Koji Sato, verðandi forstjóri Toyota, verður að fara yfir í hreina orku
Undir stjórn Akio Toyoda hefur bílaframleiðandinn fylgt hægfara nálgun á rafbílum
TOKYO – Reuters – Koji Sato, sem á fimmtudaginn var útnefndur framtíðarforstjóri japanska bílaframleiðandans Toyota Motor Corp, er verkfræðingur með bakgrunn í dísilvélum sem mun fá það verkefni að stjórna umskiptum fyrirtækisins yfir í hreina orku.
Sato, sem er forstjóri lúxusvörumerkis Toyota – Lexus, mun taka við af Akio Toyoda sem forstjóri Toyota 1. apríl.
Undir stjórn Akio Toyoda hefur bílaframleiðandinn fylgt hægfara nálgun rafknúinna farartækja og haldið því fram að tvinntæknin sem hann var brautryðjandi í með Prius verði áfram mikilvæg ásamt fjárfestingum í vetni.
Sato lærði um díselvélar í háskóla og gekk til liðs við Toyota í von um að „leggja sitt af mörkum til samfélagsins með því að skapa framtíð dísilvéla,“ að því er fram kemur í viðtali á vefsíðu Gazoo, bílasportvörumerkis Toyota.
Þrátt fyrir að þessi 53 ára gamli verkfræðingur hafi haft umsjón með framleiðslu fyrstu rafknúnu gerðar Lexus, hefur hann einnig talað um að halda öðrum möguleikum opnum varðandi orkugjafa.
Hann talaði um möguleika vetnis á síðasta ári í Taílandi, þar sem Toyoda reynsluók sjálfur vetnisknúnum Toyota kappakstursbíl á braut.
Sato, til vinstri ásamt Akio Toyoda fráfarandi forstjóra Toyota í ökuferðinni í Taílandi.
„Vetni mun náttla ekki koma í stað rafknúinna farartækja strax, en það er gott fyrir fólk að vita að það eru aðrir kostir í boði þegar fjölgun rafbíla er í hámarki,“ sagði Sato þegar rætt er um vetnisknúin farartæki.
Sato hóf feril sinn hjá Toyota árið 1992, áður en hann varð yfirverkfræðingur Lexus International árið 2016.
“Iðnaðurinn sjálfur stendur frammi fyrir meiriháttar breytingum einu sinni á öld, og það er margt óljóst núna varðandi rafmagnið til dæmis,” sagði John Shook, fyrrverandi Toyotastjóri sem nú snýr sér að ráðgjöf tengdri stjórnunarstíl Toyota en hann var einmitt frumkvöðull þeirrar stefnu.
„Ég get ímyndað mér að Akio hafi talið að nú sé kominn tími til að breyta til svo eftirmaður hans geti stýrt skipinu í gegnum óvissuna sem fram undan er.”
Sato hefur gegnt stöðu forseta Lexus International og Gazoo Racing Company síðan 2020.
„Bílafyrirtæki lifa og deyja með framleiðsluþróun sinni. Við stöndum frammi fyrir því að bílar Toyota eru að breytast”.
Að byggja upp vörumerki í þessum nýja heimi, þessi nýja tegund drifs (…) er lykilatriði,” bætti hann við.
Í frítíma sínum nýtur Sato þess að heimsækja musteri í Kyoto og stundar japanskar teathafnir, samkvæmt upplýsingum frá Gazoo vefsíðunni. Hann ekur Toyota Supra sem tengdafaðir hans átti áður.
Ein helsta ástæða þess að Sato var kjörinn arftaki, var ást hans á að búa til bíla, sagði Toyoda í opinberu tilkynningunni sem var send út á netinu.
Þessi ástríðu var augljós í stuttu myndbandi sem var birt árið 2021, þar sem Sato situr við hlið Toyoda þegar þeir prufukeyra Lexus. Þegar Toyoda gefur inn, sést Sato með breitt glott og hlær af og til. Greinilega ánægður með yfirmann sinn.
Umræður um þessa grein