Markaðurinn breytist mjög hratt
Allt frá því fyrstu rafbílarnir komu til Íslands hefur Emil Kári Ólafsson verið viðloðandi sölu slíkra bíla. Í dag á hann og rekur fyrirtækið Rafbílainnflutning sem flytur inn nýja og notaða rafbíla frá Evrópu.
„Við leggjum aðallega áherslu á bíla sem eru búnir að ná fótfestu á markaðnum og eru ekki alveg nýkomnir á markaðinn. Þannig getum við oftast boðið betri verð en samkeppnisaðilar okkar,“ segir Emil Kári.
Tesla á góðu verði í dag
„Tesla var mjög vinsæll í okkar vöruframboði en eftir að Tesla í Kaliforniu opnaði útibú hér á landi eigum við ekki séns í þau verð sem þar eru í boði. Við erum að bjóða Nissan Leaf með báðum rafhlöðustærðunum, 40 og 62 kWh. Þeir bílar eru mjög vel búnir en við höfum yfirleitt ekki tekið þá með PRO-PILOT PARK kerfinu, einfaldlega vegna þess að það er lítið notað.“
„Við seljum mun meira af 40 kWh útgáfu bílsins en 62 kWh þrátt fyrir að hann hafi minni drægni. Það þykir okkur merkilegt vegna þess að algengasta spurning fólks frá upphafi hefur verið – „en hvað ef ég þarf að fara til Akureyrar?”
En það sýnir í raun það sem við höfum lengi vitað að drægni rafbíla í dag dugir flestum þó að þeir séu ekki með stærstu rafhlöðurnar sem í boði eru. Þó vissulega séu þeir til sem þurfi mestu drægnina sem í boði er í dag og í einstaka tilvikum meiri drægni.“
Við höfum einnig verið að bjóða Hyundai Kona með báðum rafhlöðustærðunum. Þeir hafa verið að koma mjög vel út þeir bílar.
Splunkunýir bílar
Þeir bílar sem við höfum flutt inn og eru alveg nýir og ókeyrðir eru samt sem áður skráðir á götuna sem notaðir.
Reglur bílaframleiðenda knýja hins vegar á um að bíll sem er ekki fluttur inn af bílaumboði þarf að skrá í löndum Evrópu áður en hann er fluttur á milli landa. Af þeirri einu ástæðu stendur að um notaðan bíl sé að ræða þegar bíllinn er skráður í fyrsta sinn hér á landi. Þrátt fyrir það er bíllinn splunkunýr og ókeyrður.
Engin yfirbygging
Við getum boðið betri verð af því við erum ekki með neina yfirbyggingu og skrifstofan mín er bara hér í stofunni heima. Við getum tekið Tesla sem dæmi. Þú pantar hann á vefnum. Ef þú ferð í verslun Tesla niðrí bæ, benda sölumenn þér á tölvuna og þú velur bílinn sem þú vilt kaupa og ýtir svo á PANTA takkann. Þetta er bara nýja verslunarumhverfið – það sem koma skal.
Munur sem þú finnur fyrir
Það getur alveg munað meira en 15% á samskonar bílum – frá okkur og umboði. Bílar sem eru nákvæmlega eins búnir og með sömu verksmiðjuábyrgð og umboðsbíllinn.
Tækni sem virkar
Ég held að allra nýjustu bílarnir eins og VW ID.3 og ID.4 auk Tesla sem eru með drif á afturhjólum séu ekki vandamál í vetrarumferðinni. Aðalmálið er að sjálfsögðu hjólbarðarnir. Við erum að tala um allt aðrar forsendur í afturhjóladrifnum rafbílum en til dæmis eldri týpum af Mercedes og BMW þar sem þyngdardreifing milli fram- og afturhjóla er mjög ójöfn.
Rafbílarnir eru langflestir ef ekki allar með nánast jafna þyngdardreifingu milli fram- og afturöxla sem gerir þá sérlega örugga og þægilega í akstri.
Ég lít bara björtum augum á framtíðina. Fjölbreytni og samkeppni er það sem virkar og við munum áfram bjóða viðskiptavinum okkar upp á flotta bíla á hagkvæmu verði, sagði Emil Kári Ólafsson að lokum.
