Þegar ökumenn halda að enginn sjái til gera þeir eitt og annað sem aldrei ætti að komast í hámæli. Þökk sé bandarískri rannsókn getum við vísað í aðra og bent á þátttakendur – þó við vitum auðvitað að þetta er okkur ekki endilega framandi.

Já, það er nú gott að geta vísað í erlenda rannsókn á ósiðum ökumanna. Látum liggja á milli hluta að þetta er sennilega þverskurður af ósiðum hins almenna vestræna ökumanns.

Óséðir ósiðir?

Ósiðir. Eru ósiðir líka ósiðir þegar enginn sér til? Nú er undirrituð að vísa í rannsókn sem 4.000 bandarískir ökumenn tóku þátt í en niðurstöðurnar voru birtar fyrir rúmum fimm árum.  

Það er ekki nógu langt síðan til að hægt sé að vona að þetta „hafi bara verið svona í gamla daga“ en látum skellinn koma.

Það sem blasti nú eiginlega við í niðurstöðunum er að einbeiting ökumanna er álíka góð og hjá „sex ára ofvirku barni sem er ekki búið að fá Rítalínið sitt.“ Þarna var ég að vísa í umfjölllun The Thrilllist um niðurstöður sömu rannsóknar.

Þessir athyglisbrostnu ökumenn játuðu ýmsa ósiði og á þetta við um gjörðir manna og athafnir þegar þeir töldu víst að enginn væri að fylgjast með.
66% sögðust bora í nefið
60% laumuðust til að kíkja á samfélagsmiðla til að athuga hvað félagar þeirra væru að bauka
52% borðuðu heila máltíð meðan á akstri stóð
43% höfðu fataskipti (klæddu sig í flík eða úr)
35% struku af mælaborði eða framrúðu
24% greiddu sér
20% settu á sig svitalyktareyði eða máluðu sig. Því eins og allir vita er nú alveg lífsnauðsynlegt að líta þokkalega út þegar á leiðarenda er komið
20% horfðu á myndband
17% tóku sjálfu
7% notuðu tannþráð
2% naglalökkuðu sig

Hvað skilaboðasendingar snertir þá sögðust 8% senda skilaboð daglega meðan á akstri stendur en 13% sögðust gera það um það bil einu sinni í viku. 51% kvaðst hreinlega aldrei hafa látið sér svo mikið sem detta í hug að senda skilaboð undir stýri.

Liturinn virðist segja eitthvað

Það vill nú þannig til að rannsakendur tóku líka saman litina á bílum þátttakenda og settu í samhengi við niðurstöðurnar.

Eigendur svartra bíla eru líklegastir til að senda skilaboð við akstur en eigendur grænna bíla eru ólíklegastir til að gera slíkt.
Svona var litadreifingin og hlutfallið:
Svartur - 24%
Silfur - 22%
Hvítur - 21%
Rauður - 19%
Gulur/appelsínugulur - 19%
Blár - 19%
Drappaður - 16%
Grænn - 12%

Þetta er kúnstugt og niðurstöðurnar eru sannarlega áhugaverðar. Mun ítarlegar er greint frá þeim hér hafi lesendur áhuga.  

Ljósmyndir: Unsplash.com

Fleira furðulegt um akstur og ökumenn:

Einkenni lélegra bílstjóra

Eru fuglar líklegri til að drita á rafbíla?

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.

Sett inn
22/6/2022
í flokknum:
Bílaheimurinn

Fleiri fréttir úr flokknum:

Bílaheimurinn

skoða allt

Skráðu þig á póstlistann okkar
Fáðu nýjustu greinarnar í pósthólfið þitt

Thank you! Your submission has been received!
Oops! Something went wrong while submitting the form.