„Fregnir af andláti brunahreyfilsins eru stórlega ýktar.“ Með þessari skírskotun í fleyg orð sem Mark nokkur Twain lét falla um „eigið andlát“, hefst grein á BMWblog sem birt var í morgun.
Vill greinarhöfundur með því benda á að brunahreyfillinn sé ekki á förum alveg strax, heldur sé staðreyndin sú að sífellt séu reglur um útblásturgildi hertar og fer það stöðugt lækkandi, eins og flestir ættu að vita.
Þetta, segir greinarhöfundurinn, Adrian Padenau, „hefur neytt bílaframleiðendur til þess að setja sótsíur [e. Particulate filters] í bíla,“ alla vega í sumum heimshlutum. „Það hefur spillt þeirri fögru músík sem almennileg bensínvél gefur frá sér.“
Hvað með þessi fögru hljóð?
Hann segir enn fremur að eftir því sem rafvæðingin festist betur í sessi, komi óhjákvæmilega að því „að gullaldarskeiði brunahreyfilsins ljúki,“ skrifar hann eins og syrgjandi skáld. Jú, fyrr eða síðar gerist það.
„Það verður mikill sorgardagur þegar að því kemur. Þangað til verða gerðar kröfur um að minna heyrist í sportbílum,“ uns þeir þagna algjörlega og halda hljóðlaust inn í rafbílaskeiðið.
Nú var það þýðandi sem gerðist ögn skáldlegur. En jæja, áfram heldur greinin á BMWblog og kemur næst inn á að sumir myndu óhikað halda því fram að forþjappan hafi þegar dregið úr hinu töfrandi hljóði, þeirri fögru tónlist sem brunahreyfillinn gefur annars frá sér þegar hann fær að anda óhindrað.
Þessar vangaveltur höfundar urðu til þess að ákveðið myndband rifjaðist upp fyrir honum:
„Myndband sem tekið var í Hollandi rigningardag nokkurn, þegar BMW-eigendur komu saman. Var samkoman tileinkuð M-útgáfum. Menn létu leiðinlegt veðrið ekkert á sig fá heldur komu þeir saman og sýndu stoltir dýrgripina sína, þar á meðal M6 Coupe E36, með sinn magnaða V10 mótor sem hljómaði svo dásamlega. Það þýðir ekki að hljóðið í nýrri bílum sé eitthvað lélegt, en það er bara eitthvað æðislegt við þennan óhindraða og kraftmikla vélargný,“ skrifar hann.
Padenau, þessi sem greinina ritaði, tekur fram að smekkur manna sé vissulega misjafn og hefur nokkuð mörg orð um mismunandi hljóm í hinum og þessum BMW-inum. Þetta má allt lesa hér en svona í lokin þá má ég til með að birta myndbandið sem hann vísar til í greininni. Nú er mikilvægt að hljóðið sé á lesendur góðir, annars er þetta allt til einskis!
Ætli það megi ekki segja að þetta sé óður til brunahreyfilsins sem greinarhöfundur er, meðvitað eður ei, þegar farinn að syrgja?
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein