Aston Martin afhjúpar Corgi módel í fullri stærð af DB5 bíl James Bond
Flestir sem áhuga hafa á bílum þekkja hin vinsælu bílamódel frá Corgi, sem hafa glatt marga áratugum saman, en þessir lítlu bílar úr málmsteypu hafa verið þekktir fyrir að vera mjög nákvæm eftirmynd bílanna sem þeir sýna, og oft búnir mörgum smáatriðum sem virka.
Nú hefur ASTON MARTIN afhjúpað endurgerð í fullri stærð af hinni frægu gerð Corgi af DB5 frá 1965 úr James Bond myndinni Goldfinger.
Bíllinn er til sýnis í Battersea Power Station í London, og er tilgangurinn með þessu risavaxna leikfangi, að fagna þátttöku Aston Martin í Bond-myndum síðan Goldfinger kom út 1964, allt til þessa árs með myndinni „No Time To Die“. Var bíllinn afhjúpaður þann 31. ágúst sl., á sama tíma og stikla úr þessari væntanlegu Bond-mynd var gerð opinber.
Kassinn, sem er 5,66 m langur, 2,7 m á hæð og 2,7 m á dýpt, hýsir einn af DB5 Goldfinger „framhaldsbílum“ Aston Martin, sem að sjálfsögðu er málaður í Silver Birch-lit eins og Bond-bílarnir.
Aðalstjórnandi Aston Martin á sviði hönnunar, Marek Reichman, afhjúpaði módelið ásamt Chris Corbould, samhæfingaraðila tæknibrellna í fjórtán Bond-myndum sem einnig hjálpuðu til við að búa til Goldfinger framhaldsseríuna.
Goldfinger „framhaldið“ er hluti af röð 25 DB5, sem smíðaðir eru af Aston Martin Works, minjasviði fyrirtækisins.
Hvert eintak er með „græjur“ sem virka eins og sást í Goldfinger, þar á meðal snúningsnúmeraplötur, skothelda hlíf að aftan, framlengingar að framan og vélbyssur sem hægt er að láta skjótast út í stað stefnuljósanna.
Goldfinger „framhaldsbílarnir“ eru heldur ekki löglegir í akstri á vegum – löggan hefur eflaust tilhneigingu til að horfa með athygli á snúningsnúmeraplötur – þannig að eigendur þurfa að takmarka aksturinn á Bond-bílunum við sína eigin landareign.
Komandi Bond-kvikmynd, „No Time To Die“, sem verður frumsýnd í Bretlandi 30. september, inniheldur heilan hóp Aston Martin-bíla, þar á meðal DB5, V8, DBS og væntanlegan Valhalla ofurbílinn. DB5 sem er á ferðinni í myndinni er hins vegar ekki upprunalegi Bond bíllinn.
Litli Corgi-módelbíllinn af DB5 Bond með virkum græjum hefur reynst ótrúlega seigur og yfir 20 milljónir eintaka verið seld. Módelið er enn í framleiðslu.
Upprunaleg módel frá 1965 geta selst á allt að 500 pund.
James May, gestgjafi Grand Tour hjá Amazon Prime Video (og áður í Top Gear), skrifaði fyrir Sunday Times Driving og kallaði Corgi DB5 merkasta bílinn sem gerður hefur verið: „Barnæskan er mótandi og við sem elskum bíla elskuðum þá fyrst sem leikföng,“ sagði hann.
Marek Reichman sagði við kynninguna á „stóra módelbílnum“: „Það er mikill heiður fyrir okkur að marka upphafið að „No Time To Die“- herferðinni í dag með þessari spennandi afhjúpun. Samband Aston Martin við James Bond spannar áratugi og DB5 er án efa frægasti bíll í heimi eftir þetta 50 ára samstarf.“
„Að vinna með EON Productions og Chris Corbould við að smíða 25 eintök af DB5 Goldfinger „framhaldinu“ var sannarlega einstakt verkefni fyrir alla hjá Aston Martin. Nú er alveg framúrskarandi að vinna með Corgi – öðru merkilegu bresku vörumerki – og að sjá dáðasta bíl James Bond inni í stórum leikfangakassa í miðborg London er alveg magnað,“ sagði Reichman.
Sýningin við Battersea rafstöðina í London stendur til 1. október.
(frétt af vef The Sunday Times Driving)
