Renault og Geely að setja á markað fyrsta sameiginlega bílinn
Tvinnbíllinn verður smíðaður á „Compact Modular Architecture“ grunni Volvo, sem er undirstaða Volvo XC40 og Lynk & CO 01.
Samvinna evrópskra bílaframleiðenda og framleiðenda í Asíu fer vaxandi, enda beggja hagur, fá evrópska hönnun til Asíu og bíla smíðaða í verksmiðjum þar til Evrópu. Nýjasta viðbótin er smíði á bíl í Suður-Kóreu í verksmiðjum Renault, en Geely, sem er bakhjarlinn að smíði til dæmis Polestar, keypti fyrr á þessu ári einn þriðja hlut í Renault Korea Motors, sem er með verksmiðjur í Busan í Suður-Kóreu. Geely á til dæmis Volvo Cars og 9,7% hlut í Daimler AG.
Fyrsta framleiðslubíllinn frá samstarfi Renault Group við Zhejiang Geely Holding Group í Suður-Kóreu mun koma á markað árið 2024 sem meðalstærðar tvinnbíll með „fastback“ útliti.
Renault birti skuggamynd af bílnum sem ekki var auðkennd með nafni. Hann verður smíðaður í verksmiðju Renault Korea Motors í Busan, fyrir Suður-Kóreu og útflutningsmarkaði.
Bíllinn verður smíðaður á Compact Modular Architecture grunni, þeim hinum sama og stendur undir ýmsum bílum tengdum Geely eins og Volvo XC40 og Lynk & CO 01. Engar frekari upplýsingar voru gefnar upp, nema að hann yrði hluti af úrvali meðalstærðar tvinnbíla.
Renault Korea Motors sagði einnig að það myndi fjárfesta fyrir meira en 900 milljónir evra í Suður-Kóreu á næstu sex árum, með útgjöldum til hugbúnaðar, tenginga og rafvæðingar.
Forstjóri Renault, Luca de Meo, sagði á blaðamannafundi á þriðjudag að Busan verksmiðjan yrði „útflutningsmiðstöð fyrir meðalstóra bíla okkar,“ að sögn dagblaðsins Korea Joongang Daily.
„Kórea er mjög góður vettvangur til að flytja út vörur okkar,“ bætti de Meo við, samkvæmt skýrslunni. „Kórea hefur undirritað fríverslunarsamninga við svo mörg lönd og hefur hlutverki að gegna sem góð brú í framleiðslu bíla og útflutningi þeirra.
De Meo var í Asíu til að ræða við Nissan um áætlanir um að koma á jafnvægi í vandræðabandalagi bílaframleiðenda.
Renault gekk til samstarfs við Geely í janúar. Samningurinn snýst um framleiðslu í Busan verksmiðjunni, en Geely ætlar að taka þátt í komandi fyrirtæki Renault í framleiðslu brunahreyfla.
Fyrirtækin tvö munu einnig eiga samstarf í Kína, eftir að Renault hætti þar aðalsamstarfi sínu við Dongfeng.
Busan verksmiðjan smíðar nú Renault Arkana crossover til útflutnings til Evrópu og hefur áður smíðað Nissan Rogue fyrir Norður-Ameríku. Þessi verksmiðja hefur ársgetu til smíða á 300.000 bílum.
Rekstur Renault í Suður-Kóreu hafði verið í erfiðleikum áður en Geely kom til skjalanna. Hópurinn hafði framleitt og selt bíla í landinu í meira en tvo áratugi í gegnum Renault-Samsung Motors, staðbundið vörumerki með Samsung Group.
Sala árið 2021 var 61.096 bílar, sem er 36 prósent samdráttur frá 2020. Til samanburðar var salan 2016 meira en 111.000.
(frétt á vef Automotive News Europe)
