Óhreyfðar síðan 1974
Toyota-kirkjugarðurinn á hafsbotni
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein