ELGUR!!!

ELGUR!!!

Elgsprófið hefur enn og aftur verið í umræðunni að undanförnu. Ræðum aðeins um það.

Hvað er elgsprófið og til hvers er það?

Prófið er gert til þess að finna út hvort bíll höndlar það að sveigja framhjá óvæntri fyrirstöðu á veginum. Fyrirstaðan getur verið dýr, manneskja eða bíll sem bakkar fyrirvaralaust í veg fyrir aðvífandi bíl.

Hvað þarf til að standast prófið?

Að geta sveigt yfir á öfugan vegarhelming með bíl fullan af farþegum og fullhlaðinn og aftur inn á réttan vegarhelming á 70 km/klst hraða á þurru malbiki án þess að hemla og án þess að bíllinn velti eða renni til og fari jafnvel útaf veginum.

Bíllinn þarf sem sagt að láta fullkomlega að stjórn.

Þegar bíll hefur staðist prófið er hann þó prófaður áfram endurtekið við hækkandi hraða þangað til hann hættir að láta að stjórn. Þá er fær hann einkunn í samræmi við frammistöðuna.

Þurfa allir bílar að standast prófið?

Ekki endilega. T.d. er lítill tilgangur í því að reyna að sveigja flutninga- eða vörubíl framhjá fyrirstöðu á þessum hraða, það endar líklega í enn verra slysi. En flestir venjulegir fólksbílar ættu að standast það, það virðist eðlileg krafa.

Ástæður fyrir því að bílar „falla“ á prófinu.

Þyngdarpunkturinn liggur of hátt, fjöðrunin er of svög að framan eða aftan eða bæði. Sumir bílar voru upphaflega hannaðir fyrir bensínvél en svo hefur t.d. rafmótor verið bætt við með tilheyrandi rafgeymum sem settir eru í skottið. Útkoman er tvinnbíll sem skríður til að aftan í elgsprófinu.

Hvað eiga bílaframleiðendur að gera til að bæta bíla sem hafa „fallið“ á prófinu?

Eitthvað svipað og Mercedes-Benz gerðu með A-Klasse; innkölluðu alla selda bíla, endurhönnuðu þá, settu í þá stöðugleikastýringu og bættu fjöðrunarkerfið. En best væri að sjálfsögðu að bílarnir væru almennilega hannaðir í upphafi, þá þarf ekkert að bæta.

Er einhver þörf á þessu prófi?

Já, en kannski ekki eins mikil og þegar elgsprófin hófust í Svíþjóð á áttunda áratugnum.

Það eru einhverjir bílar enn að falla á prófinu eins og nýleg dæmi sanna.

En í flestum tilfellum eru bílar með hemlalæsivörn (ABS) og stöðugleikastýringu (ESP) sem tryggja að í svona aðstæðum geta flestir ökumenn hemlað og stýrt framhjá hættunni.

Lokaorð

Gagnrýnisraddir segja að þó bíllinn sé nógu góður til að standast prófið þá er ekkert víst að ökumenn þeirra geri það. Ökumaður myndi sennilega hemla frekar en að beygja frá hættunni en það er ekki heimilt að hemla í elgsprófinu því það er það sem kallað er rolling test. Ökumenn bílanna eru sem sagt óþekkta stærðin og viðbrögð þeirra eru misjöfn.

Þess má að lokum geta að Trabant stenst þetta próf með glans og Citroën Xantia Activa V6 á metið síðan 1999 sem stendur enn og fór í gegnum þetta próf á 85 km/klst hraða.

Tölvustýrð glussafjöðrun sem bregst hratt við aðstæðum tryggði það.

Myndir: ýmsar bílasíður