Bíllinn sem náði ekki að verða rallýbíll

Bíllinn sem náði ekki að verða rallýbíll

Nú hefur nýju ljósi verið varpað á talsvert gamalt mál og tilraun Mitsubishi til að koma með sambærilegan bíl og Audi Quattro og Ford RS200 á toppi rallý tímabilsins. Þetta gerist eftir að áður óséðar opinberar skissur af fjórhjóladrifnum Starion fundust í skjalasafni.

Þessar hugmyndir að bílnum voru sendar einum umboðsmanni Mitsubishi í Bretlandi árið 1984.

Talið er að þær sýni svart á hvítu að Mitsubishi var alvara með smíði 200 eintaka Starion 4WD bílsins og stimpla sig þannig inn í rallýheiminn.

Átti að vera jaxl

Mitsubishi Starion 4WD er þannig einn af „týndu bílum“ rallýheimsins samhliða hinum afturhjóladrifna Ford Escort RS1700T (RS200 kom í staðinn fyrir þann Ford) og Audi Quattro Sport með millistærðar vél.

Audi-inn sá var í prófunum í gömlu Tékkóslóvakíu þegar fréttir af bílnum komustu í hámæli og var síðan í kjölfarið sleginn af.

Mitsubishi Starion 4WD var þróaður af Ralliart teyminu í Bretlandi undir stjórn fyrrum ökumannsins Andrew Cowan með aðstoð frá fyrrum Audi tæknimanninum Alan Wilkinsson.

Hann átti að vera með 2,0 lítra vél í framleiðsluútgáfunni – í raun uppfærð útgáfa af Lancer-mótornum.

Laufléttur og aflmikill

Vélin átti að skila um 350 hestöflum og byggingarefni bílsins, koltrefjar og Kevlar plastefni áttu að halda þyngd bílsins í rétt rúmlega tonni.

Þessar tölur hefðu líklega verið traustur samkeppnisgrunnur fyrir bílinn – allavega þar til Quattro og Peugeot 205 Turbo 16 komu til sögunnar árið 1985.

Aðalmunurinn á aldrifsbílnum og hefðbundnum Starion var drifkerfið. Rallý útgáfan átti að vera fjórhjóladrifin. Einnig hafði sérstökum framljósum bílsins sem opnuðust upp að framan verið skipt út fyrir hefðbundnari ljósabúnað.

Það gerði Cowan og hans mönnum kleift að stytta bílinn talsvert að framanverðu og þar með létta svolítið og troða í hann öflugu kælikerfi.

Frumgerðin náði sjötta sætinu

Í bréfinu fyrrnefnda til breska umboðsmannsins kom fram að Mitsubishi ætlaði að framleiða 200 sérmerkt og númeruð eintök bílsins og kynna hann svo á British motor show árið 1984.

Planið var síðan að bíllinn yrði þátttakandi í Miles Pistes rallýinu, sterkri og grjótharðri keppni sem haldin var á risastórri herstöð í Suður-Frakklandi. Það náði fram að ganga að því leyti til að frumgerð bílsins tók þátt og Starion lenti þar í sjötta sæti undir stjórn reynsluakstursbílstjórans Lasse Lampi.

Frumgerð bílsins var einnig sýnd á alþjóðlegum viðburði á RAC rallinu árið 1984. Verkefnið dróst hins vegar sífellt á langinn og á meðan ætlað var að bíllinn yrði framleiðsluhæfur var B flokkur rallsins lagður og þar með hinn merkilegi Mitsubishi Starion.

Forveri Galant VR-4

Vinnan við bílinn var þó aldeilis ekki öll til ónýtis því Mitsubishi og sér í lagi Ralliart notuðu reynsluna varðandi vél og skiptingu og yfirfærðu við hönnun og framleiðslu á Galant VR-4 sem passaði sem keppnisbíll í A grúppu.

Sá bíll sigraði fyrstur Mitsubishi bíla í WRC og sannfærðust þá Mitsubishi menn enn frekar um að halda áfram á sömu braut. Lancer Evo fór síðan á kostum í fjórum heimsmeistarakeppnum undir stjórn Tommi Makinen.

Byggt á grein Autoexpress.

[Birtist fyrst í maí 2021]