Tesla Model 3 söluhæsti rafbíll Evrópu

Tesla Model 3 söluhæsti rafbíll Evrópu

Tesla Model 3 er á leiðinni  að verða söluhæsti rafbíll Evrópu árið 2021

Bílar frá VW og Renault voru ekki langt undan þar sem sala á rafknúnum ökutækjum eykst

Allt bendir til þess að Tesla Model 3 sé að verða mest selda rafknúna farartækið í Evrópu árið 2021 ásamt mikilli aukningu í heildarsölu rafbíla sem aðeins nota rafhlöður.

Sala á Model 3 jókst um 84 prósent í 113.397 bíla fram í nóvember, samkvæmt upplýsingum frá JATO Dynamics markaðsrannsóknum.

Líklegt er að ID3 frá Volkswagen verði í 2. sæti. Sala á ID3 jókst um 125 prósent í 63.109 selda bíla á fyrstu 11 mánuðum.

Renault Zoe, mest seldi rafbíllinn árið 2020, er á leiðinni í 3. sæti. Á 11 mánuðum var sala á Zoe 60.551, samdráttur um 27 prósent.

Model 3 var síðast í efsta sæti evrópska rafbílalistans árið 2019. Í september var hann fyrsti rafbíllinn til að verða mest seldi bíll Evrópu í heildina í mánuðinum, og stóð sig betur en söluhæstu bílarnir með brunahreyfla eins og VW Golf og Renault Clio.

Markaðshlutdeild rafbílasölu í Vestur-Evrópu mun ná 11% meti fyrir árið 2021, spáir Matthias Schmidt, höfundur European Electric Car Report.

Tölurnar eru „mun hærri en upphaflega var spáð“ – að hluta til vegna kreppunnar sem myndaðist vegna skorts á örflögum og hálfleiðurum, sagði Schmidt við Automotive News Europe.

Bílaframleiðendur þrýsta á sölu rafbíla til að halda koltvísýringslosun sinni innan markmiða Evrópusambandsins, sagði Schmidt.

Fyrirtækin eiga á hættu að missa af reglugerðarmarkmiðum sínum vegna þess að þau forgangsraða dýrum bílum með meiri framlegð með meiri útblæstri vegna skorts á hálfleiðurum.

„Á venjulegu ári hefði magn rafbíla sem nota eingöngu rafhlöður (BEV) jafngilt rúmlega 8 prósenta blöndu,“ sagði Schmidt.

Tesla verður í fyrsta sæti í sölu rafbíla í Vestur-Evrópu á þessu ári með sölu upp á um 170.000 eintök, spáði Schmidt.

Hins vegar mun Volkswagen Group, þar sem VW, Audi, Skoda, Porsche og Cupra vörumerkin selja öll rafknúna bíla, vera markaðsráðandi rafbílaframleiðandi með sölu um 300.000 bíla, Tesla í öðru sæti og Stellantis þriðja, sagði Schmidt.

Lokatala Tesla mun innifela Tesla Model Y, sem jók sölu bílaframleiðandans í Evrópu á seinni hluta árs með innflutningi frá Kína. Model Y seldist betur en bæði VW ID3 og ID4 í nóvember.

Staða Renault-Nissan var komin niður í það fjórða hvað varðar sölu rafbíla í Evrópu í október, sýna gögn Schmidts, en bandalagið sér fyrir sér mikla eftirspurn eftir Dacia Spring sem er fullrafmagnaður bíll á hagstæðu verði sem fluttur er inn frá Kína.

Skráningar á Spring voru alls 5.881 í Evrópu í nóvember, samkvæmt tölum JATO, fleiri en Model Y eða ID3, vegna mikillar eftirspurnar á mörkuðum eins og Ítalíu.

Tesla mun ljúka árinu með heildarmarkaðshlutdeild í Vestur-Evrópu upp á 2 prósent, spáir Schmidt, meira en tvöfalda hlutdeild sína frá árinu 2020, sem var 0,9 prósent og fer upp fyrir Jaguar Land Rover.

(Automotive News Europe)