Það þótti magnað þegar þeir Brian Keene og James Wright óku aftur á bak í 37 sólarhringa árið 1984. Það var heimsmet. Svo tók leigubílstjórinn Harpreet Devi upp á því að bakka alla daga og það gerði hann í 12 ár.
Bandaríkjamennirnir Brian Keene og James Wright óku Chevrolet Blazer 14.534 kílómetra aftur á bak gegnum 15 ríki Bandaríkjanna og hluta af Kanada. Þetta tók þá 37 sólarhringa og jú, það þótti mikið afrek.
Nema í Oklahóma reyndar. Þar þótti laganna vörðum lítið til uppátækis mannanna koma og ráku þá til baka út úr Oklahóma. Það ert að segja miðað við akstursstefnu þeirra; þeir voru skikkaðir til að aka út úr Oklahóma en ekki í bakkgír. Ástæðan var sú að á bílnum var áberandi merking sem sagði „fastur í bakkgír“ og auðvitað á bilaður bíll ekkert að vera í umferð. Þó þetta hafi verið grín þá þótti lögreglunni þetta ekkert sniðugt.
Heimsmetið eiga þeir félagar þó enn fyrir lengstu ökuferðina aftur á bak.
Með fjóra gíra aftur á bak
Þar sem ég velti þessu heimsmeti fyrir mér (ætla nú ekki að reyna að slá metið samt) fann ég umfjöllun frá árinu 2015 um mann sem ók aftur á bak í 12 ár. Hann er hættur þessu núna, enda fékk hann í bakið eftir margra ára bakkakstur.
Enginn hefur ekið leigubíl aftur á bak lengur en indverski bílstjórinn Harpreet Devi. Hann ók aftur á bak um stræti Bhatinda á Indlandi frá árinu 2003 til 2015.
Þetta byrjaði dag nokkurn þegar bíll Devis festist í bakkgír og karlinn þurfti að bakka tæplega 60 kílómetra leið heim til sín. Þegar hann kom heim hugsaði Devi með sér að þetta hefði hreint ekki verið slæmt heldur þvert á móti! Þetta var bara miklu betra og mun öruggara að hans mati.
Uppveðraður af þessari uppgötvun sótti Devi um leyfi til að breyta gírkassanum í þessum litla Fiat sem hér sést á myndum. Fjórir gírar aftur á bak og einn áfram. Jú, og hann fékk sérstakt leyfi hjá yfirvöldum í Punjabi til að aka leigubílnum aftur á bak.
Með sírenu, ljóskastara og auðvitað spegla
Bíllinn var búinn ýmsum græjum á borð við sírenur og framljós aftan á bílnum svo aðrir vegfarendur rugluðust ekki algjörlega. Devi var þó aldrei með bakkmyndavél og hékk hálfur út um gluggann frekar en að nota speglana. Á áttatíu kílómetra hraða hefur það eflaust verið áhugaverð sjón svo ekki sé minnst á þá upplifun að vera farþegi í leigubílnum.
Eftir tólf ár á fullu, þ.e. á fullri ferð aftur á bak, fann Devi mikið til í skrokknum. Bak- og hálsvandamál voru orðin allveruleg en þrátt fyrir allt sagði hann í viðtali árið 2015 að öruggara væri að aka aftur á bak en áfram. Öfugmæli? Kannski. Kannski ekki.
Fleiri undarleg met:
Hve mörgum má koma fyrir í …
Furðulegt heimsmet Han Yue
Lengsti bíll heims slær eigið met
Heimsmet í hverju?
?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein