Febrúarmánuður er frægur hér á landi. Frægur fyrir veður sem er eflaust með því versta í heimi sé mið tekið af höfðatölu. Svo vont var veðrið í febrúar bæði 1981 og 1991 að bílar tókust á loft og Engihjallinn í Kópavogi varð frægur, rétt eins og sjálfur febrúar. Þá var nefnilega „fokið í flest skjól“ í orðsins fyllstu.
Fréttamanni nóg boðið
„Þetta er hið ógeðslegasta veður á alla lund,“ sagði fréttamaðurinn Óðinn Jónsson í útvarpsfréttum þann 3. bebrúar árið 1991. Það er nú ekki oft sem fréttamenn nota orðið „ógeðslegt“ en þarna var mínum fyrrum kollega, Óðni Jónssyni, svo endanlega nóg boðið af veðurofsanum að orðið ógeð var vel við hæfi til að lýsa því sem boðið var upp á af veðurúrvali náttúrunnar. Hlusta má á upptökuna af frétt Óðins hér.
Enda eru þessi ósköp sem Íslendingar upplifðu í febrúar 1981 og 1991 enn með versta veðri sem gengið hefur yfir landið frá því orðasambandið „vont veður“ varð til. Eða svo gott sem.
Í desember 2015 var í fréttum RÚV rætt við Trausta Jónsson veðurfræðing og hann minntist þar á fyrrnefnd ósköp ´81 og ´91:
„Verstu veðrin, sem hafa orðið síðustu öld og kannski rúmlega það, eru veðrið 1991 en aldrei hefur orðið meira tjón í einu óveðri en þá. Síðan er það 1981, 1973, 1953, 1936 og svo kannski árið 1900 […]. Árið 1908 fuku líka flestar hlöður á Suðurlandi en þess ber að geta að þá voru slík mannvirki mun lélegri en í dag,” sagði Trausti.
Færri hlöður fjúka nú
Það eru færri hlöður á Suðurlandi sem geta fokið í óveðrinu núna en hins vega fleiri ökutæki og hjólhýsi eins og Trausti kom skemmtilega inn á í sömu frétt og vísað var í hér fyrir ofan:
„Það fuku engir tjaldvagnar eða hjólhýsi fyrir hundrað árum og almennt er það mun meira sem getur fokið í dag heldur en snemma á síðustu öld. Síðan er misjafnt hvar veðrið ber niður. Eðlilega verður meira tjón ef það gerir fárviðri í þéttbýli heldur en í dreifbýli þar sem minna er af mannvirkjum og munum.”
Trausti sagði líka að ljóst væri að veðrin 1991 og 1981 væru einhver þau alverstu sem sögur færu af hér á landi.
Það er um að gera að rifja þetta upp til að minna á að ekkert sé svo vont að það geti ekki versnað en líka til að minna á að þetta hefur sko verið mun verra en það er núna. Með fullri virðingu fyrir leiðindunum sem gengið hafa yfir landið síðustu klukkustundrnar með tilheyrandi óþægindum og tjóni.
Bílar tókust á loft og bústaður fauk í heilu lagi
Sem fyrr segir þá var urðu tugþúsundir Íslendinga fyrir tjóni vegna veðurofsans þann 3. febrúar árið 1991. Þann dag varð nefnilega mesta tjón sem orðið hefur á mannvirkjum í einu fárviðri hér á landi, að þávirði meira en 1 milljarður króna.
Annað af langbylgjumöstrunum á Vantsendahæð hrundi í óveðrinu, í Önundarfirði fauk sumarbústaður á haf út í heilu lagi og í Hrunamannahreppi splundraðist fjárhús.
Já, þó að rafmagn hafi sums staðar farið af í nótt og svona þá er þetta kannski ekkert 1991-veður.
„Engihjallaveðrið“ sem frægt er vísar þó aðallega til veðurofsans árið 1981 þó svo að Engihjallinn hafi endurvakið frægð sína áratug síðar með sendingum bíla í loft upp og fleira í þeim dúr.
Hér er myndband þar sem sjá má dálítið af því sem hér hefur verið fjallað um, einkum tengist myndefnið bílum (að sjálfsögðu) en þess ber að geta í tengslum við myndbandið að þar gleymdist alveg að setja einhvers konar músík þannig að ef áhorfendur eru búsettir á Íslandi ætti að duga að opna glugga og þá er svipað hljóð komið.
Tengt efni:
Þá snjóaði í „helvíti“: Ófært í Istanbúl
Þá sjaldan það snjóar á þessum slóðum
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein