Það var glampandi sól og almenn gleði á sumarhittingi Krúser klúbbsins að Höfðabakka 9, sunnudaginn 2. júlí síðastliðinn. Við erum með myndbands viðtal við Kristinn neðst í þessari grein.
Þar úði og grúði af flottum bílum af öllum gerðum og stærðum og á öllum aldri.
Chevrolet Bel Air bíll Kristins. Þetta er árgerð 1955 og hefur aðeins verið í eigu tveggja aðila frá upphafi.
Krúser klúbburinn er félagsskapur fólks sem hefur bíla og akstur sem áhugamál. Það er óhætt að segja að íslendingar eiga flotta bíla – það kom berlega í ljós þegar við gengum um bílaplanið á Höfðabakkanum um helgina.
Þarna mátti sjá bíla frá þriðja áratug síðustu aldar, fjórða, fimmt og uppúr. Þarna voru bílar framleiddir í hinum ýmsu heimsálfum, til dæmis var þarna afar sjaldgæfur VW Brasilía sem vakti talsverða athygli.
Amerísku kaggarnir stóðu vel fyrir sínu, Mustang, Dodge, Plymouth og Ford voru með sína fulltrúa á planinu. Þarna mátti líka sjá breskan Rolls Royce í öllu sínu veldi.
Hér má nokkra flotta bíla sem voru á planinu hjá Krúser um helgina.
Bel Air varð vinsæll bíll
Bel Air var ferskur og áberandi í bílaheiminum árið 1955. Hann var með einfalt og straumlínulagað útlit með sléttum, flæðandi línum. Fullt af krómi á grillinu ásamt áberandi krómstuðurum og húddskrauti.
Bel Air 1955 var fáanlegur í ýmsum útfærslum, þar á meðal 2 dyra coupé, 2 dyra hardtop, 4 dyra fólksbíl og með blæju. Tveggja dyra harðtoppurinn, þekktur sem „Sport Coupe“, var sérstaklega vinsæll.
Árgerðin 1955 markaði upphaf þess sem oft er nefnt „Tri-Five“ tímabil Chevrolet bíla. Þetta tímabil felur í sér 1955, 1956 og 1957 módelin, sem eru mjög eftirsótt af söfnurum og áhugamönnum.
V8 vélin var nokkuð öflug
Bel Air 1955 kynnti hina vel heppnuðu V8 vél Chevrolet, hina goðsagnakenndu 265 cid (4.3L) V8 vél. Hún gaf meira afl og afköst miðað við fyrri vélar, sem gerði Bel Air að nokkuð sprækum kagga.
Bel Air bauð upp á nokkra kosti, þar á meðal 3 gíra handskiptingu með yfirgír og nýju 2 gíra „Powerglide“ sjálfskiptinguna. Powerglide skiptingin varð nokkuð vinsæl vegna þess hve silkimjúk hún þótti.
Bel Air 1955 var með stílhreina og flotta innréttingu. Hann var með vel skipað mælaborð með samhverfum tækjaklasa, stílhreinum áklæðamöguleikum og nægu sætarými.
Klassík
Bel Air 1955 varð vinsæll bíll hjá Chevrolet. Aðlaðandi hönnun, afköst og hagkvæmni gerði hann að vinsælu vali meðal bílakaupenda. Bel Air varð nokkursskonar táknmynd ameríska draumsins á sjötta áratugnum sem hinn „almenni” bíll fólksins og var áberandi í kvikmyndum, sjónvarpi og tónlist tímabilsins.
Chevrolet Bel Air frá 1955 skipar sérstakan sess í bílasögunni sem klassískt tákn um bandaríska bílahönnun frá því um 1950 og með tilkomu V8 vélarinnar. Tímalaus stíll þessa bíls og sjarmi heldur áfram að heilla bílaáhugamenn til dagsins í dag.
