Nýr rafdrifinn BMW iX1 á lokametrunum
Opinberar BMW iX1 prófunarmyndir birtar og 438 km drægni staðfest
BMW hefur birt myndir sem sýna iX1 í vetrarprófun í Svíþjóð
BMW hefur sent frá sér myndaröð sem sýnir iX1 á heimleið eftir vetrarprófun á „lokastigi“ þróunarferlisins. Rafknúni sportjeppinn hefur lokið virkniprófunum í þróunarstöð BMW Group í Arjeplog í Svíþjóð, nálægt heimskautsbaugnum.
BMW kvaðst hafa notað skilyrðin til að prófa aukaálagið sem kalt hitastig mun leggja á rafmótora og rafhlöðupakkann.
Þýski framleiðandinn heldur því fram að nýjasta rafdrifsuppsetningin „noti nýjustu rafhlöðutækni og skynsamlega stjórnaða hitastýringu til að gera stuttan hleðslutíma og langa drægni mögulega, jafnvel við mjög lágt hitastig.
BMW staðfesti einnig að bíllinn verði með tvo rafmótora – einn fyrir hvern öxul – og gaf nokkrar spár um orkunotkun. Þetta eru 18,4 – 17,3 kWh á 100 km samkvæmt WLTP mæligildi, sem gefur 413 – 438 km drægni. Þetta myndi benda til notkunar á rafhlöðupakka sem er svipaður að stærð og 80kWh (74kWh nothæf) einingin sem er að finna í stærri iX3 bílnum.
Nýi iX1 verður inngangspunktur rafjeppalínunnar í München og mun sitja við hlið nýjustu kynslóðar af X1 með brunavél, sem á að frumsýna síðar á þessu ári.
BMW hefur haldið því fram að rafknúni iX1 muni koma í sýningarsal seint á árinu 2023, en þá mun hann eiga fullt af keppinautum, allt frá væntanlegum rafknúnum Alfa Romeo jeppa, Cupra Tavascan, Kia EV4, til núverandi Volvo XC40 P8 Recharge og Mercedes. EQA.
Kynningarmynd sem sýnd var fyrr á þessu ári sýnir hefðbundið BMW-útlit, auk nokkurra nýrri hönnunarþátta sem við höfum þegar séð á öðrum rafknúnum BMW bílum. Nýrnagrillið er ferhyrnt og er minna en á nýja BMW i7 og iX, auk þess sem grillið er með bláa línu umhverfis sem er svipuð og á i3.
Önnur blá lína um neðri loftopin (líklegt er að það sé lokað af í iX1), auk þess sem það eru hefðbundin hönnun með tvöföldum framljósum sem notuð er á flestum öðrum BMW gerðum.
Núverandi X1 fékk andlitslyftingu á miðjum aldri árið 2019, sem þýðir að rafknúni iX1 verður hluti af næstu kynslóð X1 línu sem er væntanleg á næsta ári.
Enn á eftir að staðfesta allar forskriftir fyrir iX1, en við gerum ráð fyrir að nýja gerðin verði byggð á mikið endurgerðri útgáfu af UKL undirvagni núverandi X1.
BMW hefur þegar þróað rafmagnsútgáfu af undirvagni sem styður MINI Electric. Hins vegar ætti iX1 að vera með kerfi næstu kynslóða rafbíla frá fyrirtækinu, (eins og sést á iX3), sem veitir aðgang að 282 hestafla mótor ef þörf krefur.
Með næsta X1 mun BMW stefna að því að koma til móts við eins marga kaupendur og mögulegt er, og taka upp sömu „Power of Choice“ stefnu og í næstu 5 seríu og 7 seríu.
Það þýðir að samhliða rafbílnum verða bensín- og dísilbílar með mildum blendingum, auk tengitvinnbíls.
Eins og BMW iX3 og hliðstæða hans með brunahreyfli, má gera ráð fyrir að hreinn rafknúinn iX1 muni líta næstum því alveg eins út og nýi X1, þar sem eini áberandi munurinn er grill sem er lokað og endurmótaður afturendi, sem er vissulega án púströra.
Framleiðsluútgáfa bílsins ætti einnig að vera með nokkra bláa áherslupunkta, loftaflfræðilega hannaðar álfelgur og merkingar sem gefa til kynna vistvænni útgáfu bílsins.
Ákvörðun BMW um að stækka rafmagnsflota sinn er hluti af víðtækari aðgerðum samstæðunnar til að minnka kolefnisfótspor fyrirtækisins.
Fyrir árið 2030 stefnir BMW að því að draga úr losun koltvísýrings í birgðakeðjunni um 20 prósent miðað við árið 2019, en stefnt er að 80 prósenta samdrætti í losun frá verksmiðjum og öðrum stöðum fyrir 2030.
Fyrirtækið stefnir einnig að því að afhenda tvær milljónir rafknúinna ökutækja fyrir árslok 2025.
(frétt á vef Auto Express – myndir frá BMW)
