Á því herrans ári
Sjöundi áratugurinn var spennandi í bílaheiminum. Bílaframleiðsla var að breytast og nýjar og öðruvísi gerðir litu dagsins ljós. Við ætlum að skoða fyrst árið 1968.
Dagblaðið Tíminn fór á bílasýningu í London og gerði henni góð skil með sérblaði sem kom út miðvikudaginn 1. nóvember 1967.
Vorið í Prag
En hvað var það sem bílaframleiðendur voru að kynna á þessu ári, þegar bítlaæðið var í algleymingi og hin svokallaða ’68 kynslóð skemmti sér með ófyrirsjáanlegum afleiðingum. Það ár kom vor sem kennt var við borgina Prag í Tékkóslóvakíu, Nasa skellti á braut Apollo númer 8 og við hér á skerinu skiptum yfir í hægri umferð.
GM kom með splunkunýjan Vauxhall Viva og Vauxhaull Vector. Við sem erum fædd um miðjan sjöunda áratuginn munum eftir Vivu, einfaldur og frekar ljótur fólksbíll sem Véladeild Sambandsins seldi uppi í Ármúla 3. Opel kom með nýjan Kadett í tveggja dyra útgáfu og station bíl.
Opel Olympia var kynntur og var bíll á milli Kadett og hins stærri Rekord.
General Motors á fullu
Gjörbreyttar gerðir af Chevelle voru settar á markað og voru þær mestu frá því árið 1964. Breytingarnar fólust að mestu í yfirbyggingu bílanna og voru þeir fáanlegir með V6 og V8 vélum; 140-350 hestafla.
Fimm tegundir gangskiptinga voru auglýstar með nýjum Chevelle og Chevy II. Menn héldu sig við „hesta samlíkinguna” á þessum árum.
Chrysler umboðið Vökull var á þessum tíma í húsi Jóns Loftssonar við Hringbraut 121. Þar fengust AMC bílar og einnig Rambler.
Dodge Dart var kynntur sem sterkur, traustur og góður bíll. Fólk gat valið um 120 útgáfur bíla frá Chrysler.
Sveinn Björnsson í Skeifunni 11 kynnti Saab 1968 sem einn af best gerðu bílum heims. Ástæðan var sögð, framhjóladrif, tvöfalt bremsukerfi, burðarbitar í þaki og bólstrað mælaborð.
Hafrafell í Brautarholt 22 auglýsti nýju gerðirnar af Peugeot 404. Þeir eru sagðir sterkbyggðir, sparneytnir og háir frá vegi, með frábærum aksturseiginlekum og ódýrastir sambærilegra bíla.
Mercedes vakti athygli
Ræsir flutti inn og seldi Mercedes-Benz. Árið 1968 kom athyglisverður bíll frá Mercedes en það var skutbíll á grind af 230 S.
Þessi bíll var sagður hafa vakið óskipta athygli. Hægt var að fá 200 og 230 sem skutbíl einnig.
Hekla auglýsti einfaldlega með stóru spurningarmerki. Getið þér gert betri bílakaup? VW 1200 kostar aðeins 136.000 krónur.
Albert Guðmundsson einn þekktast knattspyrnumaður Íslands fyrr og síðar tryggði sér að sjálfsögðu umboð fyrir Renault meðan hann spilaði knattspyrnu í Frakklandi.
Árið 1968 kom Renault 4 með fjögurra gíra kassa.
Þið fáið meira fyrir peninginn ef þið kaupið Skoda, var slagorð Skoda umboðsins árið 1968. Skoda 1000 MB þótti afar lipur og góður bíll og var hælt fyrir akstur á malarvegum og var eini bíllinn í sínum stærðarflokki með sérstakri grind.
Fiat þótti sterkur
Davíð Sigurðsson var með einkaumboð fyrir Fiat. Árið 1968 auglýsir Davíð Fiat 1100 R. Sá bíll þótti sterkur og hagkvæmur. Rúmgóður, glæsilegur og traustur fjölskyldubíll. Til ryðvarnar er sérstaklega vandað [og ekki veitti af innsk. blm] og er trygging fyrir minna viðhaldi og betri bíl um lengri tíma.
Kynnist Fiat – og Fiat verður valið á nýju bifreiðinni yðar, sagði Davíð í lokin.
Kaninn klikkaði ekki
Það var svo Rambler Rebel sem Jón Loftsson kynnti ásamt Rambler Ambassador. Rebelinn var nú með al-samstilltum gírkassa. Nánari upplýsingar um þessa Rambler-bíla ásamt upplýsingum um aðrar Rambler tegundir veitum vér fúslega, segir Jón Loftsson. Komið, hringið eða skrifið – og hana nú.
Flottur Javelin
Að endingu segjum við hér frá auglýsingu Jóns Loftssonar á AMC Javelin. Þetta var kallaður 2 dyra fjölskyldu og sportbíll í senn. Verðið verður líklega frá 360.000. Þá er miðað við að bíllinn sé þriggja gíra beinskiptur og gírkassinn al-samstilltur í alla gíra.
Að sjálfsögðu má líka fá gegn aukagjaldi: sjálfskiptingu, gólfskiptingu vökvastýri, aflhemla og m.fl. Vélin er 6 cyl. 145 hestöfl. Hægt er líka að fá Javelin 8 cyl. 200, 225 eða 280 hestöfl.
Í febrúar á næsta ári (1969) verður hægt að fá bíllinn með um það bil 340 hestafla vél.
Myndir héðan og þaðan af vefnum.
Umræður um þessa grein