Í liðinni viku var okkur blaðamönnum hjá Bílabloggi boðið á Evrópukynningu hjá kínveska BYD bílaframleiðandanum. Kynningin fór fram í Madrid dagana 19.-21. júní í boði Vatt ehf.
Kínversk bílaframleiðsla á fullri ferð til Evrópu
BYD er einn stærsti rafbílaframleiðandi í heimi. Sé litið til framleiðslu á PHVE (plug-in hybrid) bílum ásamt rafbílum eru þeir langstærsti framleiðandi rafmagns- og rafmagns tengdum bílum.
Og þeir eru að hefja innreið sína á Evrópumarkað með bíla sem standast fyllilega samkeppni á þeim markaði og vel það.
Rafhlöðuframleiðandi sem fer í bílaframleiðslu
Árið 1995 hefur BYD framleiðslu á rafhlöðum í farsíma. Ef þú hefur átt Nokia 3110 til dæmis hefur þú notað vörur frá BYD í Kína.
Þeir framleiða enn rafhlöður fyrir flesta stóru snjallsímarisana, Samsung, Apple og fleiri.
Upp úr aldamótum hófu þeir síðan framleiðslu á bílum og sér ekki fyrir endann á þeirri vegferð enda BYD á fullu inn á nýja markaði.
Vatt ehf. með umboð fyrir BYD
Það er skemmst frá því að segja að viðtökurnar hafa verið algjörlega frábærar á BYD bílamerkinu á Íslandi segir Sonja G. Ólafsdóttir, markaðsstjóri hjá Vatt og Suzuki á Íslandi.
BYD Tang, Han og ATTO3 hafa allir vakið mikla lukku hjá okkur, af þeim bílum er ATTO3 söluhæstur.
Hann er rúmgóður fimm manna fjölskyldubíll, hlaðinn búnaði og á frábæru verði miðað við samkeppnina í dag, segir Sonja ennfremur.
Virkilega fallegur bíll.
Nýjungar í farvatninu
Og það er meira á leiðinni frá BYD. Það er það eina sem við vitum í bili en þeir bílar sem hafa verið kynntir fyrir Evrópumarkað undanfarið lofa verulega góðu. Síðast kynntu BYD splunkunýjan og hagkvæman rafbíl sem þeir kalla Dolphin.
Sá fellur undir flokk smábíla en er þó mun stærri en skilgreiningin gefur til kynna – það er innanrýmið sem er bæði bjart og rúmgott. Dolphin er í sama flokki og Toyota Yaris Cross, VW T-Cross og Citroen C3 Aircross svo eitthvað sé nefnt.
Bíllinn sem íslensku blaðamennirnir fengu til reynslu var splunkunýr Dolphin Comfort.
BYD Dolphin er sérlega huggulegur að innan og innréttingin vönduð og sætin þægileg.
Byltingakenndar rafhlöður
BYD framleiðir svokallaðar Blade rafhlöður en þær eru minni, léttari og leiða betur og með meiri þéttni. Þær eru kóbaltfríar sem gerir þær talsvert náttúruvænni en aðrar til sambærilegra nota.
Rafhlaðan er byggð upp með svokölluðum „honeycumb” strúktur sem gerir hana níðsterka.
Blade rafhlöðutæknin gefur meiri drægni. Mynd: BYD.
Undanfarin ár hafa rafbílaframleiðendur keppst um aukna drægni. Þegar drægnin er aðalmarkmiðið liggja rafhlöðuframleiðendur undir pressu um að búa til eins þéttar rafhlöður og unnt er.
Það er vegna þessarar óhagkvæmu áherslu á „orkuþéttleika“ sem öryggi hefur verið hliðrað frá þróun rafhlöðu.
Blade rafhlaða BYD miðar að því að gera eins öruggar rafhlöður og frekast er unnt. Þær þola betur hita og eru sterkari.
BYD – build your dreams
BYD var stofnað í febrúar 1995 og er hátæknifyrirtæki sem leggur áherslu á tækninýjungar til betra lífs. Eftir 27 ára þróun hefur fyrirtækið stækkað úr 20 starfsmönnum í um 290.000, með yfir 30 starfssvæðum og meira en 40 útibúum um allan heim.
Nafnið mætti einfaldlega þýða; láttu drauma þína rætast.
Smábíll með mikla drægni
BYD Dolphin bíllinn er boðinn í fjórum útfærslum og með tveimur rafhlöðustærðum – annarsvegar 45 kW og hins vegar 61 kW. Drægni þessara rafhlaða er frá 310-427 km. skv. meðaltali.
Ef við tökum stærri rafhlöðuna sem dæmi er hún að gefa um 204 hestöfl.
Hægt er að hlaða hana með allt að 88 kW á klukkustund í hraðhleðslu og 11 kW í heimahleðslustöð. Við fjöllum ítarlega um bílinn á vefnum okkar með grein, myndbandi og myndum innan skamms.
Kynningin fór fram á spænsku sveitasetri.
Það er skemmst frá því að segja að BYD kynnti bílinn á afar skemmtilegan máta. Boðið var til kynningar á spænsku sveitasetri þar sem tekið var á móti blaðamönnum með grillmat að hætti Madridarbúa.
Að hádegisverði loknum var síðan rennt í gegnum helstu þætti bílsins og búnaði hans. Seinni part dags var síðan farið í reynsluakstur um nágrenni Madridar sem endaði síðan með borgarakstri, myndbandagerð og myndatöku.
Um kvöldið var síðan boðið til afar huggulegs kvöldverðar þar sem menn veltu vöngum og spjölluðu við forsvarsmenn BYD um spennandi tíma framundan.
Madrid er falleg borg og vel við hæfi að kynna fallegan bíl í þessari sögufrægu borg.
Við þökkum Vatt ehf. fyrir boðið á kynninguna í Madrid sem var í alla staði frábær og afar upplýsandi fyrir starfsemi BYD og markmið þeirra í Evrópu.
