Heildarvegalengdin sem hver og einn ökumaður leggur (vonandi) að baki í dag er í kílómetrum talin 636 og þar af er sérleiðin 255 kílómetrar. Þetta er vonandi ágætur undirbúningur fyrir morgundaginn en hann verður sko strembinn. Eknir verða alls 707 kílómetrar en sérleiðin er 465 kílómetra löng. Sú lengsta í öllu rallinu.
Í heildina verða í rallinu eknir 8.375 kílómetrar og sérleiðir sem keppt er á eru samtals 4.258 kílómetrar af heildinni.
Þetta á við um alla flokka aðra en fornbílaflokkinn (Classic). Þar er heildarvegalengdin 6.133 kílómetrar og sérleiðirnar þar af 2.612 kílómetrar.
Í dag skipta dekkin mestu máli
Ekið er fra Al Artawiyah til Al Qaisumah og rétt eins og annars staðar í eyðimörkinni mega menn búast við góðum skammti af sandi. Ef þetta væri myndskeið en ekki grein myndi óma hér undir íslenska útgáfa lagsins „Return to Sender“ sem í flutningi Hauka (hljómsveitarinnar) árið 1975 nefndist „Þrjú tonn af sandi“.
Segir í upplýsingum keppnishaldara um leiðina að fyrsti hluti hennar sé nokkuð strembinn. Annar hluti virðist auðveldari, tæknilega séð, en í raun og veru skarist þarna nokkrar leiðir (kann illa við að nota orðið „gatnamót“ um eitthvað í eyðimerkurlandslagi) og því töluverð hætta á að keppendur villist, þurfi að snúa við og tapi dýrmætum sekúndum meðan þeir reyna að ná áttum.
Hér segja þeir skipta öllu máli að velja réttu dekkin til að ljúka leiðinni án andstyggilegra uppákoma.
Skemmtileg tölfræði
Tölfræði getur verið ákaflega skemmtileg, einkum og sér í lagi þegar aðrir hafa séð um útreikningana. Hér eru nokkrar skemmtilegar staðreyndir með tölustöfum og bókstöfum:
Allt í allt taka 1.065 ökumenn þátt í Dakar 2022. 750 ökumenn og aðstoðarökumenn keppa í Dakar rallinu og 315 í fornbílaflokki en sá flokkur lýtur öðrum lögmálum, eðli máls samkvæmt.
Skiptist þetta svona* eftir reynslu þátttakenda (athugið að fornbílaflokkurinn er ekki talinn með):
Nýliðar: um 50%
Sprellifandi hetjur eða kempur í sportinu sem allir eiga að þekkja (Carlos Sainz o.fl.): 35%
Keppendur frá Motul: 15%
*þetta er ekki hárnákvæmt en ég þurfti að reikna smá og er af málabraut.
Fólk frá 63 löndum er þarna samankomið og teljast þá með allir sem tengjast liðunum sem keppa.
Af þeim 60 konum sem taka þátt í ár keppa 34 þeirra í fornbílaflokki.
Fimm áhafnir eru kvenáhafnir.
En af ökutækjum er það að segja að alls eru þau 578 talsins: 149 mótorhjól, 21 fjórhjól, 97 bílar, 58 trukkar, 44 ökutæki keppa í T3 og 61 í T4 (flokkar skilgreindir annars staðar). Fornbílarnir eru 128 og forntrukkarnir 20.
Aðeins meira af þessari ágætu tölfræði
Frakkar eru fjölmennastir þjóða í keppninni en alls eru þeir 196, 81 Spánverji keppir og 67 Hollendingar. Annars koma þátttakendur, sem fyrr segir, frá 63 löndum (eða þjóðarbrotum – of flókið til að fjalla um í þessu samhengi).
Ekki veit ég hvernig svona lagað er talið en keppnishaldarar segja að 4.3 milljónir manna um heim allan fylgist með Dakar rallinu og 70 sjónvarpsstöðvar í 190 löndum sýna rallið í imbakössum heimsins. Ótrúlegt en satt, þá er engin norræn stöð á listanum. Það er fúlt.
Hvað um það! Við fylgjumst með hvernig þetta fer í dag og meira um það eftir nokkur tonn af sandi.
Umræður um þessa grein