Ofurdriftbíllinn, hinn sérsmíðaði 1.400 hestafla Ford Mustang Mach-E, sem er í eigu driftmeistarans úr Formula Drift, Vaughn Gittin Jr., átti að vera hér á landi í kvikmyndatökum síðasta sumar. Hætt var við þau áform eftir Íslandsheimsókn og myndbandið tekið upp í Færeyjum. Athugið að hlekkur á myndbandið er hér fyrir neðan sem og neðst í greininni.
Í tvígang hefur undirrituð fjallað um myndbandið, nú síðast í gærkvöldi. Við „grams“ eftir heimildum, svokallað heimildagrams, rakst ég á stutta grein á færeyska vefmiðlinum in.fo. Greinin er dagsett 19. júlí 2021 og þar segir [í þýðingu undirritaðrar]:
„Þegar in.fo hitti kvikmyndatökumenn í Havn [Þórshöfn] í dag sögðust þeir hafa verið á Íslandi en væru komnir til Færeyja „því landið ykkar, hefur hæsta hlutfall grænnar orku á hvern íbúa,“ eins og maðurinn frá Los Angeles komst að orði.“
Svo mörg voru þau orð. Við þóttum einfaldlega ekki nógu græn og væn til að þetta magnaða milljón hestafla myndband yrði tekið upp hér á landi. Maðurinn frá Los Angeles veit hvað hann syngur og hvernig sem litið er á þetta er útkoman algjört meistaraverk. Færeyjar eru sannarlega fallegar og margt megum við eflaust læra af Færeyingunum.
En ekki tungumálið. Það er dálítið bjagað hjá þeim!*
*Hér er um svokallað grín að ræða og ber eðli máls samkvæmt ekki að taka það alvarlega.
Danskur YouTube-strákur, Alexander Husum, flaug til Færeyja í boði Ford og fékk að fylgjast með kvikmyndatökum. Ekki nóg með það heldur fór hann í bíltúr með Vaughn Gittin Jr. á ofurbílnum! Hefði maður nú verið til í það? Jájájá, allan daginn!
Hér er bútur frá þeim danska:
Tengdar greinar:
Ford-flipp í Færeyjum
Dúndraði á vegg á 1.400 hestafla Mach-E við tökur
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
