Rafbílar eru svo flóknir
Alls ekki. Þeir eru a.m.k. mun einfaldari en bílar með brunahreyfli.
Er þessi grein þá ekki búin? Búið að svara fullyrðingunni og svona? Nei, spáum endilega aðeins meira í þetta.
Ímyndum okkur að við séum með nýjan bensínbíl með nýjustu gerð af mótor með fullkomnum mengunarvörnum og gírkassa sem er tölvustýrður o.s.frv.
Við fjarlægjum mótorinn, gírkassann, útblásturskerfið og bensíntankinn. Mótorinn og gírkassinn eru að upplagi flókin fyrirbæri með mörgum hreyfanlegum hlutum. Nýjustu gerðir eru enn flóknari með alls konar skynjurum og segulspólum og tilheyrandi rafkerfi og tölvum.
Það sem við setjum í staðinn fyrir það sem fjarlægt var eru einn til fjórir rafmótorar, risastór rafgeymir og stjórneining (power electronics).
Stjórneiningin er flóknust og sér um að umbreyta rafmagni og stýra öllu í raun, m.a. hleðslu og þar með er talin endurmögnunarhemlun sem fer af stað þegar inngjöfinni er sleppt og rafmótorarnir umbreyta hreyfiorku í rafmagn sem nýtist til að hlaða rafgeyminn.
Rafmótorarnir eru ekki mikið flóknari en rafalar eða startarar sem hafa verið í bílum í marga áratugi. Rafgeymirinn er mjög stór en er ekki mikið flóknari en 12V rafgeymirinn í bílnum, reyndar ósköp svipaður en vökvakældur.
En hér kemur eitt myndband frá bifvélavirkjanum Scotty Kilmer með svolítið stuðandi fyrirsögn en nánast útskýrir rafbíla frá a til ö á auðskiljanlegan hátt á tæplega tíu pg hálfri mínútu.
