Í Toyota Tacoma er gert ráð fyrir fimm manns. Bílstjóra og í mesta lagi fjórum farþegum. Það skýrir þó ekki af hverju í honum eru allt að 13 glasahaldarar! Eru bílahönnuðir í glasi eða hvað?
Hvað segirðu? Bara 13? Það er nú ekki neitt! Í sumum eru alveg 19 glasahaldarar. Eru þeir ómissandi? Ég get alveg fallist á að það er snjallt að hafa glasahaldara í bílum. Jafnvel einn á hvern þann sem í bílnum rúmast. En þegar þeir eru orðnir þrír á hvern einn og einasta þá skil ég ekki neitt í neinu.
Lítum aðeins á málið frá sjónarmiði ættuðu úr heimi þorstans; Vesturheimi.
Þar ver meðalmaðurinn sífellt meiri tíma í bílnum. Ekki af því að það séu leiðindi heimafyrir, þó það geti auðvitað spilað inn í, heldur vegna aukinnar umferðar. Árið 2016 sýndu niðurstöður rannsóknar að ökumenn í Bandaríkjunum verja að meðaltali 17.600 mínútum á ári í umferðinni. Þetta eru rúmlega 290 klukkustundir. Með öðrum orðum þá ver fólk hrikalega löngum tíma í bílnum á leið til og frá vinnu og oft er þetta í snarkandi hita. Þá er nú gott að hafi eitthvað að drekka í bílnum.
Já, ekki bara eina tegund heldur margar: Kaffi, te, vatn, gos, djús…
Hvernig byrjaði þetta?
Þegar „drive-in“ veitingasala eða „beint-í-bílinn“ varð óheyrilega vinsælt fyrirbæri í Bandaríkjunum um 1950 varð auðvitað bráðnauðsynlegt að hafa glasahaldara fyrir drykkjarföng. Annað hefði beinlínis verið kjánalegt.
Frá 1953 hefur glasahaldarinn verið talinn álíka nauðsynlegur í bílnum vestanhafs og speglar. Eða svona næstum því. Fyrst var þetta aukabúnaður en síðar staðalbúnaður. Geng ég ekki svo langt að segja öryggisbúnaður en í sumum tilvikum mætti halda það.
Árið 1983 kom glasahaldarinn sem staðalbúnaður í Plymouth Voyager minivan og síðan þá hefur þetta verið algjör nauðsyn í bílum að margra mati.
Nei, hættu nú alveg!
Subaru Ascent SUV leysti Subaru Tribeca af hólmi árið 2019. Hann kom með látum á markaðinn í Bandaríkjunum með 19 glasahaldara innanborðs. Þannig voru 2.5 glasahaldarar á mann.
Hver og einn er hæfilega stór fyrir brúsa eða ílát sem rúmar það mikinn vökva að í heildina yrðu 28 lítrar af gutli í bílnum í mesta lagi. Þ.e. ef hver haldari væri með fullt ílát af stærstu gerð.
Einhver hjá The Atlantic reiknaði þetta út og niðurstaðan er sú að hver farþegi gæti haft í sínum glasahöldurum vökva sem næmi fjórföldu því vökvamagni sem mannsbelgurinn rúmar.
Svo benti annar blaðamaður á að sennilega væri snjallast að nýta einhverja þessara baukabera (glasahaldara) undir tóm ílát því auðvitað kæmi að því að fólkið þyrfti að létta á sér. Þá kæmu tómu ílátin í góðar þarfir.
Því fleiri því betra
Í skýrslu sem kom út hjá PriceWaterhouseCooper árið 2007 var greint frá því að samkvæmt könnun sögðu svarendur það vega þyngst við kaup á bíl hversu margir glasahaldarar væru í bílnum. Því fleiri því betra.
Þetta breyttist reyndar aðeins því árið 2009 voru neytendur vestra farnir að leggja aukna áherslu á sparneytni bíla en þó var glasahaldarafjöldi ekki mjög langt á eftir í forgangsröðinni. Þyrsta þjóðin er söm við sig og sísúpandi.
Græna gumsið
Sjálf lærði ég að meta glasahaldara eftir óhapp. Ég hafði átt minn gamla BMW í nokkur ár þegar ég fyrst veitti því athygli að enginn væri glasahaldarinn í bílnum. Það kom nú ekki til af góðu.
Ég var í lögfræðinámi á þeim tíma og þóttist voðalega upptekin manneskja á hraðferð. Svo mikilli hraðferð að ég tók morgunmatinn með mér í bílinn á morgnana og nærðist á leið í háskólann. Bjó til eitthvert heilsuógeð sem var grænn „smoothie“. Einn daginn fannst lokið ekki en skítt með það. Þegar ég snarbremsaði fór grænt gumsið yfir allt og út um allt. Núna, tíu árum síðar ímynda ég mér enn að græna gumsið leynist einhvers staðar.
Þannig áttaði ég mig á að engir glasahaldarar væru í bílnum. Og að grænn litur er ljótur í innréttingu bíla.
En 19 glasahaldarar? Nei, það er fullmikið…
Þessu tengt:
Þegar Ford vildi stýrið burt
Sjálfvirku öryggisbeltin: Hvað klikkaði?
Þriðja bremsuljósið: Af hverju og hvenær?
Áttir þú bílasíma? Motorola, Storno eða Mobira?
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
