Ríkið vegur að tengitvinnbílum

Að öllu óbreyttu lækka ívilnanir tengitvinnbíla um áramót

Núgildandi lög takmarka ívilnanir rafbíla að hámarki fyrir 15.000 bíla

Niðurfelling ívilnunar sem tengibílar hafa notið í formi lækkaðs virðisaukaskatts tekur að öllu óbreyttu breytingum um áramótin. Ívilnunin í dag er að hámarki allt að fjórum milljónum króna af bílverði og getur því numið að hámarki 960 þúsundum króna.

Ef breytingin fer í gegn, sem flest bendir til, fer ívilnunin úr 960 þúsund krónum niður í 480 þúund um áramótin. Upprunalega átti að taka fyrsta skrefið í niðurfellingu ívilnunarinnar um síðustu áramót. Um komandi áramót átti ívilnunin að lækka enn frekar og falla svo alveg niður 1. janúar 2023.

(í frétt á vef FÍB)

Okkur hér á Bílabloggi þykir þetta skjóta skökku við. Þrátt fyrir falleg orð stjórnmálamanna um orkuskipti og „græna framtíð“ í samgöngum er ljóst að uppbygging innviða gengur of hægt. Fjöldi landsmanna mun ekki hafa aðgang að hleðsluvalkostum rafbíla í nánustu framtíð heima hjá sér einfaldlega vegna þess að raforkukerfið og heimtaugar húsa ráða ekki við það.

Annað sem skiptir máli líka er að þeir sem eru að kaupa sér nýjan bíl núna munu eiga þann bíl fram yfir þá dagsetningu sem stjórnmálamenn lofsyngja sem þau tímamót þegar allir eiga að vera búnir að taka þátt í umræddum „orkuskiptum“!

Viðræður hafa engu skilað

Á vef FÍB má lesa eftirfarandi: „Viðræður við stjórnvöld hafa staðið yfir um að fresta fyrirhugaðri niðurfellingu og enn sem komið er hefur ekkert verið ákveðið í þessum efnum. Þess má geta að rúmir 2,2 milljarðar virðisaukaskatts voru felldir niður vegna innflutnings 2.632 tengitvinnbíla í fyrra.

Drægni tengitvinnbíla hefur aukist hratt á síðustu árum og hafa margir keypt fyrst tengitvinnbíl á leið sinni yfir í hreinan rafbíl.

Skattaívilnanir af kaupum á hreinum rafbílum renna líklega út um mitt næsta ár þegar kvóta stjórnvalda verður náð. Til að flýta fyrir orkuskiptum hafa kaupendur hreinna rafbíla fengið ívilnun í formi lækkaðs virðisaukaskatts. Núgildandi lög gera ráð fyrir að ívilnunin gildi út árið 2023 eða þar til 15 þúsund slíkir bílar hafa verið fluttir inn.

Niðurfelling virðisaukaskatts á rafmagnsbílum árið 2020 nam alls 2,9 millj­örðum króna en slíkur afsláttur var veittur vegna innflutnings á 2.632 bílum í þessum flokki.“

Styttist í að hámarki 15.000 bíla verði náð

Eins og er þykir sýnt að viðmiðum um 15.000 bifreiða hámarki nýskráninga verði náð um mánaðarmótin janúar/febrúar og því líklegt að hvatar virðisaukaskattskerfisins til kaupa á slíkum bifreiðum muni hverfa þar sem niðurfellingin mun orsaka hliðstæða hækkun útsöluverðs sem nemur niðurfellingu eins og fram hefur komið í ályktun sem Bílgreinasambandið sendi fjármálaráðuneytinu sem og efnahags-og viðskiptanefnd 11. nóvember síðastliðinn.

Við það mun ekki einungis draga úr líkum á að einstaklingar og önnur fyrirtæki en bílaleigur kaupi tengitvinnbíla.

Það sem verra er; brottfall ívilnunarinnar mun setja bílaleigur sem tekið hafa virkan þátt í orkuskiptum að undanförnu í erfiða stöðu. Þau markmið sem þær hafa undirgengist tengjast nefnilega virðisaukaskattsívilnuninni órofa böndum. Kaupi bílaleiga tengitvinnbíl utan ívilnunar verður henni ekki heimilt að fella útskatt af útleigu hennar undan skattskyldri veltu. Þar að auki telst slíkur bíll ekki heldur með í skuldbindingarmarkmiðum vörugjaldsafsláttarins.

Þar með munu bílaleigur takast á hendur verulega áhættu nema þá því aðeins að markmiðunum verði unnt að ná með kaupum á rafmagnsbifreiðum. Fari svo er hins vegar hætt við að 15.000 bifreiða hámarki nýskráninga rafmagnsbifreiða verði náð á fyrri hluta ársins 2022.

Áskorun um endurskoðun

Í sameiginlegri yfirlýsingu sem Bílgreinasambandið, Samtök ferðaþjónustunnar og Samtök verslunar og þjónustu sendu Alþingi segir:

„Á þessum tímapunkti virðist ljóst að tilefni sé til að taka forsendur þeirra tveggja hagrænu hvata sem finna má í virðisaukaskattslöggjöfinni til endurskoðunar, þ.e. ívilnun vegna kaupa á rafmagns-, vetnis- og tengitvinnbifreiðum og ívilnun vegna útleigu slíkra bifreiða. Til að varpa nánara ljósi á þann vanda sem að óbreyttu blasir við fylgir erindi þessu samantekt sem unnin var á vettvangi samtakanna. Þá leyfa samtökin sér jafnframt að teikna upp þær breytingar sem þau telja æskilegt að verði gerðar á viðeigandi ákvæðum virðisaukaskattslaga.“

Að þessu sögðu virðist augljóst að það er nauðsynlegt að endurskoða þessi mál enn frekar og það strax áður en fyrrnefnd lagabreyting tekur gildi.

(heimildir: vefur Alþingis og vefur FÍB)