Ineos ætlar að koma með Grenadier jeppann á Evrópumarkað 2022
Fyrirtækið mun í upphafi bjóða upp á „vinnubílsútgáfu“ af keppinaut Land Rover Defender
Það bíða margir eftir nýja Grenadier-jeppanum frá Sir Jim Ratcliffe. Þetta er aðeins farið að skýrast því nú herma fréttir að Ineos Automotive, deild efna- og orkurisans Ineos, mun setja þennan harðgerða jeppa á markað í Evrópu árið 2022 og því næst í Norður-Ameríku árið 2023. Markhópurinn þar er einkum bændur og aðrir notendur í dreifbýli, sagði bílaframleiðandinn.
Fyrirtækið ætlar til að byrja með að koma með nytjaútgáfu af Grenadier fyrir viðskiptavini sem þurfa á slíkum bílum að halda, sem ætti að vera meirihluti sölu þessa fjórhjóladrifna jeppa ásamt þægilegri farþegaútgáfu.
Bíllinn mun einnig koma á markað í hlutum Afríku og Mið-Austurlöndum árið 2022.
Ineos sagði að það myndi selja Grenadier í gegnum söluaðila sem þegar er á markaði, sem og sérstaka söluaðila 4X4 bíla, en einnig verður hann seldur á netinu.
Salan á að hefjast í júlí 2022
Fyrirtækið miðar að því að um 200 söluaðilar um allan heim hefji sölu í júlí 2022.
Í Bretlandi ætlar Ineos að hafa 23 smásöluverslanir í rekstri við upphaf sölu, að viðbættum söluverslunum frá Bosch.
Gert er ráð fyrir að verð í Bretlandi á Grenadier verði frá 48.000 pundum (um 8,4 milljónir ISK) sagði fyrirtækið.
Fyrirtækið hefur 15 sölustaði í sigti í Þýskalandi fyrir upphafsdaginn.
Þessi „kassalaga“ Grenadier verður með bensín- og dísilvélar frá BMW.
Framleiðsla ökutækisins hefst síðla árs 2021 í fyrrum Daimler verksmiðju sem smíðar bíla frá Smart í Hambach, í norðausturhluta Frakklands. Ineos keypti verksmiðjuna af þýska bílaframleiðandanum í fyrra.
Horfa til annarrar tækni varðandi eldsneyti
Gary Pearson, sem er forstöðumaður markaða Ineos í Bretlandi, Mið-Austurlöndum og Norður-Afríku, sagði að tækni brunavéla sem fyrirtækið notar sé rétt fyrir markaðinn í dag.
En þar sem bann við bílum sem nota jarðefnaeldsneyti er yfirvofandi í Evrópu, horfir fyrirtækið til vetniseldsneytissellutækni fyrir núll-losunar-útgáfur framtíðarinnar af Grenadier frekar en að fara yfir í bíla með með rafhlöðu.
„Eftir því sem rafmagnstækninni fleygir fram getur það vel orðið rétt fyrir okkur,“ sagði Pearson.
„En í dag hvað varðar drægni, þyngd rafhlöðu … í ökutæki sem þarf að geta dregið hluti, lyft hlutum og borið, þá er það ekki endilega rétt fyrir okkur um þessar mundir.“
Samkomulag móðurfyrirtækisins Ineos og Hyundai um að kanna möguleika á vetnisframleiðslu og framboði felur í sér mat á notkun eldsneytissellukerfis suðurkóreska bílaframleiðandans í Grenadier.
(Frétt frá Reuters, Automotive News Europe og Automobilwoche)
