Af hverju ek ég rafmagnsbíl?
Er það vegna þess að mér er svo annt um umhverfið að ég get ekki hugsað mér að aka um á bíl sem puðrar út baneitruðum eldsneytisgufum og þar með hellingi af kolefni út í hreina loftið okkar?
Er það vegna þess að rafbílar eru núna næstum gefins vegna ívilnunar stjórnvalda sem hugsuð er til að flýta orkuskiptunum? Samt ætla stjórnvöld að hætta því á miðri leið í orkuskiptunum.
Er það vegna þess að bílar menga mest af öllu og þeir eiga eftir að skipta sköpum þegar á heildina er litið í loftslagsmálum?
Stóra svarið er nei og litla svarið líka. Ég ek um á rafmagnsbíl af því að það hentar mér betur sem bílnotanda.
Þeir eru fyrst og fremst hagnýtari, að mörgu leyti þægilegri og ekki síst eru þeir ódýrari í rekstri á flesta vegu.
Ég hef ekki komið inn á bensínstöð síðan ég festi kaup á mínum rafmagnsbíl nema til að kaupa mér kók og pulsu. Vinslitin við starfsfólk bensínstöðvarinnar í hverfinu mínu eru hætt að koma við mig enda læt ég stundum renna bílnum í gegnum þvottastöð sem er á gömlu bensínstöðinni.
Bíllinn þarf aldrei á smurstöð, hann fer ekki í þjónustuskoðun fyrr en eftir tvö ár frá afhendingu – óháð akstri segja þeir.
Eina sem er líkt með honum og gamla díseljálknum mínum eru dekkin. Ég kýs að aka um á sumardekkjum yfir sumarmánuðina en vetrardekkjum á vetrum.
Þau eru á svipuðu verði hvort sem þau eru notuð fyrir rafmagnsdrifinn bíl og bíl með brunavél.
Hvar eru bílar í breytunni?
Auðvitað þykir mér vænt um jörðina okkar, auðvitað vil ég minnka gróðurhúsaáhrifin, auðvitað vil ég sleppa við að kaupa jarðefnaeldsneyti. En það er einungis vegna þess að efnahagslega kemur það betur út fyrir mig sem bíleiganda. Um 27% af öllum kolefnisútblæstri heimsins kemur frá samgöngutækjum á jörðu skv. EPA, United States Environmental Protection Agency og ekki ljúga þeir. 41% af þessum samgöngutækjum eru einkabílar.
Hversu stórt er kolefnisspor rafbíls?
Þar eru nú menn ekki sammála. Sumir segja að til falli meira kolefni í heild við framleiðslu rafbíls ef litið er til heildarlíftímans.
Mér er svo sem alveg sama um það. Ég ek rafbíl af því að það hentar mér, það og er ennþá ódýrara en að aka bíl sem gengur fyrir jarðefnaeldsneyti. Stóra málið er að manni langar ekki aftur á bíl með brunavél eftir að hafa notað rafbíl í smá tíma. Samt væri gaman að eiga einn dísel, bara til minningar.
Lithium sem notað er í rafhlöður rafmagnsbíla er bölvað eitur sem frekar erfitt er að framleiða. Það fer illa með jarðnæði, mengar vatnsbúskap og vinnslan mengar jarðsvæði.
Aðalmálið er reyndar það að við hér á Íslandi erum ein af fáum jarðarbúum sem notum orku sem framleidd er með litlu sem engu kolefnisspori. Það er hins vegar fátítt í löndum heimsins en rafmagnsframleiðsla á talsverðan þátt í kolefnis útspýtingu í andrúmsloftið.
Megintilgangur með þessum pistli er sá að benda á að það er engin bein og breið braut í loftlagsmálum en margt smátt gerir eitt stórt. Hins vegar mun ég kaupa mér bíl sem hentar mínum efnahag best hverju sinni. Verður ekki að búast við að fleiri hugsi svoleiðis?
