Amma Önd hefur alla tíð ekið rafbíl

Amma Önd hefur alla tíð ekið rafbíl

Amma Önd eða Andrea, eins og hún heitir „fullu nafni“ á íslensku, hefur ekið um á rafbíl síðan Walt Disney kynnti hana til leiks árið 1943. Bíllinn sem um ræðir er af gerðinni Detroit Electric og var bíllinn sá vinsælasti rafbíllinn vestra þegar hann kom á markað fyrir tæpum 120 árum.

Andabær er auðvitað ekki til á landakortinu en það skiptir ekki öllu máli. Andabær hefur nú betri strúktúr en margir bæir sem finnast á kortum. Félagi minn benti mér á skemmtilegan greinarstúf á dönsku útgáfu Quora og þar er fjallað um rafbíl Ömmu Andar.

Bíll fyrir fínar dömur

„Það er engin tilviljun að Amma Önd aki um á Detroit Electric rafbíl, en bíllinn var annálaður dömubíll. Hann fékkst með gardínum, mjúkum plusssætum og blómavösum. Þeir voru kallaðir glerskápar á hjólum,“ segir á Andabæjarvefnum danska Andeby.dk.

Enn fremur segir þar að Amma Önd aki sjaldnast mjög hratt, enda komist rafbíllinn hennar ekki sérlega hratt. Detroit Electric komst rétt yfir 30 km/klst en það virðist alveg nóg fyrir Ömmu Önd sem best kann við sig heima á sveitabænum og fer einna helst með grænmeti, egg og tertur á sveitamarkaðinn. Þá er nú eins gott að aka ekkert of hratt.

Meira um bílinn

Þó að Amma Önd hafi verið kynnt formlega árið 1943 þá var hætt að framleiða Detroit Electric rafbílinn árið 1939. Frá 1907 til 1939 voru smíðuð 13.000 eintök af Detroit Electric og var drægnin alveg ótrúleg að mínu mati: Hann komst um 130 kílómetra á hleðslunni. Í einni prófun framleiðandans komst bíllinn 340 kílómetra á einni hleðslu, að því er fram kemur á Wikipedia.

Af hverju var hann vinsæll „dömubíll“?

Sem fyrr segir var Amma Önd ekki eina daman sem vildi aka um á Detroit Electric heldur voru dömur almennt hrifnar af þessum netta bíl. Ástæðan mun meðal annars hafa verið sú að ekki þurfti að hafa mikið fyrir að koma bílnum í gang.

Hann einfaldlega fór í gang en marga aðra bíla þess tíma þurfti að snúa í gang og það var ekki endilega spennandi kostur fyrir prúðbúnar dömur.

Amma Önd er ekki eina fræga „persónan“ sem átti bíl af þessari gerð þótt hún sé vafalaust frægasta öndin. Thomas Edison átti Detroit Electric, John D. Rockefeller Jr. sömuleiðis sem og þær Mamie Eisenhower og Clara Ford.

Nokkur fjöldi Detroit Electric er til í dag og eru eintök á hinum ýmsu bílasöfnum. Má þar til dæmis nefna Forney samgönguminjasafnið í Denver, Colorado og belgíska safnið AutoWorld í Brussel. Sjálf sá ég eintak á Henry Ford safninu í Dearborn í  Michigan en virðist ekki hafa haft rænu á að taka ljósmynd af því!

Hins vegar hef ég tekið mynd af upplýsingaspjaldi við bílinn en það er hér:

Þetta var sagan af bíl Ömmu Andar og ekki hika við að senda mér tillögur að umfjöllunarefni! Það er alltaf gaman að fá uppástungur frá lesendum!

Annað úr teiknimyndasögunum: 

Bílarnir 216 í Tinnabókunum

Og sitthvað um rafbíla fyrir margt löngu: 

Á blússandi ferð á rafbíl 1899

Hvenær var fyrsti rafbíllinn smíðaður og hvenær var fyrsti tvinnbíllinn smíðaður?

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.