Ford Bronco Sport aukabúnaður
Ford er á fullu að undirbúa úrval aukahlutapakka fyrir tilvonandi kaupendur nýja Broncosins, Ford Bronco Sport. Þeir hafa nú kynnt fimm splunkunýja útivistarpakka fyrir styttri týpuna. Ford mun afhenda bílana með þeim aukabúnaði sem viðskiptvinurinn getur pantað þegar hann festir kaup á bílnum en pakkarnir eru framleiddir af Yakima.
Það skiptir ekki máli hvort þú ert hjólagarpur eða útlegukappi, þú munt finna rétta búnaðinn sem í boði er í aukahlutabæklingi Ford, segja þeir.
Pakkarnir eru sérsniðnir fyrir hjólasport, vatnaíþróttir, vetraríþróttir, útivistarfólk og að lokum til aukinnar flutningsgetu. Þannig getur þú smellt öllu því dóti sem þú notar með þínu áhugamáli haganlega fyrir á bílinn.
Allskyns útivistarpakkar
Hjólapakkinn samanstendur af toppgrind með neti og hjólafestingum aftan á bílinn, vatnaíþróttapakkinn er með toppgrind fyrir tvo kajaka og markísu, útilegupakkinn inniheldur tveggja manna tjald sem fest er á toppgrind og með markísu og skíðapakkinn samanstendur af öflugum skíðafestingum á þverboga. Mottur fylgja öllum pökkum.
Að lokum geta menn svo fengið rúmgott tengdamömmubox ef meira pláss vantar í ferðalagið.
Þú hannar þinn eigin stíl
Ekki er komið verð á pakkana en Ford segir að þeir sem ekki séu í hjóla, útilegu, vatna eða skíðasporti þurfi ekki að örvænta því hægt verði að sérsníða búnaðinn eftir þörfum hvers og eins úr lista með yfir hundrað vörugerðum í flokki aukahluta sem hægt er að fá setta í bílinn í verksmiðju.
Ford hefur ekki gefið upp hvort stærri Broncoinn verði fáanlegur með svipuðum pökkum en kaupendur munu hins vegar geta valið úr úrvali aukahluta með bílunum þegar afhending hefst seinnipart árs.
