Mercury Montclair var bifreið í fullri stærð framleidd af Mercury deild Ford Motor Company. Mercury Montclair frá 1956 er klassískur bíll og er hluti af annarri kynslóð Montclair gerðanna, sem voru framleiddar frá 1955 til 1956.
Var fluttur inn til að gera upp
Bíllinn hans Gunnars kom hingað til lands á tíunda áratugnum og var þá orðinn ansi slappur, ryðgaður og illa farinn. Hann var fluttur hér inn til uppgerðar.
„Ég kaupi bílinn af strák í Keflavík sem hafði flutt hann inn og var byrjaður á að gera hann upp. Búið að ryðbæta og laga.”
Gunnar, ásamt góðum vinum kláraði síðan bílinn um aldamótin síðustu.
„Ég tók bílinn alveg í gegn,” segir Gunnar. Undirvagn, vél, innrétting og allt gert upp. „Hann hefur verið eins og nýr síðan árið 2000.”
Verst að fá í innréttinguna
Bíllinn er gerður upp með það að markmiði að verða sem næst upprunanum. Það er jafnvel betra að ná í varahluti í þessa bíla núna en í gamla daga að sögn Gunnars.
Það tók smá tíma að finna það sem vantaði í hluta innréttingar, annars var þetta lítið mál.
Mercury Montclair 1956 var með fallegri og áberandi hönnun sem var dæmigerð fyrir bíla frá miðjum sjötta áratugnum.
Hann var með stóru og miklu grilli með láréttum krómstöngum, flottum framljósum og mikið króm var allstaðar á bílnum.
Þótti flottur bíll
Montclair var fáanlegur í ýmsum gerðum, þar á meðal 2 dyra harðtoppur, 4 dyra fólksbíll og sem blæjubíll.
2ja dyra harðtoppurinn var sérstaklega vinsæll og er oft talin ein eftirminnilegasta útgáfan af Montclair. Bíll Gunnars er einmitt af þeirri gerð.
Montclair 1956 var með nokkuð öflugri V8 vél. Mercury bauð upp á nokkra vélarvalkosti, þar á meðal 312 cid (5,1 lítra) V8 sem framleiddi mismunandi hestöfl eftir uppsetningu og búnaði.
Þessi Mercury er með 312 kúbika vél sem gefur 235 hestöfl, sjálfskiptur.
Viðskiptavinir gátu valið á milli þriggja gíra beinskiptingar með eða án yfirgírs eða Merc-O-Matic sjálfskiptingar.
Tími krómsins
Montclair var með stílhreina og þægilega innréttingu með mælaborði skreytt krómi og tveggja tóna litasamsetningu.
Bíllinn var búinn ýmsum þægindum þess tíma, þar á meðal var hægt að fá hann með rafmagni í rúðum og sætum.
Mercury Montclair 1956 var tiltölulega vinsæll á sjötta áratugnum og höfðaði til kaupenda sem voru að leita að blöndu af flottu útliti og góðri frammistöðu.
Hins vegar stóð Montclair frammi fyrir harðri samkeppni frá öðrum bílaframleiðendum, sérstaklega frá General Motors og Chrysler.
Montclair gerðin hélt áfram að vera til hjá Mercury í nokkur ár í viðbót, en ’55 og ’56 bílarnir eru þeir sem þykja hvað eftirminnilegastir og áhugaverðastir af þessum bílum.
