Ford Fusion – síðasti fólksbíllinn undir merki Ford á Ameríkumarkaði hættir
Bandaríkin voru svo sannarlega „land hefðbundinna fólksbíla“ um mjög langt árabil, en margt hefur breyst á síðustu árum og núna á dögunum kynnti Ford að þeir myndu hætta með síðasta eiginlega fólksbílinn, þegar tilkynnt var um endalok Ford Fusion.
Bílavefurinn Jalopnik fjallar um þessi endalok Fusion með þessum hætti:
„Svona endar fólksbifreiðin. Ekki með hvelli, heldur með hæglátum hætti. Í vikunni hætti Ford með síðasta hefðbundna fólksbílinn með bláa sporöskjulaga merkinu. Þegar mest var árið 2014 var Fusion smíðaður í 300.000 einingum en Ford tókst aðeins að setja um 60.000 bíla út um dyrnar á fyrri hluta ársins 2020. Augljóst er að það eru sérstæðar aðstæður þegar þú tekur mið af sölutölum 2020, en Ford hefur verið að skipuleggja að fasa út alla bíla sem ekki eru Mustang í nokkur ár núna og það er loksins að gerast núna.
Fusion mun því bætast í hóp Fiesta, Focus og Taurus bræðra sinna í hinu mikla ruslgarði á himni“, segir Jalopnik.
Hlutur meðalstórra fólksbíla hefur verið kjarninn
„Hin meðalstóra fólksbifreið hefur verið grunnurinn í framboði hjá Ford síðan sá hluti varð til. Þeirra á meðal voru Falcon, Maverick, Granada, LTD, Taurus og Fusion. Erfitt væri að segja að einhverjar af þeim gerðum væru sérstaklega spennandi, en margar þeirra voru byltingarkenndar og veittu bandarísku fjölskyldunni nákvæmlega réttan bíl til að komast um þjóðvegina og annað sem leiðin lá. Ég veit að ekki margir munu syrgja það þegar Fusion yfirgefur okkur, en þetta var virkilega góður bíll“, segir Jalopnik-vefurinn.
Ford hætti að taka við nýjum pöntunum fyrir Fusion í febrúar og hafði í hyggju að loka framleiðslulínunni 21. júlí, en vegna kórónavírusfaraldursins var lokuninni ýtt aftur til loka mánaðarins. Síðasti Fusion-bíllinn rann af færibandinu í Hermosa í Mexíkó 31. júlí, samkvæmt frétt frá Ford Authority. Þegar Lincoln Continental hættir í lok árs 2020 mun FoMoCo ekki lengur framleiða neina fólksbíla, nema Mustang og færast yfir í jeppa og pallbíla.
