Áhöfn Apollo 12 og Corvetturnar

Þó fæstir kunni að tengja Corvettur við geimferðir og NASA þá er tengingin nú samt sterk og hefur verið lengi. Corvettur geimfaranna þriggja, áhafnar Apollo 12, eru sennilega þekktastar í því samhengi.

Corvetta fyrir $1

Alan Shepard fékk Corvettu, hvíta af árgerð 1962, fyrir að vera fyrsti Bandaríkjamaðurinn til að fara út í geiminn en það gerði hann árið 1961. General Motors gaf honum bílinn. Í kjölfarið gerði kappaksturshetjan og umboðsaðili Chevrolet og Cadillac í Flórída, Jim Rathman, samkomulag við NASA til þess að aðrir geimfarar gætu einnig eignast Corvettu.

James Irwin, Alfred Worden, og David Scott á sínum Corvettum fyrir aftan Lunar Roving bílinn sem nota átti í Apollo 15 leiðangrinum. Myndin er tekin þann 29. apríl 1971 í Mojave eyðimörkinni.

Samkomulagið var á þá leið að fyrir einn dal fyrir á ári (hafði sennilega eitthvað með gjafagjörning að gera – þá var þetta ekki gjöf heldur „leigðu“ mennirnir bílana) gátu þeir ekið nýjustu gerð Corvettu á eins konar kaupleigu en gátu svo skipt bílnum út fyrir nýjan þegar þeim sýndist.

Það ætti ekki að koma á óvart að þetta varð vinsælt á meðal geimfara og síðast en ekki síst kom þetta ákaflega vel út fyrir Chevrolet.

Hetjurnar óku um á Corvettum. Ekki slæm markaðssetning það!

Áhöfnin á Apollo 12

Þeir Alan Bean, Richard „Dick“ Gordon, and Charles „Pete“ Conrad skipuðu áhöfn Apollo 12 og fóru út í geim og aftur heim í nóvember 1969. Þeir voru virkilega góðir félagar og fór því vel á að þeir kæmu að hönnun og vali á Corvettum sem þeir fengu eftir geimbröltið. Þeir vildu gera eitthvað sniðugt í tengslum við þetta góða boð Chevrolet.

Úr varð að þrjár Corvettur í stíl litu dagsins ljós og voru þær 390 hestafla 427 Stingray coupe í gylltum lit og svörtum. Bílahönnuðurinn Alex Tremulis útfærði hugmyndir tríósins og þótti útkoman býsna flott.

AstroVetturnar

Þær voru nefndar AstroVetturnar, þessar þrjár sem Apollo 12 piltarnir eignuðust. Reyndar er bara ein þeirra til í dag, svo vitað sé, en það er bíll Beans.

Sá bíll er í topp standi enda vel um bílinn hugsað. Danny Reed heitir sá sem hugsar um bílinn en AstroVettan sú er stundum til sýnis á viðburðum sem og sýningum bæði í tengslum við NASA og Corvettur almennt.