Fyrir fáeinum mánuðum bættist enn einn kjörgripurinn við fagran bílaflota Samgönguminjasafnsins að Ystafelli. Það er Armstrong Siddeley Hurricane, árgerð 1946 en aðeins 2.606 eintök voru framleidd af þessari snotru gerð.
Það er margt merkilegt við þessa tilteknu tegund, sem og framleiðandann Armstrong Siddeley. Það er best að við hefjum söguna í Englandi en ljúkum henni svo hér á Íslandi. Nánar tiltekið á Ystafelli. Þetta verður stutta útgáfa sögunnar, gangi allt að óskum!
Með gæðastaðla flugvélaframleiðslu að leiðarljósi
Armstrong Siddeley varð til árið 1919, stofnað af þeim Armstrong Whitworth og Siddeley-Deasy, og var einkum þekkt fyrir framleiðslu á eðalbílum og flugvélamótorum á upphafsárunum. Árið 1935 sameinaðist framleiðandinn Hawker Aviation og varð mikilvægur hlekkur í hernaðarstússi Breta.
Ættum við flest að kannast við Hawker Hurricane, vélina sem… já, það er víst rétt að sýna sjálfstjórn og birta bara mynd og hér er hlekkur á frekari umfjöllun um þá merku vél.
%20Large.jpeg)
Það er nefnilega þannig að undirrituð er forfallinn skýjaglópur og flugáhugamanneskja ofan á allt bílastússið. Þess vegna hætti ég strax að fjalla um Hawker Hurricane áður en þetta breytist í „flugvélablogg“.
Nema hvað! Fyrir vikið rauk framleiðsla í gang um leið og heimsstyrjöldinni síðari lauk og fyrsti „eftirstríðs-bíllinn“ var tilbúinn þann 8. maí 1945. Armstrong Siddeley var á meðal fyrstu bresku framleiðendanna til að „setja allt á fullt“ að stríði loknu.
Og bíllinn fékk nafn við hæfi: Armstrong Siddeley Hurricane.
Þeir voru smíðaðir eftir svipuðum gæðastöðlum og flugvélarnar sem frá framleiðandanum komu.
Hafa margir látið í veðri vaka að gæðastaðallinn hafi verið of hár í samanburði við fjöldaframleiddar gerðir á markaði þess tíma. Enda reyndist framleiðslan of dýr og bílaframleiðslu í nafni Armstrong var hætt með öllu 1960
Til Íslands
Armstrong Siddeley Hurricane voru framleiddir til ársins 1954 og voru víst flestir seldir úr landi.
Sá bíll sem hér er til umfjöllunar var einmitt einn af þeim sem yfirgaf framleiðslulandið þegar í stað og kom þetta tiltekna eintak því alveg nýtt hingað til lands.
Vitna ég hér beint í orð vinar míns Sverris Ingólfssonar á Ystafelli en hann skrifaði eftirfarandi fyrir fáeinum dögum á Facebooksíðu Samgönguminjasafnsins:
„Safnið eignaðist merkilegan bíl á síðasta ári, en það er þessi Armstrong. Þessi bíll kom nýr til landsins og var þá með blæju, fljótlega smíðaði Kjartan Zophoníasson þennan tré topp á hann. Guðmundur Marísson eignaðist bílinn 1963 og átti til febrúar 2021, þegar Guðmundur lést.“
Heldur Sverrir áfram:
„ Það er svolítið sérstakt að skoða hvaða efni voru notuð þegar þessi bíll var smíðaður, það er tré grind í yfirbyggingunni, svo er járn og ál notað til skiptis og svo klætt að utan með áli, þetta sést vel ef myndin innan úr skottlokinu er skoðuð.“
„Armstrong notaði „self changing gearbox“ í þessa bíla, þetta er 4ra gíra næstum því sjálfskifting, 4 stjörnugírar stjórnað með takka við hliðina á stýrinu. Það voru bara framleiddir 2606 svona bílar,“ skrifaði Sverrir Ingólfsson á Ystafelli um þennan merka bíl.
Við þetta má bæta að árið 1928 hóf Siddeley samstarf við Walter Gordon Wilson en það var nú maðurinn sem fann upp skiptinguna sem Sverrir minntist á í færslunni. Skiptingin (eða gírkassinn) var markaðssett með slagorðinu „Cars for the daughters of gentlemen“. Svo fínn var hann að bíllinn var við hæfi dætra herramanna.
Sómabíll fyrir sómastúlkur sómamanna.
Sverrir ætlar aðeins að snyrta bílinn til en hefur hugsað sér að varðveita Armstong Siddeley Hurricane í því ástandi sem hann er.
Saga framleiðandans Armstrong Siddeley og fínar myndir má sjá á vef Coventry Telegraph. Meira um nákvæmlega þessa gerð má lesa hér .
Og svo rakst ég á vel unnið myndband af bíl Ola nokkurs Malm. Bíllinn er af sömu árgerð og bíllinn á Ystafelli en ekki veit ég af hvaða árgerð Ola Malm er. Hann gæti vel verið árgerð 1946 líka en látum það liggja á milli hluta og hér er myndbandið:
Ljósmyndin efst er frá Sigurði Harðarsyni og er hún tekin þann 17. júní 1977. Aðrar myndir fylgdu Facebookfærslu safnsins og var gefið grænt ljós á birtingu þeirra hér á Bílabloggi. Fleiri myndir er að finna hér á Facebook-síðu safnsins og endilega látið ykkur líka við þá fínu síðu.
Fleiri greinar sem tengjast hinu magnaða safni:
DeLorean kominn á Ystafell!
Samgönguminjasafnið á Ystafelli
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
