Hvaða bílar endast lengst?
Hversu margir miðaldra einstaklingar muna ekki eftir því að hafa átt sinn besta bíl eða þann sem bilaði minnst, ryðgaði minnst, bílinn með besta lakkinu eða þann sem komst allt, sama hvernig viðraði.
Oft hefur þetta leitt til tilfinningaþrunginna samræðna í afmælum, fermingarveislum og kaffistofuspjalli. Hver og einn hefur sína sögu að segja um „bestu” bílana og þá er ekki smuga að malda í móinn. Hjá sumum eru þetta eins og trúarbrögð.
Og nýjasta dæmið um hóp sem telja sig eiga yfirburðarbíla eru rafbílaeigendur – og þá sérstaklega Tesla eigendur sem gjörsamlega tapa sér ef einhver vogar sér að nefna eitthvað sem eigendum passar ekki að heyra. Þræði um þetta má finna á Facebook síðum eins og Rafbílaspjallið eða Rafbílar á Íslandi og sumir eru ansi hreint skemmtilegir.
Umræður grasrótarinnar eru af því góða og þær sýna skýrt hvað er að skora hæst hverju sinni. Í dag eru það rafbílar en árið 1966 voru það ef til vill þýskir sportbílar eða amerískir kaggar eða sænskir Volvoar?
Í gamla daga (ég er 55 ára) heyrði maður, Fiat er drusla, ryðgar um leið og þú sækir hann í umboðið, Peugeot, Citroen og Renault eru allt bílar sem allt snýr öfugt í enda franskir. Skoda er ýmist ódrepandi eða handónýtur, Moskvits og Lada voru búnir til úr afgöngum frá öðrum bílaframleiðendum og Ssangyoung Musso væri bara drusla sem dygði nú ekki lengi. Það fyndnasta er að það eru enn Mussoar á götunum úr fyrstu sendingu Benna af þeim bílum.
Talandi um árið 1966
Einn mest ekni bíll í heimi er einmitt frá árinu 1966. Goðsagnakenndur kaggi sem rataði í eiganasafn James Bond og Dýrðlingsins (e.The Saint). Það er hins vegar ansi venjulegur einstaklingur að nafni Irvin Gordon sem á einn mest ekna bíl í heimi, Volvo P1800, tveggja dyra og rauður en hann hefur ekið bílnum yfir 3 milljónir míla. Annað atriði varðandi þennan bíl – og það kannski pínu fáránlegt er að kúplingin entist 450 þúsund mílur. Flestar kúplingar eru steindauðar um 100 þúsund mílur eða fyrr – en allt eftir því hvernig hugsað er um bílinn.
Irvin passar vel upp á olíu og skiptir reglulega eða um 3000 mílna frestir. Annars hefur ekkert þurft að gera fyrir þennan Volvo annað en hefðbundið viðhald á slithlutum.
Annar bíll frá sama ári er þýskur. Sá er Mercedes-Benz 250 og árið 2014 var hann skráður ekinn um 1,2 milljónir míla. Sá sem keypti bílinn nýjan var Bandaríkjamaður sem ók bílnum um 877 þúsund mílur. Eftir lát upprunalega eigandans tók fjölskyldan bílinn að sér og ók honum yfir milljón mílna markið. Reyndar þurfti bílinn aðeins meira viðhald en Volvoinn hér að ofan en ekur enn (þegar síðast var vitað).
Árið 2004 hafði Gregorios Sachinidis nokkur ekið 1976 árgerð af Mercedes-Benz 240 yfir 2.850 þúsund mílur og var því í öðru sæti yfir þá sem ekið höfðu hvað mest.
Hann var leigubílstjóri og notaði bílinn einng sem einkabíl. Að launum fékk Gergorios nýjan C-Class frá Mercedes í staðinn fyrir 30 ára gamla leigubílinn sinn sem nú hvílir lúið boddý á safni Mercedes í Þýskalandi.
Nokkrir Amerískir hafa líka staðið sig vel
Lincoln Town Car komst í fréttirnar árið 2009 á CNN. Ástæðan var að eigandinn hafði náð að aka bílnum 1.3 milljónir míla. Tekið skal fram að svona bíll er að eyða um 18-20 lítrum á hundraðið. Þessi bíll hafði ekki, á þessum tíma, þurft neinar stórar viðgerðir.
Sá lukkulegi (eigandinn) sagðist aðallega keyra sér til skemmtunar og hefði farið mörgum sinnum frá heimaslóðum sínum í Kansas vítt og breitt, þvers og kruss um öll Bandaríkin. Maður sem sannarlega elskar að keyra!
Kanadamaður einn, Joseph Vaillancourt átti 1963 árgerðina af Plymouth Fury. Joseph ók þessum Plymma nánast allan sinn feril sem leigubílstjóri í Montreal. Hann hafði náð að aka bílnum 1.620 þúsund mílur árið 1999. Upp á þessa tölu vantaði aðeins 264 kílómetra til að bíllinn yrði skráður í Heimsmetabók Guinnes.
Því miður klikkaði það því Plymouthinn var keyrður í klessu af vörubíl sem ók á móti rauðu ljósi. Sem betur fer lifði Joseph þessi slysið af en bíllinn var ónýtur.
Bjalla sem fékk ekki að deyja
Albert Klein var maður sem bjó í Kaliforníu. Sá keypti sér forláta splunkunýja Bjöllu árið 1963. Á 24 árum ók Klein þessi Bjöllunni 1.620 þús. mílur.
Það gekk þó ekki andskotalaust fyrir sig því á þessum tíma var skipt sjö sinnum um vél, þrisvar um gírkassa og hann sleit um 150 hjólbörðum.
Eigandinn sem líklega gæti hafa verið haldinn þráhyggjusjúkdómi skráði einnig niður viðhaldskostnað og eldsneytiseyðslu allan tímann. Það kostaði hann um 38 þúsund dollara að kaupa um 35.600 gallon af bensíni til að ná yfir milljón mílna markið.
Skoda Octavia 1959
Foreldrar mínir eignuðust einn svoleiðis fyrir mína tíð. Í fjölskyldunni glettist heimilisfólkið á því að bræður mínir tveir og mamma hefðu verið meira fyrir aftan bílinn en inni í honum – því alla jafna þurfti að ýta tíkinni í gang. Þessi bíll míglak einnig.
Verkstæðismenn hjá Skoda létu loka sig inni í skotti bílsins meðan sprautað var vatni yfir hann til að sjá hvar lekinn væri.
Samt ferðaðist fjölskyldan á þessu skrani vítt og breitt um landið (það hefur verið þegar allt lék í lyndi í vélarrúmi Skodans) – sérstaklega Vestfirði þar sem vegir voru afleitir og eru sennilega enn. Skodinn var síðan seldur upp á Akranes – en þá var búið að skipta um nánast allt í vél nema blokkina. Eigandinn á Akranesi átti bílinn um árabil og bilaði hann aldrei.
Þeir áreiðanlegustu
Japönum hefur tekist að halda áreiðanleikaskorinu háu á þeim bifreiðum sem þeir framleiða. Til dæmis eru Toyota, Honda og Lexus í toppsætunum á síðustu tveimur áratugum síðustu aldar. Þá verma toppsætin merki eins og Mercedes, Volvo og Mitusbishi. Langoftast kemur þó vörumerki Toyota upp þegar leitað er að „most reliable cars” á veraldarvefnum.
Síðustu ár hafa merki eins og Kia og Hyundai komið inn á topp fimm listann yfir áreiðanlegustu bílamerkin. Volkswagen merkið hefur ávallt verið þekkt fyrir gæði og vermir sæti ofarlega á lista yfir áreiðanlega bíla.
Það er næsta öruggt að kínverskir framleiðendur fara að sjást á listum yfir áreiðanlegustu bíla í heimi.
Endilega deilið reynslu ykkar með okkur hjá Bílablogg.is yfir einstaka og ofurekna bíla sem þið þekkið til á netfangið bilablogg@bilablogg.is
Umræður um þessa grein