Toyota kynnir næstu kynslóð Land Cruiser
- Kemur væntanlega víða á markað í sumar, en ekki þó í Bandaríkjunum
Fyrir okkur sem erum frekar fjarri helstu bílamörkuðum þarf stundum að vera á vaktinni til að fylgjast með því nýjasta sem er að gerast.
Ég hafði séð að von væri á kynningu á nýjum Land Cruiser frá Toyota, en svo fór að það fór fram hjá mér að hann var kynntur í vikunni, en við bætum núna úr því
Toyota Land Cruiser er einn merkasti bíll allra tíma. Jeppinn sem er óneitanlega „flaggskip“ Toyota hefur verið til í 70 ár; meira en 10,4 milljónir Land Cruiser-jeppa hafa verið seldar í 170 löndum.
Það hefur reyndar verið löng bið eftir alveg nýrri útgáfu – síðan 2007.
En hinn nýi Land Cruiser 2022 hefur loksins verið opinberaður. Toyota hefur haldið sömu uppskrift, kemur ekki á óvart – en gert nokkrar miklar endurbætur.
Hér er það sem við vitum um nýju 300 kynslóðina.
Kemur á markað í sumar
En við verðum að reiða okkur á útlendar bílavefsíður, sem margar hafa verið að fjalla um þessa nýju útgáfu af Land Cruiser. Gefum vefsíðunni motorauthority.com orðið:
„Toyota kynnti næstu kynslóð Land Cruiser á miðvikudaginn. Þekktur innan fyrirtækisins sem 300 serían, hann kemur á flesta markaði sem árgerð 2022 og búist er við að hann muni koma á markað í sumar. En það vekur athygli að þessi nýi Land Cruiser kemur þó ekki á Bandaríkjamarkað.
En að mati margra var löngu kominn tími á endurhönnun Land Cruiser. Fráfarandi 200 sería hefur verið til sölu síðan árið 2008.
Jeppinn er áfram með yfirbyggingu á grind en er í dag smíðaður á nýjum GA-F grunni sem Toyota segir lækka heildarþyngd ökutækis um 200 kg, með lægri þyngdarpunkt.
Lengd, breidd og hjólhaf ökutækis, sem og aðkomu- og fráhorn, eru þau sömu og áður í flestum búnaðarstigum samkvæmt upplýsingum Toyota. Hönnun hefur heldur ekki breyst mikið; helsta aðgreiningin eru stór loftop við grillið.
Til að draga úr losun er Land Cruiser ekki lengur með hefðbundna V-8-vélina en fær í staðinn tvær V6-vélar með tveimur túrbínum: 3,5 lítra bensín V-6 er með 409 hestöfl og togið er 1180 Nm en 3,3 lítra túrbódísilvélin er 304 hestöfl og togið er 1272 Nm.
Báðar vélarnar eru paraðar við 10 gíra sjálfskiptingu.
Toyota útbjó nýja Land Cruiser með „rafrænu hreyfibúnaðarkerfi“ eða „Electronic Kinetic Dynamic Suspension System“ (E-KDSS) með aðlagandi kerfi höggdeyfa til að bæta áhrifin í akstrinum.
Kerfi „Multi-Terrain Select“ akstursstillinga og „Multi-Terrain Monitor“ myndavélakerfi er hannað til að hjálpa í akstri í torfærum.
Nýtt í tæknihliðinni er „Toyota Safety Sense“ aðstoð ökumanns, sem þegar er staðall í flestum öðrum gerðum bílaframleiðandans.
Í Land Cruiser felur hann í sér sjálfvirka neyðarhemlun (að framan og aftan) og forvarnaraðgerð sem ætlað er að hjálpa ökumanni að stýra kringum hindranir.
Hættir á Bandaríkjamarkaði
Toyota hefur staðfest áður að Land Cruiser muni hætta í Bandaríkjunum eftir árið 2021. Sérstök „Heritage“ útgáfa af 200-bílnum þjónar sem lok bílsins á þessum markaði.
Hins vegar er gert ráð fyrir að Lexus LX tvíburi Land Cruiser lifi áfram á Bandaríkjamarkaði með túrbó V-6 í stað núverandi 5,7 lítra V-8 vélar.
„Ein mikilvægasta kynning á nýjum bíl á árinu“
Sumir bílavefir líta á þessa kynningu á nýjum Land Cruiser „að hún sé án efa ein mikilvægasta jeppakynning ársins“, eðs svo segir á vef motor1.com.
En þeir bæta líka við að því miður sé þetta ekki að gerast á þeirra heimamarkaði í Bandaríkjunum, en ákveðin svæði í heiminum eins og Miðausturlönd og Rússland taka vel á móti LC300 sem beðið er eftir.
Sumir freistast til að segja að það sé meiri veruleg andlitslyfting á gamla LC200 frekar en alveg ný gerð þar sem útlitið hefur frekar bara þróast.
Hins vegar benda menn á að Land Cruiser 2022 hafi verið endurskoðaður með því að skipta yfir á TNGA grunninn sem búist er við að verði einnig grunnurinn að Toyota Tundra 2022-árgerð.
Meiri breytingar í innanrými
Að innan hefur verið miklu breytt til að koma til móts við staðalgerð níu tommu upplýsingaskjá eða nýjan 12,3 tommu skjá, sem er aukabúnaður.
Eigendur munu njóta góðs af Apple CarPlay og Android Auto samþættingu, þráðlausri snjallsímahleðslu, 360 gráðu myndavél og skjá sem varpar upp upplýsingum í sjónlínu ökumanns.
Rafstýrður afturhleri verður einnig fáanlegur ásamt rafstillanlegu stýri, loftjónara og jafnvel auðkenningarkerfi fyrir fingrafar.
Ekki til sölu hér á landi
Samkvæmt upplýsingum frá Páli Þorsteinssyni upplýsingafulltrúa Toyota á Íslandi kemur Land Cruiser 300-bíllinn ekki á markað í Vestur Evrópu og verður því ekki til sölu hér á landi.
Umræður um þessa grein