Nokkrar íslenskar bílaskopsögur
Halldór Laxness, Óli Ket, Egill Vilhjálmsson og Einar Ben eru á meðal þeirra sem til eru um skemmtilegar bílaskopsögur í ritinu Íslenzk fyndni. Íslenzk fyndni kom út á árunum 1933 til 1961 og eru tölublöðin 25 talsins. Hér eru nokkrar vel valdar sögur!
Gunnar Sigurðsson frá Selalæk (1888 – 1962) tók sögurnar saman og skráði niður en myndirnar teiknuðu þeir Eggert Laxdal og Tryggvi Magnússon. Allar eru sögurnar sannar, eða svo gott sem!
Fyrstu tvær sögurnar birtust í hefti ársins 1955. Í þeirri fyrri er enginn nafngreindur en hér er hún (orðrétt og stafsetningin er vissulega óbreytt):
Veiðimaður nokkur var á gangi á Skeiðaveginum. Bíll með tóma líkkistu ók fram á hann, og fékk maðurinn leyfi til að standa aftan á bílnum. Nú fer að rigna, og fer veiðimaðurinn þá niður í kistuna og setur lokið yfir sig. Nú ber svo við, að bílstjórinn tekur annan vegfaranda upp af götu sinni, og fer hann upp á pallinn. Skömmu síðar stanzar bíllinn. Þá lyftir veiðimaðurinn upp kistulokinu og segir: „Er hann hættur að rigna?“ Hinum farþeganum bregður svo við, að hann rekur upp óp og stekkur á bólakaf út í skurð við veginn.
Steingrímur Jónsson, rafmagnsstjóri Reykjavíkurbæjar, var að undirbúa virkjunina við Ljósafoss í Soginu. Útlendur verkfræðingur kom þá til landsins að vetrarlagi og vildi sjá aðstæður þar eystra. Steingrímur tók leigubíl, og óku þeir verkfræðingarnir austur að Kárastöðum í Þingvallasveit. Þingvallavatn var á ís, og fór Steingrímur þess á leit við bílstjórann, að hann æki þeim eftir vatninu niður að Sogi. Bílstjórinn hikaði við, en spurði svo: „En segið þér mér eitt, rafmagnsstjóri. Ætlið þér að borga, ef illa fer?“ „Já“, sagði Steingrímur, „ef þér komið með reikninginn“.
Næsta saga er úr hefti ársins 1956, þ.e. ári eftir að Laxness fékk Nóbelsverðlaunin í bókmenntum.
Halldór Kiljan Laxness ók bíl sínum um fjölfarinn veg. Þá kom á móti honum annar bíll, sem var svo frekur á veginum, að Halldór varð að hrökklast út af til þess að komast hjá árekstri. Báðir námu staðar. Halldór steig út úr bílnum, hneigði sig hæversklega fyrir hinum bílstjóranum og sagði: „Er það nokkuð fleira, sem ég get gert fyrir yður?“
Ólafur Ketilsson, eða Óli Ket, var einhver þekktasti rútubílstjóri Íslands og eru margar skemmtilegar sögur til af honum. Sagan sem birtist í Íslenskri fyndni árið 1958 er sennilega ein af þeim þekktari en hér er hún:
Ólafur Ketilsson, bílstjóri á Laugarvatni var eitt sinn á leið til Reykjavíkur með farþega og ók hægt. Þá segir einn farþeginn: „Það er kýr að fara fram úr þér, Ólafur.“ „Ef þér liggur á, þá spurðu hana, hvort hún taki farþega,“ svaraði Ólafur.
Í lokin koma svo þrjár út hefti ársins 1960 og fylgir þessi skemmtilega teikning þeirri fyrstu:
Bílstjóri einn ók á gamlan mann á mjóum vegi, og valt þá bíllinn um leið út í blautan skurð. Bílstjórinn skammar nú gamla manninn óbótaskömmum fyrir það að vera í vegi fyrir sér. Gamli maðurinn þegir lengi, þangað til hann segir með mestu hógværð: „Já, það var náttúrlega hugsunarleysi af mér að ganga ekki niðri í skurðinum.“
Egill Vilhjálmsson var einn af fyrstu bílstjórum hér á landi: Á þeim árum, þegar bílar voru ennþá fáséðir, kom það oft fyrir, að hestar fældust undan þeim. Egill ók einu sinni með Einar Benediktsson austur í Rangárvallasýslu. Þegar þeir komu austur í Holt, mættu þeir manni með tvo vagna, sem hlaðnir voru smjörkvartélum. Fyrri hesturinn fældist og velti vagninum ofan í skurð. Manninum varð skapfátt og skammaðist, en Einar tekur þá upp brennivínsflösku og segir honum að drekka eins og hann vilji. Þá hýrnaði yfir karli, og honum varð að orði: „Hefði ég átt von á þessu, þá held ég, að þið hefðuð mátt velta báðum vögnunum.“
Séra Björn og Jón bóndi komu sér lítt saman og áttu stundum í deilum og kerskni. Nú hafði prestur fengið sér nýjan bíl, kom í honum til messu og var hreykinn af. Í stólræðunni talaði hann meðal annars um hinn þrönga og breiða veg og brýndi mjög fyrir mönnum að velja heldur þrönga veginn. Eftir messu segir Jón bóndi við prest: „Skyldi hann vera bílfær — þröngi vegurinn?“
Þannig var nú það! Ef lesendur luma á góðum sögum þá má endilega deila þeim á Facebookþræði færslunnar eða senda á neftangið malin@bilablogg.is
Fleiri kostuglegir íslenskir ökumenn:
Séra Baldur og bílarnir
„Kjarval var svolítið skrýtinn“
Skodaunnandinn Ingimar Eydal
Sannleikurinn um Bjössa á mjólkurbílnum
Ótrúlegt að bíll kæmist leikandi yfir Öxnadalsheiði
?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein